ސިއްހަތާއި ތިމާވެއްޓަކީ ވަކި ނުކުރެވޭނެ ދެ އެއްޗެކެވެ. ދުޅަހެޔޮ ވެއްޓެއް ލިބިގެން މެނުވީ ފުރިހަމަ ސިއްހަތެއް ލިބޭކަށް ނެތެވެ. ގުޅި ލާމެހިފައިވާ މި ދެ ކަންތަކުގެ ވާހަކަދައްކާއިރު، ހަމަ އެއާ ވިދިގެން އެންމެ ގަދައަށް އިވޭ އަޑަކަށް ވެފައި އޮންނަނީ ކެމިކަލްގެ ވިހަ މާއްދާތަކާ ދުރުވުމަށް ގޮވާލާ އަޑެވެ. އާންމު ދިރިއުޅުމުގެ އެކި ކަންކަމުގައި، އެނގިތިބެއާއި ނޭނގުމެއްގެ ތެރޭގައި ނަމަވެސް ކެމިކަލުން ތަޣައްޔަރުވެފައިވާ އެކި އުފެއްދުންތައް، އަހަރެމެން އިންސާނުންނާއި މި ނޫންވެސް ދިރޭ ސޫފާސޫތްޕާއި ޖަނަވާރުތަކަށްވެސް ބޭނުންކުރެވޭ ގޮތް އޮންނަނީ ވެފައެވެ.
ކެމިކަލްގެ ތަޣައްޔަރުކަމުން ހަވާސާވެ، ވެށި ހިމާޔަތްކުރުމަށް ދާދި ފަހުން އަތުކުރި އޮޅާލި އެއް ބަޔަކީ މިސްރުގެ 'އިޖީމެގް ބަޔޯޓެކްނޮލޮޖީ'އެވެ. އިޖީމެގް ބަޔޯޓެކްނޮލޮޖީން ތައްޔާރުކުރީ ބަޔޯފަރޓިލައިޒަރއެއްގެ އިތުރުން މަސްމަހާމެއްސާއި ނައަމްސޫތްޕަށް ކާންދޭ ޕްރޮޓީނެކެވެ. އިޖީމެގް ބަޔޯޓެކްނޮލޮޖީގެ މި އީޖާދަކީ މެހީގެ ބާވަތެއް ކަމަށްވާ ބްލެކް ސޯލްޖާ ފްލައި ބޭނުން ކޮށްގެން ވުޖޫދުކުރި އީޖާދެކެވެ.
އިޖީމެގް ބަޔޯޓެކްނޮލޮޖީން މި މަޝްރޫއުގެ އަމަލީ މަސައްކަތް ފެށީ 2018 ވަނަ އަހަރުގެ ތެރޭގައެވެ. އެގޮތުން ބްލެކް ސޯލްޖަރ ފްލައި ނުވަތަ މެހީގެ ބިސް ދިރުވައި ޢާލާކުރަން ފެށިއެވެ. ބިސްތައް ބޮޑެތިކުރަމުން ދިޔައީ ވީހާވެސް ގިނަ އަދަދަކަށް އޯގޭނިކް ކުނި ކެވޭނެ ފަދަ ސޫފިތަކެއް އުފެދޭނެފަދަ ގޮތަކަށެވެ. އެއާއެކު ޖައްވު ހޫނުކުރާ ވިހަ ގޭހެއް ކަމަށް ވާ ކާބަން ބޭރުވާމިންވަރު މަދު ކުރެވޭކަން، ކުންފުނީގެ ބާނީ އަހުމަދު މުހައްމަދު އާބިދު ވަނީ ފާހަގަކޮށްފައެވެ.
އަހަރެމެން މީ އިޖީމެގް ބަޔޯޓެކްނޮލޮޖީ ކުންފުނި. އަހަރެމެން ހަރަކާތްތެރިވަމުން މިދާ ސިނާއަތަކީ ދުނިޔެއަށް އަދި ވަރަށް އާ ސިނާއަތެއް. މި ސިނާއަތަށް އަދި މިވީ 12 ވަރަކަށް އަހަރު. އަހަރެމެންނަކީ މި ސިނާއަތުގަ އެންމެ ފުރަތަމަ ހަރަކާތްތެރިވާން ފެށި އެއް ބައެއް. މެދުއިރުމަތީގެ ފުރަތަމަ ކުންފުންޏަށް، އަދި އެފްރިކާ ސަރަހައްދުގެ ފުރަތަމަ ކުންފުނިތަކުގެ ތެރޭގަވެސް ގުނާލެވޭނެހެން ހީވަނީ... ބްލެކް ސޯލްޖަރ ފްލައި ދިރުވާ އާލާކޮށް، ބިސް އާލާ ކުރެވޭ ގޮތަށް ހުރި. ބްލެކް ސޯލްޖަރ ފްލައިއަކީ ބަލި ފަތުރާ މެއްސެއް ނޫން. އެއީ ރައްކާތެރި މެއްސެއް. ނައަމްސޫތްޕާ މަސްމަހާމެއްސަށްވެސް އެ ކާންދޭން ވިލާތުގެ އިއްތިހާދުންވެސް ހުއްދަ ދީފަ އޮންނަނީ. މެހީގެ ނަޖިސް، ބަޔޯފަރޓިލައިޒަރގެ ގޮތުގަ ބޭނުން ކުރަންވެސް ހުއްދަ ދީފަ އޮންނަނީ.އަހުމަދު މުހައްމަދު އާބިދު؛ އިޖީމެގް ބަޔޯޓެކްނޮލޮޖީގެ ބާނީ
މަސްމަހާމެއްސާއި ނައަމްސޫފީގެ ކެއުން ތައްޔާރުކުރުމަށް ބޭނުންވާ ޕްރޮޓީންގެ މަސްދަރަކަށްވެސް ހެދީ މި ދެންނެވި ބްލެކް ސޯލްޖަރ ފްލައިތަކެވެ. މެހީގެ ނަޖިސް ބޭނުން ކުރަނީ ގަސްކާނާ އުފެއްދުމަށެވެ.
އަހަރެމެންނަށް މިހާތަނަށް ކުރިމަތިލާން ޖެހުނު އެންމެ ބޮޑު މައްސަލައަކީ އުފެއްދުންތެރިކަމަށްވުރެ ޑިމާންޑް އިތުރުވުމުގެ މައްސަލަ. އަހަރެމެންގެ އުފެއްދުންތެރިކަން އެބަޖެހޭ 300 ގުނަ އިތުރު ކުރަން. މުޅި ދުނިޔޭގެ ނިސްބަތުން ބަލާއިރު 2022 ވަނަ އަހަރު އުފެއްދިފަ އޮތީ އެންމެ 18000 ޓަނު. 2022 ވަނަ އަހަރުގެ ޑިމާންޑް، އޭގެ 100 ގުނައަށްވުރެވެސް އިތުރު.އަހުމަދު މުހައްމަދު އާބިދު؛ އިޖީމެގް ބަޔޯޓެކްނޮލޮޖީގެ ބާނީ
ބްލެކް ސޯލްޖަރ ފްލައިން އުފައްދާ ބަޔޯފަރޓިލައިޒަރ ނުވަތަ ގަސްކާނާއަކީ ޚަރަދުގެ ގޮތުން ބަލާއިރުވެސް ދެކޮޅުޖެހޭ އެއްޗެއް ކަމަށް، ދަނޑުވެރިކަމުގެ ސިނާއީ އިންޖިނޭރުކަމަށް ޚާއްސަ ހިޝާމް އައްސައީދު އަލްކަހަލް ފާހަގަކުރިއެވެ. ހިޝާމަކީ އޭނާގެ ސްޓްރޯބެރީ ދަނޑުތަކުގައި މިހާރުވެސް އެ ގަސްކާނާ ބޭނުންކޮށް، ތަޖުރިބާ ކުރަމުންދާ މީހެކެވެ. ހިޝާމް ބުނާގޮތުގައި، އިޖީމެގް ބަޔޯޓެކްނޮލޮޖީގެ ގަސްކާނާ ބޭނުން ކުރަން ފެށުމާއެކު، އޭނާގެ ޖީބުން ކުރަން ޖެހުނު ޚަރަދުތައް 50 ޕަސެންޓް ކުޑަވެގެން ދިޔައެވެ.
އަހަރެމެން މިހާރު މި ބޭނުން ކުރަނީ އޯގޭނިކް މާއްދާތަކެއް. ސޫފާސޫފީގެ އެކިއެކި ބައިތައް ބޭނުންކޮށްފަ ހުންނާނީ. މިސާލަކަށް ސޮއިލް މެގް ޕްރޯ ކަހަލަ. މި ބޭނުން ކުރަން ފެށީމަ، ދަނޑުވެރިކަމަށް އަހަރެންގެ އަތުން ކުރަންޖެހޭ ޚަރަދު 50 ޕަސެންޓް ކުޑަވެއްޖެ. އޯގޭނިކް އުފެއްދުންތަކެއް އެބަ ލިބޭ. މާނައަކީ، ޚަރަދު ކުޑަކޮށް، ރަނގަޅު ފެންވަރުގެ ސްޓްރޯބެރީ އެބަ ލިބެޔޭ. އަހަރެމެންގެ މިހާރުގެ އަމާޒަކީ، ހުރިހާ ކަމަކަށްވެސް އޯގޭނިކް ސާމާނު ބޭނުން ކުރުން. އެއްވެސް ކަހަލަ ގެއްލުމެއް އެކުލެވިގެން ނުވާ ގޮތަށް.ހިޝާމް އައްސައީދު އަލްކަހަލް؛ ދަނޑުވެރިކަމުގެ ތަޖުރިބާކާރެއް
އިޖީމެގް ބަޔޯޓެކްނޮލޮޖީ މިއަދު އަމާޒު ހިފާފައި ވަނީ އެ ކުންފުނީގެ މި އީޖާދީ އުފެއްދުންތައް ވީހާވެސް ފުޅާ ދާއިރާއެއްގައި އުފައްދައި، މާކެޓް ކުރުމަށެވެ. ބަޔޯފަރޓިލައިޒަރ ނުވަތަ ގުދުރަތީ މާއްދާތައް ބޭނުން ކޮށްގެން އުފައްދާ ގަސްކާނާއަށް އޮންނަ ޑިމާންޑްވެސް ދަނީ އިތުރުވަމުންކަން ފާހަގަކުރަން ޖެހެއެވެ.
