ރާއްޖޭގެ ގިނަ އަދަދެއްގެ ރައްޔިތުންގެ މަސްލަހަތާ ގުޅިފައިވާ ބޮޑު މައްސަލައަކާ ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒު މި ވަނީ ގޮތް ނިންމަވައި އެކަން ހާމަކުރައްވާފައެވެ. ގޯއްޗާއި، ފްލެޓު ދެއްވާނެކަމުގެ ޔަގީންކަން ގައުމުގެ ވެރިޔާ ދެއްވުމަކީ ގިނަ ރައްޔިތުން އެކަން ގަބޫލުކުރާނެ ކަމެކެވެ. 02 ޖެނުއަރީ 2024 ވީ ދުވަހު ރައީސް މުއިއްޒު އެކްސްގައި ކުރެއްވި ފޯސްޓުގައި ވިދާޅުވެފައިވަނީ، ގޯތި އަދި ފްލެޓް ލިބޭނެކަމަށް ފައިނަލް ލިސްޓުގައި ހިމެނި ގެޒެޓްކޮށްފައިވާ ފަރާތްތަކަށް ރަޖިސްޓްރީ ހަދައިދީ ގޯއްޗާއި ފްލެޓް، ވެވަޑައިގެންނެވި ވައުދާ އެއްގޮތަށް ކުރިއަށްދާނެ ކަމެއް ކަމަށެވެ. މި ހަފުތާއާއި މިއަންނަ ހަފުތާ ތެރޭގައި ރަޖިސްޓްރީ ހަވާލުކޮށް ނިންމުމުގެ މަސައްކަތް ހައުސިންގ މިނިސްޓްރީން ކުރިއަށްގެންދާނެ ކަމަށް ރައީސް މުއިއްޒު ވިދާޅުވިއެވެ.

ރައީސް މުއިއްޒު މިހެން ވިދާޅުވިއިރު، ގެދޮރުވެރިޔާ ސްކީމުގެ ދަށުން ދޫކުރާ ފްލެޓުތަކުގެ މައްސަލަ ނުނިމި ލަސްވާތީ އެންޓި ކޮރަޕްޝަން ކޮމިޝަން (އޭސީސީ)އަށް އެއްވެ ގިނަ އަދަދެއްގެ އާއްމު ރައްޔިތުން ދިޔައީ ނުރުހުން ފާޅުކޮށް މުޒާހަރާ ކުރަމުންނެވެ. އޭސީސީ މިމައްސަލަ ދިގުދަންމާތީ ގިނަ އަދަދެއްގެ ރައްޔިތުންގެ ހައްގު ގެއްލޭކަމަށް ގިނަ ބަޔަކު ދަނީ ބުނަމުންނެވެ. ޕޯޓަލްގެ އެކްސެސް 10 ޑިސެންބަރު 2023ގައި ލިބިފައިވާއިރު، މިމައްސަލާގެ އެންމެ ފަހުގެ މައުލޫމާތު ހިއްސާކުރަންޖެހޭ ކަމަށާއި، ދިގުދެމިގެންދާ ކޮންމެ ދުވަހަކީ ހާލަތު ބަދަލުވާނެ ދުވަހެއް ކަމަށް އެފަރާތްތަކުން ބުނެއެވެ.

ނަމަވެސް ދެ ހަފުތާތެރޭގައި ފްލެޓް ދޭނެކަމަށް ރައީސް މުއިއްޒު ވިދާޅުވުމާ ގުޅިގެން ގިނަ ބަޔަކު އެކަމާ އުފާކޮށް، އެކަން ގަބޫލުކުރިއެވެ. އަދި އެތައް ބަޔަކު އެކަމާ ސުވާލުވެސް އުފެއްދިއެވެ. އޭސީސީން މައްސަލަ ބަލަމުންދަނިކޮށް، ރައީސް މުއިއްޒު ވިދާޅުވިގޮތަށް ފްލެޓް ދޫކުރާނެތޯ ނުވަތަ ރައީސް އެކަން އެކްސްގައި ހިއްސާކުރެއްވިއިރު، އޭސީސީން މައްސަލަ ބަލަމުންދާކަން އެމަނިކުފާނަށް އެނގިވަޑައިނުގަންނަވަނީތޯ ވެސް ގިނަ ބަޔަކު ސުވާލު އުފައްދާފައިވެއެވެ. މީގެ އިތުރުން ދެ ހަފުތާތެރޭގައި ފްލެޓުގެ މައްސަލަ އޭސީސީން ނިންމައި ފްލެޓުތައް ދޫކުރާނެ ކަމާމެދުވެސް ސުވާލު އުފައްދާފައިވެއެވެ.

ކަންމިހެން އޮތްނަމަވެސް ބިންވެރިޔާ ސްކީމުގެ ދަށުން މާލޭ ސަރަހައްދުން ގޯއްޗަށް އެދި ހުށަހަޅާފައިވާ ފަރާތްތަކުގެ ތެރެއިން، ގޯތީގެ އެއްބަސްވުމާއި ގޯތީގެ ރަޖިސްޓަރީ ހަވާލުކުރެވިފައި ނުވާ ފަރާތްތަކަށް، އެއްބަސްވުމުގައި ސޮއިކުރުމާގުޅޭ މަސައްކަތްތައް، ގެދޮރުވެރިކަމާބެހޭ ވުޒާރާއިން މިމަހުގެ 03 ވަނަ ދުވަހު މި ވަނީ ފަށާފައެވެ. ރައީސް ވިދާޅުވި ފްލެޓްތަކުގެ މަސައްކަތްތައް ކުރިއަކަށް ނުގެންދެއެވެ.

ރައްޔިތުންތަކެއް ވާނުވާގައި ތިބިއިރު އިތުރަށް ގެދޮރުވެރިކަމާބެހޭ ވަޒީރު މި ވަނީ މިކަން އިތުރަށް ސާފުކޮށްދެއްވާފައެވެ. ވަޒީރު ޑރ. އަލީ ހައިދަރު އަހުމަދު ވިދާޅުވީ، ފްލެޓް ލިބުނު މީހުންނަށް ލިޔުން ދޭންފަށާނީ އޭސީސީގެ ތަހުގީގު ނިންމައި ވަކި ގޮތެއް އެންގުމުން ކަމަށެވެ. އެހެންކަމުން ރައީސް ވިދާޅުވިގޮތަށް ގޯތި ދޫކުރުމުގެ މަސައްކަތް ކުރިއަށް ދިޔަނަމަވެސް ފްލެޓުގެ މަސައްކަތްތައް ކުރިއަށް ނުދާނެކަން މިހާރު މި ވަނީ ކަށަވަރުކުރެވިފައެވެ.

މިފަދަ ހައްސާސީ މައްސަލައެއްގައި ރައީސް މުއިއްޒު ގިނަ އަދަދެއްގެ ރައްޔިތުންނަށް އުންމީދު ގެނެސްދެއްވުމަށްފަހު މިވަނީ ނާއުންމީދު ކޮށްލައްވާފައެވެ. ގިނަބަޔަކު މިކަމާ ނުރުހުން ފާޅުކުރަމުންދާއިރު، ރައީސް ވިދާޅުވާ ބަސްފުޅުގައި ނުވަތަ އެކްސްގައި ކުރައްވާ ޕޯސްޓެއްގައި އެއްވެސް ބުރަދަނެއް ނުހުންނަނީތޯއެވެ؟ އަނެއްކާވެސް ރައްޔިތުންނަށް އޮޅުވާލެއްވުމަށް މަސައްކަތް ކުރައްވަނީތޯއެވެ؟

ބައެއް މީހުން ބުނާގޮތުންނަމަ، ރައީސް މުއިއްޒު އެކްސްގައި ކުރެއްވީ ވަރަށް ދޯހަޅި ޕޯސްޓެކެވެ. އެހެންކަމުން މިހާރު އެމަނިކުފާނު ވިދާޅުވާ ބަސްފުޅުގެ ކަށަވަރުކަން ޔަގީންކުރުމަށް، ރައީސް އޮފީހުން ނުވަތަ އެކަމާގުޅޭ ވުޒާރާއަކުން ބަސް ހޯދައި، ޔަގީންކުރަންޖެއެވެ. ރައީސް މުއިއްޒުގެ އަމަލުފުޅުތަކުގެ ސަބަބުން މިއަދު ރާއްޖޭގެ ރައީސް އެކްސްގައި ކުރައްވާ ޕޯސްޓުތަކުގެ ނުވަތަ ވިދާޅުވާ ބަސްފުޅުތައް އަގެއް ނެތް އެއްޗަކަށްވެ ނިމެނީއެވެ.