ސްޕެއިންގެ ގައުމީ ޓީމްގެ އަންހެން ކުޅުންތެރިއަކަށް ބޮސް ދިން މައްސަލާގައި އެގައުމުގެ ފުޓްބޯޅަ ފެޑެރޭޝަންގެ ކުރީގެ ރައީސް ލުއިސް ރުބިއާލޭސް ތިން އަހަރަށް ސަސްޕެންޑް ކޮށްފިއެވެ.
މައްސަލަ ބެލުމަށްފަހު ފީފާއިން ރުބިއާލޭސް ސަސްޕެންޑްކުރީ ފުޓްބޯޅައިގެ ހުރިހާ ހަރަކާތްތަކަކުންނެވެ. ރުބިއާލޭސް އަށް ސަސްޕެންޝަން މިއައީ އަންހެން ވަރލްޑްކަޕް ހޯދި ސްޕެއިން ކުޅުންތެރިންނަށް ތަށްޓާއި މެޑަލް ދިނުމުގެ ރަސްމިއްޔާތުގައި ފޯވާޑް ޖެނީ ހާމޯސޯގެ ބޮސްދިނުމުންނެވެ. އެމައްސަލާގައި ފާޑުކިއުންތައް އަމާޒުވާން ފެށުމުން ރުބިއާލޭސް ބުނީ އެއީ އުފާފާޅުކުރުންތަކުގެ ތެރެއިން ގޯސް ނިޔަތެއް ނެތި, ބޭއިހުތިޔާރުން ކުރެވުނު ކަމެއް ކަމަށެވެ. އެކަމާ ގުޅިގެން ކުރިމަތިވި ފާޑުކިއުންތަކުގެ ޕްރެޝަރުގައި ރުބިއާލޭސް ފެޑެރޭޝަންގެ ރައީސްކަމުން އިސްތިއުފާ ދިނީ ސެޕްޓެމްބަރު މަހުއެވެ. ފަހުން ހާމޯސޯ ރުބިއާލޭސްއާ ދެކޮޅަށް ވަނީ މައްސަލަ ހުށަހަޅާފައެވެ.
ފީފާއިން ރުބިއާލޭސް އަށް ފިޔަވަޅު އެޅީ ޑިސިޕްލިނަރީ ކޯޑްގެ 13 ވަނަ މާއްދާގެ ދަށުންނެވެ. ރިޕޯރޓްތައް ބުނާގޮތުން ރުބިއާލޭސްގެ ވިސްނުމަކީ މި އަދަބު އިސްތިއުނާފް ކުރުމެވެ.
