ގައުމީ ބާސްކެޓްބޯޅަ ލީގުގެ ފިރިހެން ޑިވިޝަންގައި ރޯޔަލް ބަސްކެޓްބޯޅަ ކްލަބުން ފުރަތަމަ މޮޅު ހޯދައިފި އެވެ.
ރޯޔަލް ފުރަތަމަ މޮޅު ހޯދީ ވާދަވެރި ކުޅުމަކަށްފަހު ސްޓިންގާސް ބާސްކެޓް ކްލަބް ބަލިކޮށްގެންނެވެ. މިއީ ފުރަތަމަ ތިން މެޗު ކުޅުނުއިރު މޮޅެއް ނުހޯދި އޮތް ދެޓީމެވެ. މޮޅެއް ނުހޯދި އޮތް ދެޓީމްގެ މެޗު ރޯޔަލް ބީސީން ކާމިޔާބުކުރީ 73-69 ޕޮއިންޓުންނެވެ. މެޗުގެ ހަތަރު ކުއާޓާގެ ތެރެއިން ތިން ކުއާޓާގައި ކުރި ހޯދީ ރޯޔަލް ބީސީން ނެވެ. ތިންވަނަ ކުއާޓާގައި ސްޓިންގާސް ބީސީން ވަރަށް ރަނގަޅަށް ކުޅެ, އެ ކުއާޓާގައި ބޮޑު ލީޑަކުން ކުރި ހޯދިއެވެ.
މެޗުގައި އެންމެ ރަނގަޅަށް ކުޅުނީ ސްޓިންގާސް ބީސީގެ އިބްރާހީމް ނައުހާން ނާއިޒު އެވެ. އޭނާ 28 ޕޮއިންޓް ހޯދައިދިނެވެ. ރޯޔަލް ބީސީ އަށް އެންމެ ގިނަ ޕޮއިންޓް ހޯދައިދިނީ މުހައްމަދު އަޔިދީން އަހުމަދު އެވެ. އޭނާ 21 ޕޮއިންޓު ހޯދައިދިނެވެ.
ލީގުގައި މިހާތަނަށް ކުޅުނު ހަތަރު މެޗުން ވެސް މޮޅުވެ އެއްވަނައިގައި އޮތީ ޓީ-ރެކްސް ބާސްކެޓް ކްލަބެވެ.
