ރައީސުލްޖުމްހުރިއްޔާ ޑރ.މުހައްމަދު މުއިއްޒުގެ ސަރުކާރަކީ ބާރުތައް ކޮންޓްރޯލްކޮށް، ވާދަވެރިންނަށް ފުރުސަތު ހަނިކުރާ ސަރުކާރެއް ކަމަށާއި، މިހާރު ވެސް 20 ވަނަ ރައްޔިތުންގެ މަޖިލީހުން އެމަންޒަރު ފެންނަމުންދާ ކަމަށް ކުރީގެ އަލިފުށީ ދާއިރާގެ މެންބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި ބިގޭ ވިދާޅުވީ، މިހާރު ވެރިކަމުގައި ތިއްބެވި ބޭފުޅުންނާ ގުޅުންހުރި ޕާޓީއެއްގެ ތެރެއިން ވެރިކަމަށް އަންނަ ކޮންމެ ފަހަރަކު ވެސް މަސައްކަތް ކޮށްފައިވަނީ ބާރުތައް އެއްކުރަން ކަމަށެވެ. ނަމަވެސް އެމްޑީޕީގެ ދެ ވެރިކަމުގައި މަޖިލިސް ތެރެއިން އެމްޑީޕީގެ ޕާލިމެންޓްރީ ގްރޫޕުން މަސައްކަތް ކުރީ ޖަވާބުދާރީ ކުރުވައި، އިދިކޮޅު ފަރާތްތަކަށް ވީހާވެސް ބޮޑަށް ފުރުސަތު ދިނުމަށް ކަމަށް ބިގޭ ވިދާޅުވިއެވެ.

ބިގޭ ވިދާޅުވީ ރާއްޖޭގައި ތިން ބާރު ވަކިކުރުމަށް ބުރަ މަސައްކަތްތަކެއް ކޮށްފައިވާ ކަމަށާއި، އެމަސައްކަތް ކުރީ އެމްޑީޕީން ކަމަށެވެ. އެމަސައްކަތުން ރާއްޖޭގައި އޮތް އަނިޔާވެރި ސަގާފަތް ނައްތާލެވުނު ކަމަށް ބިގޭ ވިދާޅުވިއެވެ. ނަމަވެސް މިހާރުގެ ވެރިކަމުގައި ތިއްބެވި ބޭފުޅުންނަކީ އެ ވިސްނުން ހުރި ބޭފުޅުން ނޫން ކަމަށާއި، މިފެންނަނީ އެއަނިޔާވެރިކަމުގެ ސަގާފަތް އިޔާދަވާ މަންޒަރު ކަމަށް ބިގޭ ވިދާޅުވިއެވެ.

އެމްޑީޕީން އަބަދުވެސް މަސައްކަތް ކުރާނީ ރައްޔިތުންނާއެކު ކަން ފާހަގަކުރައްވައި ބިގޭ ވިދާޅުވީ އިންސާފާއި ހަމަހަމަކަން ގާއިމްކުރުމަށް އަބަދުވެސް މަސައްކަތް ކުރާނެ ކަމަށެވެ. އެމްޑީޕީގެ ސުޕަމެޖޯރިޓީ ގައި 19 ވަނަ ރައްޔިތުންގެ މަޖިލިސް ކުރިއަށް ގެންދިޔައިރު ވެސް ޕާލިމެންޓްރީ ގްރޫޕަށް އެއްވެސް ބޭފުޅެއްގެ ނުފޫޒެއް ނާންނަ ކަމަށާއި، މަސައްކަތް ކުރީ ރައްޔިތުންގެ ހައްގުގައި ކަމަށް ބިގޭ ވިދާޅުވިއެވެ. މިނިވަންކަމާއެކު ކޮންމެ މެންބަރަކު ވެސް ޕާލިމެންޓްރީ ގުރޫޕްގައި ވާހަކަދައްކަވާއިރު، ކަންކަން ނިންމަނީ މެޖޯރިޓީން ބޭނުންވާ ގޮތަށް ކަމަށް ބިގޭ ވިދާޅުވިއެވެ.

މީގެ އިތުރުން ބިގޭ ވިދާޅުވީ، ސަރުކާރު ހިންގައި، ސަރުކާރަށް ކަންކަން ފަހިކުރުމަށްޓަކައި ސަރުކާރުން އެދޭ ކަންކަން ކުރުމުގައި ވެސް ޕާލިމެންޓްރީ ގުރޫޕްގައި މެންބަރުންނަށް އެއްބަސްވެވޭ ކަމަކަށްނުވާ ކަމަށްވާނަމަ އެއްބަސްވެވޭ މިންގަނޑެއްގެ ތެރެއިން ބަދަލުތައް ގެނެސްގެން ކަންކަން ނިންމާ ކަމަށް ބިގޭ ވިދާޅުވިއެވެ.

ނަމަވެސް މިސަރުކާރުގައި 20 ވަނަ މަޖިލީހުން މިހާރު ވެސް ފެންނަމުންދަނީ ހުދުމުހުތާރުކަން ކަމަށާއި، މަޖިލީހުގެ ޕާލިމެންޓްރީ ގުރޫޕުން މަސައްކަތް ކުރަނީ ބާރުތައް އެއްކުރަން ކަމަށެވެ. ސަރުކާރުން އެހައި ބޮޑަށް ނުފޫޒު ފޯރުވައި ކަންކަން ހަނި ކުރުމަށް މަސައްކަތް ކުރަމުންދާއިރު، މިހާރު ސުޕަމެޖޯރިޓީ ސަރުކާރަށް އޮތް ނަމަވެސް މާގިނަ ދުވަހެއް ވަންދެން މަޖިލިސް މެންބަރުން އެކަތިގަނޑެއްގެ ގޮތުގައި މަސައްކަތް ކުރާ މަންޒަރު ފެނުމަކީ ދުރުގައި އޮތް ކަމެއް ކަމަށް ބިގޭ ވިދާޅުވިއެވެ.