ހުޅުމާލޭ ފަޅު ތެރޭގައި އޮތް ޑްރެޖަރެއްގައި މަސައްކަތް ކުރަނިކޮށް، އަނިޔާވެގެން ބިދޭސީއަކު މަރުވެއްޖެއެވެ.

ހުކުރު ދުވަހު ފުލުހުން ބުނީ ހުޅުމާލެ ފަޅުތެރޭގައި އޮތް ޑްރެޖަރެއްގައި މަސައްކަތް ކުރަމުންދިޔަ ބިދޭސީއަކަށް އަނިޔާވެގެން ހުޅުމާލެ ހޮސްޕިޓަލަށް ގެންގޮސްފައިވާ ކަމަށް ހެނދުނު 10:38 ހާއިރު ރިޕޯޓުކޮށްފައިވާ ކަމަށެވެ. އެމީހާ ހޮސްޕިޓަލަށް ގެންދިޔައިރު ވެސް މަރުވެފައިވާ ކަމަށް ހޮސްޕިޓަލުން ފުލުހުންނަށް މައުލޫމާތު ދީފައިވާ ކަމަށެވެ.

އެއީ 30 އަހަރުގެ އިންޑިއާ ފިރިހެނެއް ކަމަށް ފުލުހުން ބުނެއެވެ.

ފުލުހުން ބުނީ މިހާދިސާއާ ގުޅިގެން ބަލަންޖެހޭ ކަންކަން ބަލަމުންދާ ކަމަށެވެ.

މިފަދަ ބޮޑެތި މަސައްކަތްތައް ކުރާއިރު، މަސައްކަތްތެރިންގެ ރައްކާތެރިކަމަށް އަޅަންޖެހޭ ފިޔަވަޅުތައް ނާޅާ ކަމަށް ބުނެ، މިފަހުން ވެސް އަޑު އުފުލާފައިވެއެވެ. މިއީ ކަންބޮޑުވުމެއް ކަމަށާއި، މިކަންކަން ކަމާބެހޭ ފަރާތްތަކުން ބަލަންޖެހޭ ކަމަށް ބައެއް މީހުން ގޮވާލާފައިވެއެވެ. މީގެ ކުރިން ވެސް ކޮންސްޓްރަކްޝަންގައި މަސައްކަތްކުރާ މަސައްކަތްތެރިންނަށް އަނިޔާވެ، ބައެއް ހިތާމަވެރި ހާދިސާތައް ހިނގާފައިވެއެވެ.