ރަމަޟާން މަހުގެ ތެރޭގައި ރައްޔިތުންގެ މަޖިލީހުގެ އިންތިޚާބު ބޭއްވި ނަމަވެސް، އިންތިޚާބާ ގުޅިގެން އެ މަހުގައި ރައްޔިތުންނާއި ގުޅުން ހުރި ކަމަކަށް ހަމައެކަނި އޮންނާނީ ވޯޓުލުން އެކަނި ކަމަށް އިލެކްޝަންސް ކޮމިޝަންގެ ސެކްރެޓަރީ ޖެނެރަލް ހަސަން ޒަކަރިއްޔާ ވިދާޅުވެއްޖެއެވެ.

ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން ހަސަން ޒަކަރިއްޔާ ވިދާޅުވީ އިންތިޚާބާއި ގުޅިގެން ރައްޔިތުންނާއި ގުޅުން ހުރި އެންމެ ކަމެއް ފިޔަވައި އިތުރުކަމެއް ރަމަޟާން މަހުގެ ތެރޭގައި ނުކުރާނެ ކަމަށެވެ. އެގޮތުން އިންތިޚާބާ ގުޅިގެން ރޯދަ މަހުގައި ރައްޔިތުން ކުރަންޖެހޭނެ ހަމައެކަނި ކަމަކީ ވޯޓުލުން ކަމަށާއި، އެހެން ހުރިހާ ކަމެއް ރަމަޟާން މަސް އައުމުގެ ކުރިން ނިންމާނެ ކަމަށެވެ.

ހަސަން ވިދާޅުވީ ރަމަޟާން މަހުގެ ތެރޭގައި އާންމު ރައްޔިތުންގެ އިންތިޚާބުގެ އެކި ކަންކަމުގައި އަދި އިލެކްޝަންސް ކޮމިޝަންގެ ޚިދުމަތް ހޯދުމުގައި އުޅެންވެއްޖެނަމަ ވަރަށް ބޮޑު ދަތިތަކެއް ދިމާވާނެކަމަށް ގަބޫލުކުރެވޭ ކަމަށެވެ.

ހަސަން ވިދާޅުވީ ރަށްވެހިކަން ބަދަލުކުރުމާއި، އެޑްރެސް ބަދަލުކުރުމުގެ ވަރަށް ގިނަ މަސައްކަތްތަކެއް ކައުންސިލްތަކުގައި ހިނގަމުންދާ ކަމަށެވެ. އަދި އެކަމާއި ގުޅޭ މައުލޫމާތުތައް ކަމާގުޅޭ އިދާރާތަކުން ލިބެމުން އަންނަ ކަމަށާއި، އަދި ލިޔެކިޔުންތައް ވެސް ލިބެމުން އަންނަ ކަމަށެވެ.

ހަސަން ވިދާޅުވީ ލިސްޓު އާންމުކުރި ފަހުން އެއްވެސް މީހަކު ރަށްވެހިކަން ބަދަލުކޮށްފައި އޮތް ނަމަ ނުވަތަ ދިރިއުޅޭ އެޑްރެސް ބަދަލުކޮށްފައި އޮތްނަމަ އަދި ލިސްޓާ އަޅާކިޔާ މައުލޫމާތު ދިމާނުވާނަމަ، އެކަމަށް ބޭނުންވާ ރަސްމީ ލިޔެކިޔުމާއެކު އިލެކްޝަންސް ކޮމިޝަނަށް ޝަކުވާ ހުށަހެޅުމަށެވެ. އޭނާ ވިދާޅުވީ ލިސްޓު އިސްލާހު ކުރެވޭނީ އެއިރުން ކަމަށާއި، އެހެން ނޫންނަމަ ލިސްޓު އާންމުކުރި އިރު އޮންނަ އެޑްރެހުގައި އަދި ރަށެއްގައި އެ މީހެއްގެ ނަން ވޯޓުލުމާ ހަމައަށް އޮންނާނެ ކަމަށެވެ.

ހަސަން ވިދާޅުވީ ކެންޑިޑޭޓުންގެ ބޭންކް އެކައުންޓް ހުޅުވުމަށް މިހާރު އިއުލާންކޮށްފައިވާނެ ކަމަށާއި، ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުން ކުށުގެ ރެކޯޑް ސާފުކުރަން ބޭނުންވާ ފަރާތްތަކުން މިހާރުން ފެށިގެން ކުށުގެ ރެކޯޑް ސާފުކުރަމުން ގެންދެވޭނެ ކަމަށެވެ.