ކާމިޔާބު ހޯދުމަށް އަބަދު ވެސް މަސައްކަތް ކުރަން ޖެހޭ ކަމަށް، ޓޮޓެންހަމްގެ ކޯޗު އަންގޭ ޕޮސްޓެކޮގްލޫ ބުނެފި އެވެ.
އޭނާ މިހެން ބުނީ، ޓޮޓެންހަމްގެ މުސްތަޤުބަލާއި، އެ ކުލަބުގައި އޭނާގެ ކުރިމަގާ ގުޅޭ ގޮތުން ވާހަކަ ދައްކަމުންނެވެ. މި ސީޒަންގެ އިނގިރޭސި ޕްރިމިއާ ލީގު ތާވަލްގެ ގަދަ ހަތަރެއްގެ ތެރޭގައި އޮތުމަށް ޓޮޓެންހަމުން އަމާޒު ހިފި ނަމަވެސް، އެންމެ ފަހުން ކުޅުނު މެޗުން ބަލިވެ އެ އުންމީދު ވަނީ ހަނިވެފަ އެވެ.
ޕޮސްޓެކޮގްލޫ ބުނީ، ޓޮޓެންހަމުން އަންނަނީ ޓީމެއް ބިނާކޮށް، ރަނގަޅު ކުޅުންތެރިންތަކެއް އުފައްދަން މަސައްކަތް ކުރަމުން ކަމަށެވެ. ޓޮޓެންހަމް ކަހަލަ ކުލަބެއްގައި ކާމިޔާބު ހޯދުމަށް އަބަދު ވެސް މަސައްކަތް ކުރަން ޖެހޭކަން ފާހަގަކޮށް ޕޮސްޓެކޮގްލޫ ބުނީ، އެކަމަކީ އޭނާގެ މަސްއޫލިއްޔަތުގެ ތެރޭގައި ވެސް އޮންނާނެ ކަމެއް ކަމަށެވެ.
މީގެ އިތުރުން އޭނާ ބުނީ، ޓޮޓެންހަމްގެ ކޯޗުގެ ޙައިސިއްޔަތުން، އެ ކުލަބު އޮންނާނީ ތާވަލްގެ ހަތަރު ވަނައިގައި ނުވަތަ ފަސް ވަނައިގައި ނުވަތަ ހަ ވަނައިގައި ކަމަށް އޭނާ އަށް ނުބުނެވޭނެ ކަމަށެވެ. އޭނާ އަކީ އެގޮތަށް މަސައްކަތް ކުރާ މީހެއް ނޫން ކަމަށާއި، އަބަދު ވެސް މަސައްކަތް ކުރާނީ ކާމިޔާބަށް ކަމަށް ވެސް ޕޮސްޓެކޮގްލޫ ވަނީ ބުނެފަ އެވެ.
އިތުރަށް ޕޮސްޓެކޮގްލޫ ބުނީ، އޭނާ ބޭނުން ވަނީ ކޮންމެ ވަގުތެއްގައި ވެސް ކަންކަން ކާމިޔާބު ކުރަން ކަމަށެވެ. އެގޮތުން އަންނަ ސީޒަންގައި ޓޮޓެންހަމްގައި އޭނާ ފަށާނީ ކާމިޔާބު ހޯދުމުގެ މަސައްކަތް ކަމަށާއި، ކުރިއަށް ދާން ބޭނުން ވަނީ އެ ގޮތުގައި ކަމަށް އޭނާ ބުންޏެވެ. ޚާއްސަކޮށް ޓޮޓެންހަމަށް ކުރިއެރުންތަކެއް ލިބެން ޖެހޭ ކަމުގައި އޭނާ ބުންޏެވެ.
ޓޮޓެންހަމްގެ ކޯޗުކަމާ ޕޮސްޓެކޮގްލޫ ހަވާލުވެ ރަނގަޅު މަސައްކަތްތަކެއް ކުރި އެވެ. މި ސީޒަންގެ ކުރީ ކޮޅު އެ ޓީމުން ރަނގަޅު ނަތީޖާތަކެއް ނެރުނު ނަމަވެސް، ވަކި ހިސާބަކުން ވަނީ ނަތީޖާ ދަށްވެފަ އެވެ. މި ވަގުތު ޓޮޓެންހަމް އޮތީ ލީގު ތާވަލްގެ ފަސް ވަނައިގަ އެވެ.
