އިނގިރޭސި ޕްރިމިއާ ލީގުގައި ކްރިސްޓަލް ޕެލެސްއާ ދެކޮޅަށް ކުޅުނު މެޗުން އެންމެ ފަހުގެ ޗެމްޕިއަން މެންޗެސްޓަރ ސިޓީ މޮޅުވެއްޖެ އެވެ.

ޕެލެސްގެ އަމިއްލަ ދަނޑުގައި ކުޅުނު މެޗު ސިޓީން ކާމިޔާބު ކުރީ އެ ޓީމުން ލީޑު ނަގާފައި ވަނިކޮށް، ފަހަތުން އަރައި ހަތަރު ލަނޑު ޖަހައިގެންނެވެ.

މެޗު ފަށައިގެން ތިން ވަނަ މިނެޓުގައި ޕެލެސް އަށް ލީޑު ނަގައިދިނީ ޖިއާން ފިލީޕޭ މަޓޭޓާ އެވެ. އޭގެ ފަހުން މެޗުގެ 13 ވަނަ މިނެޓުގައި ސިޓީ އަށް ނަތީޖާ ހަމަހަމަ ކޮށްދިނީ ކެވިން ޑި ބްރޭނާ އެވެ. ދެ ވަނަ ހާފު ފަށައިގެން ދެ ވަނަ މިނެޓުގައި ސިޓީ އަށް ލީޑު ނަގައިދިނީ ރީކޯ ލެވިސް އެވެ. އޭގެ ފަހުން 66 ވަނަ މިނެޓުގައި އާލިން ހާލަންޑް ވަނީ ސިޓީގެ ތިން ވަނަ ލަނޑު ޖަހައިފަ އެވެ. ސިޓީގެ ފަހު ލަނޑު ޖެހީ ޑި ބްރޭނާ އެވެ. މެޗުގައި ޕެލެސްގެ ދެ ވަނަ ލަނޑު 86 ވަނަ މިނެޓުގައި ޖެހީ އޮޑްސަން އެޑޮއާޑް އެވެ.

މޮޅާއެކު ސިޓީން އޮތީ ލީގު ތާވަލްގެ ތިން ވަނައިގަ އެވެ. އެއީ މިހާތަނަށް ކުޅުނު 31 މެޗުން 70 ޕޮއިންޓު ހޯދައިގެންނެވެ. ސިޓީ އަދި އާސެނަލް ކުޅުނު މެޗުތަކުން މޮޅުވެފައިވާތީ، ލީގު ވާދަވެރިކަން ވަނީ ބޮޑުވެފަ އެވެ.