އަދި މިހާތަނަށް ރައީސް ޑރ. މުޙައްމަދު މުޢިއްޒުގެ ސަރުކާރަށް އައު ކަމެއް ނުކުރެވޭ ކަމަށާއި، މި ސަރުކާރުން މިހާތަނަށް އިޢުލާންކުރި ހުރިހާ ކަމަކީ ވެސް އެމްޑީޕީގެ ސަރުކާރުން ފެށި ކަންކަން ކަމަށް، ކުރީގެ ރައީސް އަދި އެމްޑީޕީގެ ރައީސް އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
މާލެ ސިޓީ ކައުންސިލުގެ މޭޔަރުކަމަށް ވާދަކުރައްވާ އާދަމް ޢާޒިމްގެ ކެމްޕޭން ނިންމުމުގެ ޖަލްސާގައި ބުރާސްފަތި ދުވަހުގެ ރޭ ސަލްޓަން ޕާކުގައި ހުންނަވައި ރައީސް ޞާލިޙް ވިދާޅުވީ، މި ސަރުކާރުން މާލޭގެ ރައްޔިތުންނަށް ވީ ވައުދުތައް އޮތީ ނުފުއްދިފައި ކަމަށާއި، މި ސަރުކާރުން މިހާތަނަށް އަލަށް ކުރި ކަމަކީ ފުށިދިއްގަރު ފަޅު ހިއްކުން އެކަނި ކަމަށެވެ.
އެ ޕްރޮޖެކްޓުގެ އިތުރަށް، މި ސަރުކާރުން ކުރަން އިޢުލާންކުރި ހުރިހާވެސް ކަމަކީ ރައީސް ޞާލިޙުގެ ވެރިކަމުގައި ފަށަން ތައްޔާރުވެފައިވާ މަސައްކަތްތައް ކަމަށެވެ. އެގޮތުން ބޯން މެރޯ ހެދުމާއި ޑްރޯނުގައި ބޭސް އުފުލުމަކީ ވެސް މިދިޔަ ސަރުކާރުގައި ފެށި ކަމެއްކަން ރައީސް ޞާލިޙު ފާހަގަކުރެއްވިއެވެ.
މާލޭގެ ރައްޔިތުންނަށް ވީ ވައުދުތައް އޮތްތާ އޮތީ. ކުރައްވަނީ އެހެން ކަމެއް. އަދި މިހާތަނަށް މި ސަރުކާރުން ޕްރޮޖެކްޓްތައް އިޢުލާންކުރިއިރު، އާ ކަމެއް ނެތް ކޮށްފައެއް. ހަމަ އެކަނި ކޮންމެވެސް މިތާ އޮތް ފަޅެއް ހިއްކާ ވާހަކަ އެކަނި، އަލަށް ކަމެއް ކުރަން އިއުލާންކޮށްފަ އޮތީ. ދެން އެހެން ނޫނިއްޔާ ބޯން މެރޯ ހެދުންކަމަށް ވިޔަސް، ޑްރޯނުގަ ބޭސް އުފުލުން ކަމަށް ވިޔަސް، އަދި އެ ނޫން ވެސް ދެން ހުރި ހުރިހާ ކަމަކީ ނިމިދިޔަ އަޅުގަނޑުމެންގެ ސަރުކާރުގަ ފައްޓަން ތައްޔާރުވެ، ނިމިފަ ހުރި ކަމެއް. އާ އެއްވެސް ކަމެއް އަޅުގަނޑަކަށް އަދިއެއް ނުފެނޭ.ކުރީގެ ރައީސް އަދި އެމްޑީޕީގެ ރައީސް އިބްރާހީމް މުޙައްމަދު ޞާލިޙް
ރައީސް ވިދާޅުވީ އެ ހުރިހާ ކަމަކާ ވިސްނުމަށްފަހު، ހޮނިހިރު ދުވަހު އޮންނަ އިންތިޚާބުގައި މާލޭގެ ރައްޔިތުން އެމްޑީޕީގެ ކެންޑިޑޭޓް އާދަމް ޢާޒިމަށް ވޯޓު ދެއްވުމަށެވެ.
ރިޔާސީ އިންތިޚާބުގެ ދެވަނަ ބުރުގެ ކެމްޕޭނު ނިންމާލުމުގެ ޖަލްސާގެ ފަހުން ރައީސް ޞާލިޙް، އެމްޑީޕީގެ ޕޯޑިއަމަކުން ފެނުނު މިއީ ފުރަތަމަ ފަހަރެވެ.
