ހުޅުމާލެ ފޭސް 2 ގައި އޮތް ކާރެއްގައި ރޯވެ ބޮޑެތި ގެއްލުންތަކެއް ވެއްޖެއެވެ.
ފުލުހުން ބުނީ، ހުޅުމާލެ ފޭސް 2 ގެ އެޗް5 ކައިރީގައި ބާއްވާފައި އޮތް ކާރެއްގައި އަލިފާން ރޯވެފައިވާކަމަށް އަންގާރަ ދުވަހުގެރޭ 11:40 ހާއިރު ފުލުހުންނަށް ރިޕޯޓްކޮށްފައިވާ ކަމަށެވެ.
އަދި މި ހާދިސާގައި އެއްވެސް މީހަކަށް އަނިޔާވެފައި ނުވި ނަމަވެސް ކާރަށް އެކިވަރުގެ ގެއްލުންވެފައިވާ ކަމަށް ފުލުހުން ބުނެއެވެ.
އާންމުވެފައިވާ ވީޑިއޯއިން ފެންނަނީ ހުދުކުލައިގެ ކާރެއްގެ އިންޖީނުގައި ރޯވެފައިވާ މަންޒަރެވެ. އަދި އަލިފާން ނިއްވުމަށް އާންމުން މަސައްކަތް ކުރަމުންދިޔަތަން ފެނެއެވެ.
ރޯވެފައިވަނީ ހުދުކުލައިގެ ޕްރައިވެޓް ކާރެއްގައެވެ.
