ރައްޔިތުންގެ މަޖިލީހުން ގާނޫނަށް ގެންނަންޖެހޭ ބަދަލުތައް ގެނެސްގެން ވެސް ސަރުކާރު ޖަވާބުދާރީކުރުމުގެ މަސައްކަތް ކުރައްވާނެ ކަމަށް އެމްޑީޕީގެ އިސް އެޑްވައިޒަރ އަދި ކުރީގެ ރައީސް އިބްރާހީމް މުހައްމަދު ސާލިހު ވިދާޅުވެއްޖެއެެވެ.

ބުރާސްފަތި ދުވަހުގެ ރޭ އައްޑޫސިޓީގައި ކުރިއަށް ގެންދިޔަ އެމްޑީޕީ މިސްރާބު ހަމަމަގަށް ޖަލްސާގައި ރައީސް ސާލިހު ވިދާޅުވީ މިސަރުކާރު އައީ ހުރިހާކަމެއް ހާމަކުރާނެ ކަމުގެ ސިޔާސަތާއެކު ކަމަށާއި، ނަމަވެސް އަމަލުކުރަމުންދަނީ އިދިކޮޅަށް ކަމަށެވެ.

ރައީސް ސާލިހު ވިދާޅުވީ މިސަރުކާރުގެ މިހާތަނަށް އައިރު ނޫސްވެރިން ބޭނުންވި އެއްވެސް މައުލޫމާތެއް ހާމަކޮށްފައިނުވާ ކަމަށެވެ. ބައެއް މައުލޫމާތު ހޯދުމަށް ނޫސްވެރިން މަސައްކަތްކޮށް ނުލިބި، އިންފޮމޭޝަން ކޮމިޝަނަރުގެ އޮފީހުން މައުލޫމާތު ހިއްސާކުރުމަށް އެދުމުން އެ މައުލޫމާތު ނުދީ ސަރުކާރުން މިއަދު ހިފަހައްޓަމުންދާ ކަމަށް ރައީސް ސާލިހު ވިދާޅުވިއެވެ.

ރައީސް ސާލިހު ވިދާޅުވީ ސަރުކާރު ޖަވާބުދާރީ ކުރުވުމަށް ދެން އޮތް ގޮތަކީ ރައްޔިތުންގެ މަޖިލިސް ކަމަށާއި، މަޖިލީހުގެ ތެރެއިން ޖަވާބުދާރީ ކުރުވޭނެ ކަމަށެވެ. އަދި ގާނޫނަށް ގެންނަންޖެހޭ ބަދަލުތައް ގެނެސްގެން ވެސް އެކަން ކުރައްވާނެ ކަމަށް ރައީސް ސާލިހު ވިދާޅުވިއެވެ. އެހެންކަމުން ކުރިއަށް އޮތް ރައްޔިތުން މަޖިލީހުގެ އިންތިޚާބުގެ މެޖޯރިޓީ އެމްޑީޕީއަށް ލިބެންޖެހޭ ކަމަށް އެމަނިކުފާނު ވިދާޅުވިއެވެ.

ރައީސް ސާލިހު ވިދާޅުވީ ރައްޔިތުންނަށް ގޯހެއް ހެދިފައިވާކަން ރައްޔިތުން ގަބޫލުކުރާ ކަމަށާއި، މަޖިލިސް އިންތިޚާބަކީ އެކަންކަން ރަނގަޅު ކުރުމަށް ލިބޭ ފުރުސަތެއް ކަމަށެވެ.