ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުގައި ތިލަވެ ހާމަވަމުންދާ ކަންކަމުން މުޅި ގައުމަށް ސިހުން ގެނައުވައެވެ. ބޮޑެތި ވައްކަންތަކާއި، ބޭކާރު ހަރަދުތަކެވެ. ރައީސް މުއިއްޒާއި، އެމަނިކުފާނުގެ އަނބިކަނބަލުންގެ ލަގްޒަރީ ދިރިއުޅުއްވުމުގެ ގިނަކަންކަން އޮތީ ވީޑިއޯއާއެކު މުޅި ސޯޝަލްމީޑިއާގައި އާއްމުވެފައެވެ. އަބަދުވެސް މިފަދަ ކަމެއް އާއްމުވުމާއެކު ނޫސްވެރިންގެ ބައްދަލުވުންތައް ބާއްވައި، ހަގީގަތް އޮޅުވާލުމަށް ވަނީ މަސައްކަތް ވެސް ކޮށްފައެވެ. ނަމަވެސް ނަތީޖާ ވަރަށް ހިތްޗެވެ. ނޫސްވެރިން ކުރާ ސުވާލުތަކަށް ޖަވާބު ނުދެވި، އިތުރަށް ވަނީ ބޭޒާރެވެ. ރައީސް މުއިއްޒަށް ކުރެވޭ ތުހުމަތުތަކުން އެމަނިކުފާނު ބަރީއަ ވެވަޑައިގަތުމަށްޓަކައި މިހާތަނަށް ގިނަ ކަންބަޅިއެއް ވަނީ ކަތިލައްވާފައޭ ބުނެވިދާނެއެވެ.
އެގޮތުން ވެރިކަން ފެށިގެން އައިތަނާ މާގިނަ ދުވަހެއް ނުވެ، ކުރިން ރައީސް އޮފީހާއި މުލިއާގޭގައި މަސައްކަތް ކުރެއްވި އަދިފަހުން އެހެން މިނިސްޓްރީ އަކަށް ބަދަލު ކުރެއްވި ސްޓޭޓް މިނިސްޓަރަކަށް މަސައްކަތް ކުރެއްވި އަންހެނެއް އަދި ޅަދަރިމައެއް، ރައީސް މުއިއްޒަށް ސިހުރު ހެދިކަމުގެ ތުހުމަތުގައި ހައްޔަރުކުރިއެވެ. އަދި އޭނާގެ އެއްބަނޑުއެއްބަފާ ކޮއްކޮ ވެސް މިތުހުމަތުގައި ހައްޔަރުކޮށް، ނުހައްގުން ވަނީ އަނިޔާދީފައެވެ. އަދި އޭނާގެ ފިރިމީހާ ވެސް މަގާމުން ދުރުކޮށް އެކަހެރިކޮށްލީއެވެ. ކުރެވުނު ތުހުމަތުތަކަށް ބާރުދޭނެ ކަމެއް ނުފެނުމުން ބަންދުގައި ބޭއްތިއްބުމަށްފަހު ވަނީ ދޫކޮށްލާފައެވެ. ބޮޑު ތުހުމަތެއް ކުރި ނަމަވެސް އެންމެފަހު ވަގުތު އެއްވެސް ކަމެއް ނުވާ ކަމަށް ހަދާ ހިންދާލީއެވެ. ރަށު ތެރޭގައި ކުރެވޭ ތުހުމަތުތަކަށް ބަލާއިރު، ލޯބީގެ ގުޅުމެއް އުޅޭ ކަމާއި، އަދި ރައީސްގެ އަނބިކަނބަލުން ކަރޯކޭ ޖައްސަވާ ވީޑިއޯއެއް ސޯޝަލް މީޑިއާގައި ލީކުކޮށްލި ކަމުގެ ތުހުމަތުގައި ދިން އަދަބެއް ކަމަށް ބެލެވެއެވެ.
އޭގެފަހުން ގޯއްޗާއި، ފެލެޓުތަކުގެ ބޮޑެތި ވައްކަންތަކެއް ވެސް ފެންމަތިވެގެންދިޔައެވެ. ހައުސިން ޑިވަލޮޕްމަންޓް ކޯޕްރޭޝަން (އެޗްޑީސީ)ގެ ހިޔާނާތް ރައީސް މުއިއްޒުގެ ސަމާލުކަމަށް ގެންނެވި ނަމަވެސް ގިނަ ދުވަަސްތަކަކަށް އެކަން ވެސް އޮތީ އޮއްބާލާފައޭ ބުނެވިދާނެއެވެ. މިމައްސަލަ ވެސް ފެންމަތިވުމާއެކު، ނޫސްވެރިންގެ ބައްދަލުވުމެއް ބާއްވައި، ނުހިނގާ ކަމެއް ކަމަށް ދެއްކުމަށް މަސައްކަތް ކޮށްފައިވެއެވެ. ނަތީޖާއެއް ގޮތުން ނޫސްވެރިންގެ ސުވާލުތަކަށް ޖަވާބު ނުދެވި، އިތުރަށް ވީ ބޭޒާރެވެ. ގޯއްޗެއްގެ ވަށާފާރު ރޭނުމުގެ ހުއްދަ ނުދޭ ކަމަށް ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ވިދާޅުވުމާއެކު، ވަށާފާރު ރާނާފައިވާ ގޯއްޗާއި، ނޫސްވެރިން ވަނީ ހަގީގަތް ރައްޔިތުންނަށް ހާމަކޮށްދީފައެވެ. ނަތީޖާއެއް ގޮތުން ބޮޑެތި ތުހުމަތުތަކާއެކު ފަޒުލްއަށް ވެސް މަގާމުން އިސްތިއުފާ ދެއްވުމަށް މަޖުބޫރުވެގެންދިޔައީއެވެ. އެޗްޑީސީ އަދި ހައުސިން މިނިސްޓްރީގައި މަސައްކަތް ކުރަމުންދިޔަ ބައެއް ސިޔާސީ މަގާމުތަކުގައި ތިއްބެވި ޑިރެކްޓަރުން ވެސް މަގާމުން ވަނީ ދުރުކޮށްފައެވެ.
މިމައްސަލައަށްފަހު ދެން ފެންމަތިވެގެންދިޔައީ ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރު) ގައި ރައްކައުކޮށްފައި ހުރި ރައްޔިތުންގެ ޒާތީ މައުލޫމާތު ބޭނުންކޮށްގެން ގަވައިދާ ޚިލާފަށް ވަގަށް ރައީސް މުއިއްޒުގެ ޕާޓީ ޕީއެންސީ އަށް މީހުން ވެއްދި ކަމަށް ތުހުމަތުވާ މައްސަލަ އެކެވެ. ޕާޓީއަށް ސޮއިނުކުރާ ގިނަ ބަޔަކު ޕީއެންސީއަށް ވެއްދިކަން ހާމަވުމާއެކު، މިއީ ވެސް ނުވާކަމެއް ކަމަށް ދެއްކުމަށް ޕީއްޒާ ޕާޓީއާއެކު ނޫސްވެރިންގެ ބައްދަލުވުމެއް ބޭއްވުމަށް ވަނީ މަސައްކަތް ކޮށްފައެވެ. ނަމަވެސް ނޫސްވެރިން ކުރި ސުވާލުތަކަށް ޖަވާބު ނުދެއްވައި، ސްޓޭޓް މިނިސްޓަރު މަޖީދު އާއި ޑެޕިއުޓީ މިނިސްޓަރު އަހުމަދު އާލީގެ އިތުރުން ޓެކްނިކަލް މުވައްޒަފު ވަނީ ފިއްލަވާފައެވެ. އެންމެ ބޮޑު ފާޑުކިޔުމެއް އަމާޒުވެފައިވާ ހޯމްލޭންޑް ސެކިއުރިޓީ އެންޑް ޓެކްނޯލޮޖީ މިނިސްޓަރު އަލީ އިހުސާން މި އިވެންޓުން ފެނިފައިވެސް ނުވެއެވެ. ކަން ހިނގާދިޔަ ގޮތުން އެންމެ ބޮޑު ފާޑުކިޔުމެއް މިހާރު އަމާޒުވެފައިވަނީ ސްޓޭޓް މިނިސްޓަރު މަޖީދު އާއި ޑެޕިއުޓީ މިނިސްޓަރު އަހުމަދު އާލީގެ އިތުރުން ޓެކްނިކަލް މުވައްޒަފަށެވެ. ގިނަ ބައެއް ރުޅިއާއި، ނަފްރަތު ވަނީ އަމާޒުވެފައެވެ.
ނަތީޖާއެއް ގޮތުން މިމަސައްކަތް ކުރުވުމުގައި އެންމެ އިސްކޮށް އުޅުއްވި ހުރިހާ ބޭފުޅުން ފިއްލަވައި، ރައްޔިތުންގެ ކުރިމަތީގައި ކަތިލާފައި މިވަނީ އާދައިގެ ސިޔާސީ މަގާމުގައި ތިއްބެވި ބޭފުޅުންނެވެ. ނަމަވެސް މިކަން ހިނގާދިޔަ ގޮތުން މިއީ ހައިރާންވާންޖެހޭ ވަރުގެ ކަމެއް ނޫންނެވެ. އަނެއްކާ ވެސް މިވަނީ ގުރުބާން ކުރާ ކަންބަޅިންގެ ތެރެއަށް އިތުރު ތިން ކަންބަޅި އިތުރުވެފައެވެ. މިހާތަނަށް މިސަރުކާރުގައި ހިނގާދިޔަ މިފަދަ ބޮޑެތި ވައްކަންތަކާއި، ރައްޔިތުންގެ ނުރުހުމާއި، ފާޑުކިޔުންތައް ސަރުކާރަށް އަމާޒުވާ ހުރިހާ ހާދިސާއަކުން ރައީސް މުއިއްޒު ބަރީއަވެވަޑައިގަތުމަށްޓަކައި، ރައްޔިތުންގެ ކުރިމަތީގައި ބަދަނާމުކޮށްލައި، ފަލީހަތް ކުރަމުން ގޮސްފައިވަނީ ސިޔާސީ މަގާމުތަކުގައި ތިއްބެވި މުވައްޒަފުންނެވެ. ހަގީގީ މުގުލުގައި ރައީސް މުއިއްޒު ހުންނަވައި، އެމަނިކުފާނުގެ އިރުޝާދުގެ ދަށުން އެމަސައްކަތް ކުރުމަށް އަމުރުކުރައްވާ ބޭފުޅުން ފިއްލަވާކަމީ މިއަދު ފެންނަން އޮތް އެއް ހަގީގަތެވެ.
