އިޒްރޭލުން ފަލަސްތީންގެ ރަފާސިޓީ ހިފުންވާނީ ސިޔާސީ ގޮތުންނާއި، އިންސާނިއްތަގު ގޮތުންވެސް ހެދޭ ވަރަށް ބޮޑު ގޯހެއް ކަމަށް އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭސް ވިދާޅުވެއްޖެއެވެ.

ރަފާ އަށް އިޒްރޭލް ސިފައިން އެރުމާ ދެކޮޅަށް އދ ން އެތައް ފަހަރެއްގެ މަތިން ވަނީ ވާހަކަ ދައްކާ ބަޔާންތައް ނެރެފައެވެ. އެހެން ނަމަވެސް އދ. ގެ އެއްވެސް ގޮވާލުމަކަށް އިޒްރޭލުން އިޖާބަދީފައެއް ނުވެއެވެ. އޭގެ ބަދަލުގައި ގާޒާގައި ހިންގަމުންދާ ހަނގުރާމަ ވަރުގަދަކޮށް އެންމެ ފަހުން މިހާރު އިޒްރޭލް ސިފައިން ގެންދަނީ ގޮތްދޫކުރުމެއް ނެތި ގަޒާގެ ދެކުނުގައި އޮންނަ ރަފާސިޓީއަށް ހަމަލާދީ އެތަން ހިފުމުގެ ހަނގުރާމަ ފަށާފައެވެ.

ހަނގުރާމަ ކުރިއަށް ގެންދަމުން އިޒްރޭލުން ބުނެފައިވަނީ، ހަމަލާތައް ހުއްޓާލުމަށް ހަމާސް ޖަމާއަތުން އެއްބަސްވި ޝަރުތަކަކާމެދު އިޒްރޭލުން ހިތްހަމަ ނުޖެހޭކަމުގައެވެ. އުއްމީދު ކުރި މިންވަރާ ގާތައްވެސް އިޒްރޭލުން އެދޭ ކަންކަން އެ އެއްބަސްވުމުގެ ސަބަބުން ހާސިލުނުވާ ކަމަށް އިޒްރޭލުން ބުނެފައިވެއެވެ.

ރަފާ އަށް ދަތުރު ކުރުމަށް އޮންނަ މަގު އިޒްރޭލް ސިފައިން ހިސޯރު ކުރުމުގެ ސަބަބުން އެ ސިޓީއަށް ކާބޯތަކެއްޗާއި ފެނާއި ބޭސްފަދަ ޒަރޫރީ އެހީ ފޯރުކޮށްދެވޭނެ ގޮތެއް މިހާރުވަނީ ނެތިފައެވެ. އޭގެ ސަބަބުން އެތައް ސަތޭކާ ހާސް ބައެއްގެ ފުރާނަ ވަނީ ނުރައްކަލުގެ ތެރެއަށް ވެއްޓިފައެވެ.

ހުސްވި އަހަރުގެ އޮކްޓޯބަރ މަހުގެ 7 ވަނަ ދުވަހުން ފެށިގެން އިޒްރޭލުން ގާޒާ އަށް ދެމުން ގެންދާ ހަމަލާ ތަކުގައި މިހާތަނަށް 34،789 މީހުން މަރުވެފައިވެއެވެ. 78،204 މީހުން ޒަޚަމްވެފައިވެއެވެ.