އިސްލާމިކް ޗެރިޓީ ފަންޑުން, ކ. ގުރައިދޫގައި ހުންނަ ހާއްސަ އެހީއަށް ބޭނުންވާ މީހުންގެ މަރުކަޒަށް ޒަމާނީ މެޑިކަލް އެނދު ހަދިޔާކޮށްފިއެވެ.
އެނދުތައް ހަވާލުކުރެއްވުމަށް ބުދަ ދުވަހު ބޭއްވި ރަސްމިއްޔާތުގައި އިސްލާމިކް މިނިސްޓްރީގެ ފަރާތުން ވައުޗަރ ޙަވާލުކޮށްދެއްވީ އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދުއެވެ. އަދި މިނިސްޓްރީ އޮފް ސޯޝަލް އެންޑް ފެމިލީ މިނިސްޓްރީގެ ފަރާތުން ވައުޗަރާ ޙަވާލުވެވަޑައިގެންނެވީ މިނިސްޓަރު ޑރ. އައިޝަތު ޝީހާމެވެ.
އިސްލާމިކް ޗެރިޓީ ފަންޑުން, ކ. ގުރައިދޫގައި ހުންނަ ހާއްސަ އެހީއަށް ބޭނުންވާ މީހުންގެ މަރުކަޒަށް ހަދިޔާ ކޮށްފައިވަނީ ޖުމްލަ 32 އެނދެވެ. ފައިސާގެ ގޮތުން އެއީ ޖުމްލަ 504،000 ރުފިޔާއެވެ.
މި ރަސްމިއްޔާތުގައި ވާހަކަ ދައްކަވަމުން އިސްލާމިކް މިނިސްޓަރު ޝަހީމް ވިދާޅުވީ އިސްލާމިކް މިިނިސްޓްރީއަށް ވަރަށް ގިނަ ރައްޔިތުން އެމީހުންގެ ޚައިރާތުގެ ފައިސާ ޙަވާލު ކުރާ ކަމަށެވެ. މިސްކިތްތަކުގެ މަރާމާތަށް، ނުވަތަ ދީނީ ކަމަކަށް އެހީވުމަށް ދޭ އިރު، މިއީ ޒަކާތު ފަންޑުގެ އިތުރުން މިސްކިތްތަކާ ޢާއްމު ހެޔޮ ކަންކަމަށް ޚަރަދުކުރުމަށް ރައްޔިތުން ހަދިޔާކުރާ ޞަދަޤާތް ކަމަށެވެ. އަދި ޚާއްޞަ އެހީއަށް ބޭނުންވާ މީހުންގެ މަރުކަޒަށް އެހީތެރިކަން ދެވިގެން ދަނީ އެ ޚައިރާތުގެ ތެރެއިން ކަމަށެވެ.
މިނިސްޓަރު ވަނީ ރައްޔިތުން ޚައިރާތާއި ޞަދަޤާތުގެ ގޮތުގައި ރާއްޖެއިން ބޭރަށް ހޭދަކުރާކުރުން ރާއްޖޭގެ ކަންކަމަށް ހޭދަކުރުމަށް އެދިވަޑައިގަންނަވާފައެވެ. އަދި ނިކަމެތިންނަށާއި ޤުރުއާން ކުލާސްތަކަށާއި ޤުރުއާން މުބާރާތްތަކަށާއި ޖަމިއްޔާތަކަށާއި ރަށްރަށުގައި ލައިބްރަރީތައް ޤާއިމުކުރުމަށާއި ތައުލީމަށާއި އެހެނިހެން ހެޔޮ ކަންކަމަށް ޚަރަދު ކުރުމަށް ވަނީ އެދިވަޑައިގަންނަވާފައެވެ.
