ރައްޔިތުންގެ މަޖިލީހުގެ ހައިބަތާއި ޤަދަރު ހިފެހެއްޓުމަށް ޚާއްސަކޮށްގެން، މެންބަރުންގެ ސުލޫކީ މިންގަނޑުތަކެއް ކަނޑައެޅުމަށް ވިސްނަވަމުންގެންދަވާކަމަށް ރައްޔިތުންގެ މަޖިލީހުގެ ރައީސް، ހިތަދޫ އުތުރު ދާއިރާގެ މެންބަރު މުޙައްމަދު އަސްލަމް ވިދާޅުވެއްޖެއެވެ.

ބުރާސްފަތި ދުވަހު އޮތް ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން އަސްލަމް ވިދާޅުވީ، ރައްޔިތުންގެ މަޖިލީހަށް ރައްޔިތުންގެ އިތުބާރާއި ޔަޤީންކަން އޮންނަންޖެހޭ ކަމަށާއި، ނަމަވެސް ގިނަ ފަހަރު ކަންކަން ހިނގާ ގޮތުން މަޖިލީހަށް އެކަމުގެ ބަދުނާމު ލިބޭކަމަށެވެ.

ވުމާއެކު، މަޖިލިސް އިތުރަށް ހަރުދަނާ ކުރެއްވުމަށް ކުރިއަށް އޮތްތަނުގައި ބައެއް ބަދަލުތައް ގެންނަވަން ވިސްނަވާފައިވާކަމަށް އަސްލަމް ވިދާޅުވިއެވެ. އެގޮތުން މެންބަރުންގެ ސުލޫކީ މިންގަނޑުތަކެއް ހުންނަންޖެހޭކަން އަސްލަމް ފާހަގަ ކުރައްވާފައިވެއެވެ.

އަސްލަމް ވިދާޅުވީ، އެކަމަށްޓަކައި މަޖިލީހުގެ އުސޫލުތަކާއި ޤަވާއިދުތަކަށް ގެންނަންޖެހޭ އިސްލާޙުތަކެއް ގެނައުމަށް ކުރަންޖެހޭ މަސައްކަތްތައް ކުރައްވާނެކަމަށެވެ.

މިސާލަކަށް މުސާރަ ކެނޑުން ފަދަ ފިޔަވަޅުތައް އެޅުމާއި، ކޮމިޓީގެ މުޤައްރިރުންނާއި، މަޖިލީހުގެ ރައީސް އަދި ނާއިބްރައީސް ފަދަ އިސް މަޤާމުތަކުގައި ތިއްބަވާ މެންބަރުން ޒިންމާދާރު ކުރުވުމަށް އިތުރު ފިޔަވަޅުތަކެއް އެޅުމަކީ ކުރެވިދާނެ ކަމެއްކަމަށް އަސްލަމް ވިދާޅުވިއެވެ.

އަސްލަމް ވިދާޅުވީ، ބައެއް ކަންކަން ނުކުރެވިގެން ދަނީ ޤާނޫނާއި ޤަވާއިދު ނެތިގެން ވެސް ނޫން ކަމަށާއި، ބައެއް ކަންކަން ޤާނޫނު އޮވެމެ ނުހިނގާ ހުންނަކަމަށެވެ. އެކަންކަމުގެ ސަބަބުން މަޖިލީހުގެ ހައިބަތާއި ޤަދަރު ކުޑަވެގެންދާކަމަށް ވެސް އަސްލަމް ވިދާޅުވިއެވެ.

އަމާޒަކީ މުޅި މަޖިލީހަކީ ވެސް ރައްޔިތުންގެ އިތުބާރު ލިބިފައިވާ ޤަދަރުވެރި ތަނަކަށް ހެދުންކަމަށް އަސްލަމް ވިދާޅުވިއެވެ.