ވޮލީބޯޅަ އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާކު ކޮށްގެން ސްކޫލުތަކަށް ބާއްވަމުން އަންނަ، އިންޓަ ސްކޫލް ވޮލީ ބޯޅަ މުބާރާތް މިއަހަރު ބާއްވަން ނިންމައިފި އެވެ.

ވީއޭއެމް އިން މައުލޫމާތު ދެއްވާ ގޮތުގައި މިއަހަރުގެ މުބާރާތް ބޭއްވުމަށް އެ އެސޯސިއޭޝަނުން މަސައްކަތް ކުރަމުން އަންނަނީ މި ހިނގާ އޯގަސްޓު މަހުގެ 22 ވަނަ ދުވަހު އެވެ. މިއަހަރުގެ މުބާރާތުގައި ބައިވެރިވުމުގެ ސުން ގަޑި އަކީ އޮކްޓޫބަރު މަހުގެ 12 ވަނަ ދުވަހު އެވެ. ވީއޭއެމް އިން ބުނެފައިވާ ގޮތުގައި މިއަހަރުގެ މުބާރާތް ކުރިއަށް ގެންދަން ނިންމާފައި ވަނީ އެކުވެނީގައި ހުންނަ އައުޓްޑޯ ވޮލީ ކޯޓުގަ އެވެ. މީގެ ކުރީ އަހަރުތަކުގައި މުބާރާތް ބާއްވާފައި ވަނީ ޒުވާނުންގެ މަރުކަޒުގެ އެތެރޭ ހޯލުގަ އެވެ.

މުބާރާތް އަލުން ފަށަން ވީއޭއެމުން މަސައްކަތް ކުރަމުން އަންނައިރު، މުބާރާތް ކުރިއަށް ނުގެންދެވި ހުއްޓިފައި އޮންނަތާ ހަތަރު އަހަރު ވަނީ އެވެ. އެންމެ ފަހުން ވީއޭއެމް އިން އިންޓަ ސްކޫލް ވޮލީ ބޯޅަ މުބާރާތް ބާއްވާފައި ވަނީ 2019 ވަނަ އަހަރު އެވެ. އެ އަހަރުގެ މުބާރާތް ކުރިއަށް ގެންގޮސްފައި ވަނީ ތިން އުމުރުފުރާއަކަށް ބަހާލައިގެންނެވެ. އެއީ 14 އަހަރުން ދަށް، 16 އަހަރުން ދަށް އަދި 19 އަހަރުން ދަށުގެ އުމުރުފުރާ އެވެ. އެ އަހަރުގެ މުބާރާތުގެ އެންމެ ކާމިޔާބު ސްކޫލަކީ ފ.އަތޮޅު މަދަރުސާ އެވެ. އެ ސްކޫލުން ވަނީ ބައިވެރިވި ހުރިހާ އުމުރުފުރާއެއްގެ ފައިނަލްގައި ވާދަކޮށްފަ އެވެ. އެއީ 14 އަހަރުން ދަށުގެ އަންހެން، ފިރިހެން އަދި 16 އަހަރުން ދަށުގެ އަންހެން، ފިރިހެން އެވެ.

މީގެ ތެރެއިން އެ ސްކޫލް ވަނީ ތިން ފައިނަލް ކާމިޔާބުކޮށްފަ އެވެ. އެއީ 14 އަހަރުން ދަށުގެ އަންހެން ފައިނަލް، 14 އަހަރުން ދަށުގެ ފިރިހެން ފައިނަލް އަދި 16 އަހަރުން ދަށުގެ ފިރިހެން ފައިނަލް އެވެ. 16 އަހަރުން ދަށުގެ އަންހެން ފައިނަލްގައި އެ ސްކޫލް ވަނީ ބަލިވެފަ އެވެ. އެ އުމުރުފުރާގެ ފައިނަލުން މޮޅުވީ ބ.ގޮއިދޫ ސްކޫލް އެވެ. އެ އަހަރުގެ މުބާރާތުގެ 19 އަހަރުން ދަށުގެ ފިރިހެން ޗެމްޕިއަންކަން ހޯދީ ސެންޓަ ފޯ ހަޔާ ސެކަންޑްރީ އެޑިއުކޭޝަން (ސީއެޗްއެސްއީ) އެވެ. އަދި ފިރިހެން އުމުރުފުރާގެ ޗެމްޕިއަންކަން ހޯދީ އަޙުމަދިއްޔާ އިންޓަނޭޝަނަލް ސްކޫލް އެވެ.

އިންޓަ ސްކޫލް ވޮލީ ބޯޅަ މުބާރާތަކީ ޒުވާން ގިނަ ކުޅުންތެރިންތަކެއް އުފެދެމުން އަންނަ މުބާރާތެކެވެ.