އޭނާ އަކީ ގޯސް މީހެއް ގޮތަށް ދެކިގެން ނުވާނެ ކަމަށް، ބާސެލޯނާ އަށް ކުޅެމުން އަންނަ ޕޯޗުގަލްގެ ޔާއޯ ފެލިކްސް ބުނެފި އެވެ.

އޭނާ މިހެން ބުނީ ސްޕެނިޝް ލީގުގައި ބާސެލޯނާ އިން އެތުލެޓިކޯ މެޑްރިޑާ ދެކޮޅަށް ކުޅުނު މެޗަށްފަހު ވާހަަކަ ދައްކަމުންނެވެ. މިއީ އެތުލެޓިކޯގައި ހުރުމަށްފަހު ބާސެލޯނާ އަށް ބަދަލުވެ، އެތުލެޓިކޯއާ ދެކޮޅަށް ފެލިކްސް ކުޅުނު ދެ ވަނަ މެޗެވެ. ދެ މެޗުން ވެސް ބާސެލޯނާ މޮޅުވެފައިވާއިރު، ދެ މެޗުގައި ވެސް ފެލިކްސް ވަނީ ލަނޑު ޖަހައިފަ އެވެ. އޭނާ ބާސެލޯނާ އަށް ބަދަލުވީ އެއް އަހަރު ދުވަހުގެ ލޯނު އެއްބަސްވުމެއްގެ ދަށުންނެވެ.

އެ މެޗަށްފަހު ވާހަކަ ދައްކަމުން ފެލިކްސް ބުނީ، އޭނާ އެތުލެޓިކޯގައި ހުރި ދުވަސްވަރު ކަންތައް ހިނގައި ދިޔަ ގޮތް ކުލަބުގެ ސަޕޯޓަރުންނަށް ނޭނގޭނެ ކަމަށެވެ. އަދި ބާސެލޯނާ އަށް ބަދަލުވީ ފަހުން ބާސެލޯނާގައި ކަންތައް ހިނގަމުން ދާނެ ގޮތެއް ވެސް އެމީހުންނަށް ނޭނގޭނެ ކަމުގައި ފެލިކްސް ބުންޏެވެ. ފެލިކްސް މިހެން ބުނެފައިވާއިރު، އެތުލެޓިކޯއާ ދެކޮޅަށް ބާސެލޯނާ އިން ކުޅުނު މެޗުގައި ބައެއް ސަޕޯޓަރުން ވަނީ އޭނާއާ ދިމާކޮށްލައިފަ އެވެ.

އިތުރަށް ވާހަކަ ދައްކަމުން ފެލިކްސް ބުނީ، ސަޕޯޓަރުންގެ އިޙުސާސްތައް އޭނާ އަށް ފުރިހަމަ އަށް އިނގޭ ކަމަށާއި، އެހެން ނަމަވެސް އޭނާ އަކީ ގޯސް މީހެއްގެ ގޮތުގައި ދެކިގެން ނުވާނެ ކަމަށެވެ. ޚާއްސަކޮށް އެތުލެޓިކޯގައި ތިބި އެންމެހާ ކުޅުންތެރިންނާ، އޭނާއާ ދެމެދު އޮންނަނީ ވަރަށް ރަނގަޅު އަދި ވަރުގަދަ ގުޅުމެއް ކަމަަށް ވެސް އޭނާ ވަނީ ބުނެފަ އެވެ.

އެތުލެޓިކޯގައި ހުރުމަށްފަހު ބާސެލޯނާ އަށް ބަދަލުވެ ފެލިކްސް ވަނީ މިހާތަނަށް އެ ކުލަބަށް 34 މެޗު ކުޅެދީ އަށް ލަނޑު ޖަހައިފަ އެވެ. ބާސެލޯނާ ގައި އޭނާ އަންނަނީ މޮޅު ކުޅުމެއް ވެސް ދައްކަމުންނެވެ.