ފުލަމްގެ ކޯޗު މާކޯ ސިލްވާ، އެކުލަބުގެ އެއްބަސްވުން އައު ކޮށްފި އެވެ.

ފުލަމް އިން ވަނީ އުމުރުން 46 އަހަރުގެ ސިލްވާ އެކުލަބުގެ އެއްބަސްވުން އައު ކުރިކަން ރަސްމީކޮށް އިއުލާން ކޮށްފަ އެވެ. ފުލަމްގެ އެއްބަސްވުން ސިލްވާ އައު ކޮށްފައި ވަނީ އިތުރު ދެ އަހަރު ދުވަހަށެވެ. 2021 ވަނަ އަހަރު އޭނާ ފުލަމްއާ ހަވާލުވީ ތިން އަހަރު ދުވަހުގެ އެއްބަސްވުމެއްގެ ދަށުންނެވެ. އެ އެއްބަސްވުމުގެ މުއްދަތު ހަމަވާން އޮތީ އަންނަ އަހަރުގެ ޖޫން މަހުގެ ނިޔަލަށެވެ. ނަމަވެސް، މިހާރު އޭނާ ސޮއި ކުރި އައު އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ.

ފުލަމްގެ އައު އެއްބަސްވުމުގައި ސޮއި ކުރުމަށްފަހު ސިލްވާ ބުނީ، ފުލަމް އިން އޭނާއާ ހަވާލު ކުރި މަސައްކަތް އެއްކޮށް ނުނިމޭ ކަމަށެވެ. އޭނާ ބުނީ ފުލަމްއާއެކު ހޭދަކުުރެވުނީ ކާމިޔާބު ދެ ސީޒަން ކަމަށާއި، ކުލަބުން ހާސިލް ކުރަން ބޭނުންވާ ކަންކަން އަދި ވެސް ހުރި ކަމަށެވެ. އެހެންކަމުން އޭނާގެ ހުރިހާ ވަގުތަކާއި، އިސްކަމެއް އޮންނާނީ އެކަންކަން ހާސިލް ކުރުމަށް ކަމަށް ވެސް ސިލްވާ ވަނީ ބުނެފަ އެވެ. އިތުރަށް އޭނާ ބުނީ ކުލަބުގެ އިސްވެރިން އޭނާއާ މެދު ބާއްވާ އިތުބާރަށް ޝުކުރު އަދާކުރަން ބޭނުންވާ ކަމަށެވެ. ސިލްވާ ފާހަގަ ކުރި ގޮތުގައި އެއްބަަސްވުން އައު ކުރުމަށް އޭނާ އަށް އެންމެ ފަސޭހަވީ ވެސް ވެރިންގެ އިތުބާރު އޮތުމުންނެވެ.

ފުލަމްގެ އެއްބަސްވުން ސިލްވާ އައު ކުރީ، ސައުދީ ޕްރޯ ލީގުގެ އަލް އަހްލީން ވެސް އޭނާ ހޯދުމަށް މަސައްކަތް ކޮށްފައި ވަނިކޮށެވެ. ނަމަވެސް އެންމެ ފުރަތަަމަ ވެސް ސިލްވާ ނިންމީ ފުލަމްގައި މަޑު ކުރުމަށެވެ. ޕޯޗުގަލަށް ނިސްބަތްވާ ސިލްވާ އޭނާގެ ކޯޗިން ކެރިއަރު ފެށީ 2011 ވަނަ އަހަރު އެވެ. އޭގެ ފަހުން މިހާތަނަށް އައިއިރު، ފުލަމް އަކީ އޭނާ އިރުޝާދު ދޭ ހަތް ވަނަ ކުލަބެވެ. އޭނާ އިރުޝާދު ދިން ކުލަބުތަކުގެ ތެރޭގައި ޕޯޗުގަލްގެ އެސްޓޮރިލް، ސްޕޯޓިން، ގްރީކްގެ އޮލިމްޕިއާކޯސް، އިންގްލެންޑުގެ ހަލް ސިޓީ، ވަޓްފޯޑު އަދި އެވަޓަން ހިމެނެ އެވެ. އެވަޓަންގެ ކޯޗުކަމުން އޭނާ ވަކިކޮށްފައި ވަނީ 2019 ވަނަ އަހަރު އެވެ. އޭގެ ފަހުން ފުލަމްއާ ހަވާލުވީ 2021 ވަނަ އަހަރު އެވެ. އޭނާގެ އިރުޝާދުގެ ދަށުން ފުލަމް ވަނީ މިހާތަނަށް 105 މެޗު ކުޅެފަ އެވެ. އޭގެ ތެރެއިން އެ ޓީމު ވަނީ 51 މެޗުން މޮޅުވެ، 33 މެޗުން ބަލިވެފަ އެވެ. 21 މެޗެއް ނިމުނީ އެއްވަރުވެގެންނެވެ.