ޖިނާއީ އަދުލުގެ ނިޒާމަށް ހުރިހާ އެންމެންގެ ފުރިހަމަ އިތުބާރު އެބައޮތްތޯ ބަލަންޖެހޭކަމަށް ހޯމް މިނިސްޓަރ އަލީ އިހުސާން ވިދާޅުވެއްޖެއެވެ.
ހޯމް މިނިސްޓްރީން ބޭއްވި ނޫސްވެރިންގެ ބައްދަލުވުމުގައި އިހުސާން ވިދާޅުވީ، މި ސަރުކާރުން މަރުގެ އަދަބު ތަންފީޒު ކުރުމާ ގުޅޭގޮތުން ގެންގުޅޭ ވިސްނުން މީގެ ކުރިންވެސް ހާމަކޮށްފައިވާނެ ކަމަށެވެ. އެގޮތުން އެކަމާއި ގުޅިގެން ބަލަންޖެހޭ ގިނަ ކަންތައްތަކެއް އަދިވެސް އެބަހުރި ކަަމަށާއި، އެހެންނަމަވެސް މަރުގެ އަދަބު ތަންފީޒްކުރުމުގެ ކަންކަން ސަރުކާރުން ކުރައްވާނެކަމަށް ވަޒީރު ވަނީ ވިދާޅުވެފައެވެ.
އިހުސާން އިތުރަށް ވިދާޅުވީ މަރުގެ އަދަބު ތަންފީޒުކުރުމުގެ ކަންކަން ކުރާނީ ޤާނޫނާއި ޤަވާއިދުގެ ތެރެއިންކަމަށެވެ.
އިހުސާން އިތުރަށް ވިދާޅުވީ، ރާއްޖެއާއި ރާއްޖެއިން ބޭރުގައި އެއްކޮށް މަސައްކަތް ކުރާ ޖަމިއްޔާތަކާއި ގުޅިގެން އެންމެ ފުރަތަމަ މި ޕްރޮސަސްގެ ތެރޭގައި ކަށަވަރުކުރާ ކަމަކީ ހުކުމް ކުރެވޭ މީހާ މުޅި އަދުލުގެ ނިޒާމުގެ ތެރެއިން އޭނާއަށް ދެވެންޖެހޭ ހުރިހާ ހައްގެއް ކަށަވަރުވެފައި އޮތްތޯ ބެލުން ކަމަށެެވެ.
އަދި މުޅި ނިޒާމުގައި ހުންނަންޖެހޭ ފުރިހަމަ ކަން ޔަގީންކުރެވިފައި އޮތްތޯއާއި، އެ ނިޒާމަށް ހުރިހާ އެންމެންގެ ފުރިހަމަ އިތުބާރު އެބައޮތްތޯވެސް ބަލަން ޖެހޭކަމަށް އިހުސާން ވިދާޅުވިއެވެ.
އިހުސާން ވިދާޅުވީ، އެކަން ޔަގީން ކުރުމަކީ ސަރުކާރުން ފުރަތަމަ ކުރާނެ ކަންތައް ކަމަށެވެ.
