ފ.ފީއައްޔަށް ރައީސުލްޖުމްހޫރިއްޔާ އައްޔަންކޮށްފައިވާ ޔޫތު އެސޯސިއޭޓް މަސައްކަތް ކުރާނެ އޮފީހެއް ނެތްއިރު، މަސައްކަތެއް ނުކޮށް މުސާރަ ނަގާތާ ހަތަރު މަސް ދުވަސް ވެއްޖެ އެވެ.
ފީއަލީ ޔޫތު އެސޯސިއޭޓްގެ މަޤާމަށް އައްޔަންކޮށްފައި ވަނީ އެ ރަށު ބްލޫނިއާގޭ މުޙައްމަދު އާމިރު އެވެ. އެ މަޤާމަށް އޭނާ އައްޔަން ކޮށްފައި ވަނީ މިއަހަރުގެ މާޗު މަހުގެ 17 ވަނަ ދުވަހު އެވެ. އެއީ އޭޕްރީލް މަހު އޮތް ރައްޔިތުންގެ މަޖިލީހުގެ އިންތިޚާބާ ދިމާކޮށެވެ.
މިނިސްޓަރ އެޓް ދަ ޕްރެޒިޑެންޓްސް އޮފީސް ފޮރ ޕްރެޒިޑެންޝަލް އެފެއާޒް ޢަލީ ޢާރިފް ސޮއި ކުރައްވައި، ފޮނުވާފައިވާ ޗިޓުގައިވާ ގޮތުން އެ ވަޒީފާގެ މުސާރަ އަކީ 13،000 ރުފިޔާ އެވެ. އެއީ މަޤާމުގެ މަހު މުސާރައިގެ ގޮތުގައި ލިބޭ 8000 ރުފިޔާގެ އިތުރުން، ލިވިން އެލަވަންސްގެ ގޮތުގައި ލިބޭ 5000 ރުފިޔާ އެވެ.
![](https://dyncz33htw1ec.cloudfront.net/posts/b6942934-e740-4024-9dd7-4cf5d5e241ef.png)
އެ މަޤާމަށް އޭނާ އައްޔަންކޮށްފައިވާއިރު، ފީއަލީގައި ޒުވާނުންގެ މަރުކަޒެއް ނުހުރެ އެވެ. އެހެންކަމުން ހަތަރު މަސް ދުވަސްވީއިރު، އޭނާ ވަޒީފާ އަދާ ކުރުމަށް ނިކުންނާނެ އެއްވެސް އޮފީހެއް ނުވަތަ އިދާރާއެއް ނެތެވެ. ނަމަވެސް، ބަރާބަރަށް މަހު މުސާރަ ނަންގަވާކަން ވަނީ އެނގިފަ އެވެ.
ދައުލަތުގެ ޚަރަދުތައް އިންތިހާ އަށް ބޮޑުވެފައިވާއިރު، ސިޔާސީ މަޤާމުތަކަށް މުސާރަ ދިނުމަަށް ކުރާ ހޭދަ ބޮޑެވެ. މީގެ އިތުރުން ސަސްޕެންޑު ކޮށްފައި ތިބި ޑެޕިއުޓީ މިނިސްޓަރުންނަށް ވެސް ދައުލަތުން ދަނީ ބަރާބަރަށް މުސާރަ ދެމުންނެވެ.