ރާއްޖެއިން ބޭރުގައި ކިޔެވުމަކީ ހަމައެކަނި އިލްމު ހޯދުމަށް ލިބޭ ފުރުސަތަކަށްވުރެ މާ ބޮޑު ކަމެއް ކަމަށާއި، ގައުމަށް އެންމެ ފައިދާ ހުރި ދާއިރާތަކުން ކުރިއަށްދާ ޖެހޭ ކަމަށް ހަޔަރ އެޑިޔުކޭޝަން މިނިސްޓަރު ޑރ. މަރިޔަމް މާރިޔާ ވިދާޅުވެއްޖެއެވެ.
ރައީސް ދެއްވާ ޚާއްސަ ސްކޮލަރޝިޕާއި، ހައި އެޗީވަރސް ސްކޮލަރޝިޕް ލިބުނު ފަރާތްތަކަށް އެކަމުގެ ލިޔުން ހަވާލުކުރުމަށް ބުރާސްފަތި ދުވަހުގެ ރޭ ބޭއްވި ރަސްމިއްޔާތުގައި މިނިސްޓަރު މާރިޔާ ވިދާޅުވީ ދިރިއުޅޭ ދުނިޔެ މިދަނީ ބަދަލުވަމުން ކަމަށާޢި، ވަރަށް ބާރު ދުވެލީގައި ކުރިއަރައި ތަރައްގީވަމުން ކަމަށެވެ. ބަވަނަވުމުގެ ސަބަބުން ދިރިއުޅޭ ވެށީގެ ވެލިއުސް ފަނޑުވަމުންދާތަން ފެންނަ ކަމަށް މިނިސްޓަރު މާރިޔާ ވިދާޅުވިއެވެ. އަދި ވިދާޅުވީ ކޮންމެ ގައުމަކުން ކިޔެވިކަމުގައި ވިޔަސް ކޮންމެ ކުއްޖަކީ ވެސް ފުރިހަމަ މުސްލިމުން ކަމުގައި ތިބި ދިވެހިންކަން ހަނދާން ކުރަންޖެހޭ ކަމަށެވެ.
ރާއްޖެއިން ބޭރުގައި ކިޔެވުމަކީ ހަމައެކަނި އިލްމު ހޯދުމަށް ލިބޭ ފުރުސަތަކަށްވުރެ މާ ބޮޑު ކަމެއްކަން ފާހަގަކުރައްވައި މިނިސްޓަރު މާރިޔާ ވިދާޅުވީ އެއީ ކުރިއެރުމާއި ހޯދުމުގެ ދަތުރެއް ކަމަށާއި، އެއީ ތަފާތު ސަގާފަތްތަކުގެ ތެރެއަށް ވަދެ އުނގެނުމަށް އޮތް މަގެއް ކަމަށެވެ. ތަފާތު ދާއިރާތަކުން ކުރިއަރާފައިވާ މުފައްކިރުންނާ ގުޅިގެން ކަންކަން ދަސްކުރުމަށް އޮތް ސުޕަރ ހައިވޭއެއް ކަމަށް މިނިސްޓަރު މާރިޔާ ވިދާޅުވިއެވެ.
މީގެ އިތުރުން މިނިސްޓަރު މާރިޔާ ވިދާޅުވީ ކިޔެވުމަށް ބޭރު ގައުމެއްގައި އުޅޭއިރު ތިޔަ ކޮންމެ ކުއްޖަކީ ވެސް މިގައުމުގެ އެމްބަސަޑަރެއްކަން ދަނެގެން އުޅެންޖެހޭ ކަމަށާއި، ތަމްސީލު ކުރުމުގައި ރަނގަޅު ނަމޫނާއަކަށް ވުމަކީ ވަރަށް މުހިންމު ކަމެއް ކަމަށެވެ.
މި ލޮބުވެތި ގައުމުން ތިޔަ ދަރިވަރުންނަށް މިކުރާ ހޭދައަށްވުރެ މަތީ ދަރަޖައަށް ތިޔަ ކުދިންގެ ޚިދުމަތަށް އެދި މިގައުމު ގޮވަމުންދާކަން. އާދެ. 21 ގަރުނަށް ބޭނުންވާ އިލްމާއި ދިރިއުޅުމަށް ބޭނުންވާ މަސައްކަތުގެ ހުނަރާއި ސިފަތަކާއި އަހުލާގު އަޅުގަނޑުމެންގެ ކިބައިގައި އަށަގަންނުވަން އެބަޖެހޭ. ތިޔަ ކުދިންނަށް ލިބޭ އިލްމާއި ހުނަރާއި ތަޖުރިބާ ތަކަކީ ހަމައެކަނި ތިޔަ ކުދިންގެ މުސްތަގުބަލު ބައްޓަން ކޮށްދޭ އެއްޗެއް ނޫން. އެއީ ގައުމީ ވުނައެއް. އާދެ. ގައުމީ އިންވެސްޓްމަންޓެއް. އެހެންކަމުން ތިޔަ ކުދިން ކިޔަވަން އިހްތިޔާރުކުރާ ދާއިރާއަކީ ގައުމަށް އެންމެ ފައިދާ ހުރި އެންމެ ބޭނުންތެރި މުހިންމު ދާއިރާތަކުގެ ތެރެއިން ދާއިރާއެއް ކަމުގައި ހެދުމަށް ތިޔައިން ކޮންމެ ކުއްޖަކަށް ވެސް އިލްތިމާސްކުރަން.ހަޔަރ އެޑިޔުކޭޝަން މިނިސްޓަރު ޑރ. މަރިޔަމް މާރިޔާ![]()
މިނިސްޓަރު މާރިޔާ ވިދާޅުވީ، ތައުލީމީ ދާއިރާއަށް ވަރަށް ބޮޑަށް އިސްކަން ދޭ ކަމަށާއި، ކުރިމަގުގައި ފެންނާނީ ފުދުންތެރި އިލްމީ ގާބިލް ޖީލެއް ކަމަށެވެ. އަދި ގައުމުގެ ތަރައްގީއާއި ކުރިއެރުމުގައި ކިޔަވައިގެން ނިކުންނަށް ކުދިންގެ ދައުރު ވަރަށް މުހިންމު ކަމަށް މިނިސްޓަރު މާރިޔާ ވިދާޅުވިއެވެ.