ހަމާލާ ބަދަލުކުރުން ހުއްޓާލުމަށް އެއްބަސްވެ، އިސްރާއީލާއި ހަމާސްއާ ދެމެދު ވެފައިވާ އެއްބަސްވުމުގެ ދަށުން އާދިއްތަ ދުވަހު ވެސް ރަހީނުން ބަދަލުކުރަން ހަމަޖެހިއްޖެއެވެ.

މި އެއްބަސްވުމުގެ ދަށުން އިސްރާއީލުން ވަނީ ހަތަރު ދުވަހުގެ މުއްދަތަކަށް ޣައްޒާއަށް ހަމަލާދިނުން މެދުކަނޑާލާފައެވެ.

ހުކުރު ދުވަހުން ފެށިގެން މި އެއްބަސްވުމަށް އަމަލުކުރަން ވަނީ ފަށާފައެވެ. އެގޮތުން، އޮކްޓޫބަރު 7 ވަނަ ދުވަހު، ހަމާސުން ރަހީނުކުރި މީހުންގެ ތެރެއިން އިސްރާއީލުގެ 24 މީހުން ދޫކޮށްލުމުން، ބަދަލުގައި އިސްރާއީލުން ވަނީ އެ މީހުން ހައްޔަރުކޮށްފައިވާ ފަލަސްތީނުގެ 39 މީހުން މިނިވަންކޮށްފައެވެ.

ހޮނިހިރު ދުވަހު ހަމާސުން ވަނީ އެމީހުން ހައްޔަރުކުރި މީހުންގެ ތެރެއިން އިސްރާއީލުގެ މީހުން ދޫކޮށްލުން ލަސްކޮށްފައެވެ. ހަމާސުން މިނިވަން ކުރަން ހަމަޖެހިފައިވާ އިސްރާއީލުގެ 13 މީހުންނާއި ތައިލޭންޑުގެ ހަތަރު މީހުން ދޫކޮށްލާފައި ވަނީ އާދިއްތަ ދުވަހުގެ ވަގުތެއްގައެވެ. އިިސްރާއީލުން ވަނީ އެމީހުން ހައްޔަރުކޮށްފައިވާ ފަލަސްތީނުގެ ރައްޔިތުންގެ ތެރެއިން އިތުރު 39 މީހުން މިނިވަންކޮށްފައެވެ.

އާދިއްތަ ދުވަހު އިތުރު ރަހީނުން ބަދަލުކުރަން ވެސް ވަނީ ހަމަޖެހިފައެވެ. އެގޮތުން ހަމާސުން މިނިވަން ކުރަން ހަމަޖެހިފައިވާ ތިން ވަނަ ގްރޫޕްގެ ލިސްޓު މިހާރު އިސްރާއީލަށް ލިބިފައިވާކަމަށް އެ ގައުމުގެ ބޮޑުވަޒީރުގެ އޮފީހުން ވަނީ ބުނެފައެވެ. އަދި އެ ލިސްޓު ޗެކްކޮށް އާއިލާތަކަށް އަންގާނެކަމަށް ވެސް ވަނީ ބުނެފައެވެ.

އެއްބަސްވެފައިވާ ހަތަރު ދުވަހުގެ ތެރޭގައި ހަމާސުން ހައްޔަރުކޮށްފައިވާ އިސްރާއީލުގެ މީހުންގެ ތެރެއިން 50 މީހުން މިނިވަން ކުރުމަށް ވަނީ އެއްބަސްވެފައެވެ. އަދި އެމީހުންގެ ބަދަލުގައި އިސްރާއީލުން ހައްޔަރުކޮށްފައިވާ ފަލަސްތީނުގެ ރައްޔިތުންގެ ތެރެއިން 150އެއްހާ މީހުން ދޫކޮށްލަން ވަނީ އެއްބަސްވެފައެވެ.

މި އެއްބަސްވުމުގައި އިސްރާއިލާއި ހަމާސުން ސޮއިކޮށްފައި ވަނީ ނިމުނު ހަފުތާގައެވެ. އެއްބަސްވުމުގައި ސޮއިކުރިފަހުން ވެސް، އެއްބަސްވެފައިވާ ގަޑި ޖެހެންދެން، ހުކުރު ދުވަހާ ހަމައަށް އިސްރާއީލުން ވަނީ ޣައްޒާއަށް ވަރުގަދަ، ގިނަ ހަމަލާތަކެއް ދީފައެވެ.

ހަމަލާ ބަދަލުކުރުން ވަގުތީގޮތުން ހުއްޓާލާފައި މިވަނީ ގާތްގަނޑަކަށް 50 ދުވަހު ހުއްޓުމެއްނެތި އިސްރާއީލުން ދިން ހަމަލާތަކުގައި ޣައްޒާގެ 15،000ށްވުރެ ގިނަ މީހުން މަރުވެފައި ވަނިކޮށެވެ. މީގެ ތެރޭގައި ގިނައީ އަންހެނުންނާއި ކުޑަކުދިންނެވެ.