މެމްބަރުންނަށް ބޮޑެތި އޮފަރތަކެއް ހުށަހެޅިކަމުގެ އަޑު ފެތުރިފައި ވަނިކޮށް، 13 މެމްބަރަކު އެމްޑީޕީ ދޫކުރައްވައި ޕީއެންސީއަށް ސޮއިކުރައްވައިފިއެވެ.
ޕީއެންސީއަށް ސޮއިކުރެއްވި މެމްބަރުންނަކީ
1 - މަރަދޫ ދާއިރާގެ މެމްބަރު އިބްރާހީމް ޝަރީފް
2 - މައްޗަންގޮޅީ ދެކުނު ދާއިރާގެ މެމްބަރު މުހައްމަދު ހައިތަމް
3 - ފޭދޫ ދާއިރާގެ މެމްބަރު މުހައްމަދު ނިހާދު
4 - އިސްދޫ ދާއިރާގެ މެމްބަރު އަލީ ހަމީދު
5 - ކުރެންދޫ ދާއިރާގެ މެމްބަރު އަބްދުލްޣަނީ
6 - ކަނޑިތީމު ދާއިރާގެ މެމްބަރު އަބްދުﷲ ޝަހީމް އަބްދުލްހަކީމް
7- މަތިވެރީ ދާއިރާގެ މެމްބަރު ހަސަން ޒަރީރް
8 - މުލަކު ދާއިރާގެ މެމްބަރު އިބްރާހީމް ނަސީރު
9- ނިލަންދޫ ދާއިރާގެ މެމްބަރު އަބްދުލް މުހްސިން ހަމީދު
10- ގުރައިދޫ ދާއިރާގެ މެމްބަރު އިބްރާހީމް ޝާޒް
11- ތޮއްޑޫ ދާއިރާގެ މެމްބަރު ހަސަން ޝިޔާން
12- ކޮމަންޑޫ ދާއިރާގެ މެމްބަރު އިބްރާހީމް ރާޝިދު، އަދި
13- މާފަންނު ދެކުނު ދާއިރާގެ މެމްބަރު އާދަމް އަލީއެވެ.
ދަރުބާރުގޭގައި ޕީއެންސީން ބޭއްވި ޖަލްސާގައި ޕީއެންސީއަށް ސޮއިކޮށް ހަވާލުކުރެއްވީ ރައީސް ޑރ. މުހައްމަދު މުއިއްޒާއި ޕީއެންސީގެ ޗެއާޕާސަން އަބްދުއްރަހީމް އަބްދުﷲ އާއިއެވެ.
މި މެމްބަރުންގެ ތެރެއިން ޝަރީފް ވަނީ މި ހަފުތާތެރޭގައި އޭނާ ރިޓަޔަރކުރެއްވީ ކަމަށާއި، ސިޔާސީ ކަންކަމަށް ޝައުގުވެރިކަން ނެތްކަމަށް ވިދާޅުވެފައެވެ. އަދި އިތުރު ސިޔާސީ ޕާޓީއަކަށް ސޮއިނުކުރައްވާނެ ކަމަށް ރާއްޖެ އެމްވީއަށް މައުލޫމާތުދެއްވަމުން ވިދާޅުވިއެވެ. އަދި ކޮމަންޑޫ ދާއިރާގެ މެމްބަރު މުހައްމަދު ރާޝިދު (ރާޑޯ)އަކީ އެމްޑީޕީގެ ސިޔާސަތުތައް ޕްރޮމޯޓްކޮށްގެން، އެމްޑީޕީގެ ބުރަ މަސައްކަތްތަކާއެކު ހޮވި މެމްބަރެކެވެ. އަދި ދެން ތިބި ގިނަ މެމްބަރުންނަކީ މި ސަރުކާރަށް ވަރަށް ބޮޑަށް ފާޑުވިދާޅުވާ މެމްބަރުންނެވެ. އަދި އެއީ މި ސަރުކާރާ ދެކޮޅަށް އެންމެ ބޮޑަށް ވަކާލާތުކުރައްވާ މެމްބަރުންގެ ތެރޭގައި ހިމެނޭ މެމްބަރުންވެސް ޕީއެންސީއަށް ސޮއިކުރެއްވި މެމްބަރުންގެ ތެރޭގައި ހިމެނިވަޑައިގަންނަވައެވެ.
އަޑުފެތުރިފައި ވާގޮތުން، ޕީއެންސީއަށް ސޮއިކޮށްފިނަމަ 1 މިލިއަނާ 3 މިލިއަނާ ދެމެދުގެ އަދަދަކަށް ފައިސާ ދޭނެކަމަށާއި، ސަރުކާރުގެ އިސް މަގާމުތައް ދޭނެކަމަށް ބުނެ، ސަރުކާރުގައި ހިމެނޭ މީހުންގެ ފަރާތުން ވަނީ މެމްބަރުންނަށް ހުށަހެޅުންތައް ހުށަހަޅާފައެވެ. އަދި ބައެއް ދާއިރާތަކުގައި ހުރި މަޝްރޫއުތައް ކުރިއަށް ގެންގޮސްދޭނީ ޕާޓީ ބަދަލުކުރުމުން ކަމަށް ބުނެ މެމްބަރުންނަށް ހުށަހެޅުންތައް ހުށަހަޅާފައިވާކަމަށް ވަނީ އަޑުފެތުރިފައެވެ.
