އިޒްރޭލް ޖެޓްތަކުން ނުސީރަތް ރެފިއުޖީ ކޭމްޕްގައި ހުރި އާއްމުން ދިރިއުޅޭ ގެއަކަށް ބޮންއަޅާ ފަލަސްތީންގެ 14 މީހުން މަރާލައިފިއެވެ.
އޭގެ ތެރޭގައި ކުޑަކުދިންވެސް ހިމެނޭ ކަމަށް އަލްޖަޒީރާ ބުނެއެވެ. މި ރެފިއުޖީ ކޭމްޕަކީ ގާޒާގެ މެދުތެރޭގައި ހުންނަ ކޭމްޕެކެވެ.
އަނެއްކޮޅުން ރަފާގައި އދ ގެ އޮފިޝަލުން ދަތުރު ކުރަމުން ދިޔަ ކާރަކަށް އިޒްރޭލް ސިފައިން ހަމަލާދީ އދ ގެ އޮފިޝަލަކު ވަނީ މަރާލާފައެވެ. މަރާލާފައިވަނީ އިންޑިއާގެ ރައްޔިތެކެވެ.
އދ. ގެ ސެކްރެޓަރީ ޖެނެރަލް ވަނީ އިޒްރޭލުގެ މިއަމަލު ކުއްވެރިކުރައްވާ ފުރިހަމަ ތަހުގީގަކަށް ގޮވާލައްވާފައެވެ.
ހަމާސްގެ ބާރު ރަފާ ސިޓީން ކަނޑުވާލާ، އެ ސިޓީ ހިފުމަށް އިޒްރޭލް ސިފައިން ގެންދަނީ އެ ސިޓީގެ އުތުރާއި ދެކުނުގެ ސަރަހައްދުތަކުގައިވެސް ހަމަލާތައް ދެމުންނެވެ.
ހުސްވި އަހަރުގެ އޮކްޓޯބަރ މަހުގެ 7 ވަނަ ދުވަހުން ފެށިގެން އިޒްރޭލުން ގާޒާ އަށް ދެމުން ގެންދާ ހަމަލާ ތަކުގައި މިހާތަނަށް 35،173 މީހުން މަރުވެފައިވެއެވެ. 79،061 މީހުން ޒަޚަމްވެފައިވެއެވެ.
