ސްޕެނިޝް ލީގުގެ ސެވިއްޔާގެ ކޯޗުކަމުން އުރުގުއޭގެ ޑިއޭގޯ އަލޮންސޯ ވަކިކޮށްފިއެވެ.

ސެވިއްޔާގެ ކޯޗުކަމުން އަލޮންސޯ ވަކި ކުރީ ސްޕެނިޝް ލީގުގައި ގެޓާފޭއާ ދެކޮޅަށް ކުޅުނު މެޗުން ބަލިވުމުންނެވެ. އޭގެ ކުރިން ވެސް އޭނާގެ އިރުޝާދުގެ ދަށުން އެ ޓީމަށް ނަތީޖާ ނުނެރެވެއެވެ. އެކަމުގެ ސަބަބުން އަލޮންސޯ އަށް ޕްރެޝަރު ބޮޑުވެފައިވާ ކަމަށް މީޑިއާތަކުން އޮތީ ރިޕޯޓުކޮށްފައެވެ.

ސެވިއްޔާގެ ކޯޗުކަމަށް އަލޮންސޯ ހަމަޖެއްސީ މި އަހަރުގެ އޮކްޓޫބަރު މަހުގެ ތެރޭގައެވެ. އޭނާގެ އިރުޝާދުގެ ދަށުން ސެވިއްޔާ ކުޅުނީ 14 މެޗެވެ. އޭގެ ތެރެއިން އެ ޓީމު މޮޅުވީ އެންމެ ދެ މެޗުންނެވެ. ހަތް މެޗުން ބަލިވެފައިވާއިރު، ފަސް މެޗުން ވަނީ އެއްވަރުވެފައެވެ. މީގެ ދުވަސްކޮޅެއް ކުރިން އެ ޓީމު ވަނީ ޔުއެފާ ޗެމްޕިއަންސް ލީގުން ވެސް ކަޓައިފައެވެ. ސެވިއްޔާ ހިމެނުނު ގުރޫޕުން އެ ޓީމު ދިޔައީ ވެސް އެންމެ ފުލަށެވެ. ސްޕެނިޝް ލީގުގައި މިހާތަނަށް ކުޅުނު 16 މެޗުން 13 ޕޮއިންޓާއެކު އެ ޓީމު އޮތީ ވެސް 16 ވަނައިގައެވެ. ނަތީޖާތައް ދަށްވެ، ސެވިއްޔާ އަށް އޮތީ ރެލިގޭޝަންގެ ބިރު ވެސް ބޮޑުވެފައެވެ.

ސެވިއްޔާގެ ކޯޗުކަމާ ހަވާލުވުމުގެ ކުރިން، އެންމެ ފަހުން އޭނާ ހުރީ އުރުގުއޭ ޤައުމީ ޓީމުގެ ކޯޗުކަމުގެ މަގާމުގައެވެ. މިދިޔަ އަހަރު ޤަތަރުގައި ކުރިއަށް ދިޔަ ފީފާ ވޯލްޑް ކަޕް މުބާރާތަށްފަހު އޭނާ ވަނީ މަގާމުން ވަކިވެފައެވެ. އޭނާ މަގާމުން ވަކިވީ ވެސް ކުލަބު ފުޓުބޯޅަ އަށް އަންނަ ބޭނުންވެގެންނެވެ.