"ރެގިއުލޭޝަން އޮން ކޯޕްރޭޓް ގަވަރނަންސް ފޯ ބޭންކްސް، އިންޝުއަރެންސް، އަދި ފައިނޭންސް ކުންފުނިތައް" އިސްލާހުކުރަން ފެންނަ ކަމަށް ޕްރައިވެޓައިޒޭޝަން އެންޑް ކޯޕަރަޓައިޒޭޝަން (ޕީސީބީން) އެމްއެމްއޭ އަށް ލަފާދީފިއެވެ.
ޕީސީބީން އެފަދައިން ބުނީ ޕީސީބީގެ ފަރާތުން އެމްއެމްއޭގެ ގަވަރުނަރަށް ފޮނުވި ސިޓީއެއްގައެވެ.
ރާއްޖޭގެ ބެންކިންގ ޤާނޫނުގެ ދަށުން އެމްއެމްއޭއިން އާއްމުކޮށްފައިވާ "ރެގިއުލޭޝަން އޮން ކޯޕްރޭޓް ގަވަރނަންސް ފޯ ބޭންކްސް، އިންޝުއަރެންސް، އަދި ފައިނޭންސް ކުންފުނިތައް" އަކީ ސަރުކާރު ހިއްސާވާ މިފަދަ ކުންފުނިތަކުން ޢަމަލުކުރުން ލާޒިމް ކޯޑެއް ކަމަށެވެ. މި ކޯޑުގެ 7 ވަނަ މާއްދާގެ 4 ވަނަ ނަމްބަރުގެ ދަށުން ބޯޑުތަކަށް އައްޔަންކުރާ މީހުންނަކީ އެއްވެސް މަޤާމަކަށް ރައިސުލްޖުމްހޫރިއްޔާ އައްޔަންކޮށްފައިވާ ފަރާތަކަށް ވެގެން ނުވާނެ ކަމަށާއި އަދި އެއްވެސް ސިޔާސީ ޕާޓީއެއްގެ އިސްވެރިއަކަށް ވެގެން ނުވާނެ ކަަމަށް ބަޔާންކޮށްފައިވާ ކަމަށް ޕީސީބީން ވަނީ ބުނެފައެވެ.
ނަމަވެސް ރާއްޖޭގެ ބެންކިން އާއި ބެހޭ ޤާނޫނުގެ 15 ވަނަ މާއްދާގެ (ބ)ގެ ދަށުން ސަރުކާރުގެ މިނިސްޓްރީއެއްގެ އެންމެ އިސްވެރިޔަކު ނުވަތަ ކެބިނެޓް މެމްބަރުން ފިޔަވާ އެހެން ފަރާތްތައް ބޭންކް އަދި ފައިނޭންސް ކުންފުނިތަކުގެ ބޯޑުތަކަށް އައްޔަންކުރުމަށް ހުރަސް ނާޅާ ކަމަށް އެ ސިޓީގައި ވަނީ ފާހަގަކޮށްފައެވެ.
ސަރުކާރު ހިއްސާވާ ކުންފުނިތަކަކީ ވަކި މެންޑޭޓެއްގެ ދަށުން ސަރުކާރުގެ ސްޓްރެޓެޖިކް ނިންމުންތަކާއި އެ ނޫންވެސް އަސާސީ ބޭނުންތަކަށް ރައްޔިތުންނަށް މުހިންމު ޚިދުމަތްތަކެއް ފޯރުކޮށްދޭ ތަންތަން ކަމަށް ވާއިރު، ސަރުކާރު ކުންފުނިތަކަށް ސަރުކާރުގެ ޕޮލިސީ ލެވެލްގެ ބޭފުޅުން އައްޔަންކުރުމަކީ އެ ކުންފުނިތަކުގެ މަޤްސަދުތަކާއި ޤައުމީ ލަނޑުދަނޑިތައް ހާސިލްކުރުމަށް ވެސް އެންމެ އެކަށީގެންވާ ގޮތް ކަމަށް ޕީސީބީން ވަނީ ބުނެފައެވެ،
މިކަމުގައި ދިމާވާ ގޮންޖެހުންތަކާއި ގުޅިގެން ފިނޭންސާއި އެކު ކުރި މަޝްވަރާތަކަށް ފަހު ރާއްޖޭގެ ބެންކާއި ބެހޭ ޤާނޫނުގެ 15 ވަނަ މާއްދާ އާއި ތައާރުޒު ނުވާ ގޮތުގެ މަތިން ސަރުކާރު ހިއްސާވާ ބެންކުތަކާއި، އިންޝުއަރެންސް އަދި ފައިނޭންސިން ކުންފުނިތަކަށް ބޯޑަށް ޑިރެކްޓަރުން އައްޔަންކުރުމާއި ގުޅޭ ގޮތުން "ރެގިއުލޭޝަން އޮން ކޯޕްރޭޓް ގަވަރނަންސް ފޯ ބޭންކްސް، އިންޝުއަރެންސް، އަދި ފައިނޭންސް ކުންފުނިތައް" އިސްލާހުކުރަން ފެންނަ ކަމަށް ޕީސީބީން ވަނީ ލަފާދީފައެވެ.
