މެންޗެސްޓަރ ޔުނައިޓެޑަށް ކުޅެމުން އައި އައިވަރީ ކޯސްޓުގެ ޑިފެންޑަރު އެރިކް ބައިލީ އެ ކުލަބު ދޫކޮށް ތުރުކީވިލާތުގެ ބެސިކްޓާސް އަށް ބަދަލުވެއްޖެ އެވެ.

އުމުރުން 29 އަހަރުގެ ކުޅުންތެރިޔާ ބެސިކްޓާސް އަށް ބަދަލުވީ ދާއިމީ އެއްބަސްވުމެއްގެ ދަށުންނެވެ. އޭނާ އެންމެ ފަހުން ކުޅުނީ ފްރާންސް ލީގުގެ މާސޭ އަށެވެ. އެއީ ޔުނައިޓެޑުގައި ހުރުމަށްފަހު، ލޯނު އެއްބަސްވުމެއްގެ ދަށުންނެވެ. ބެސިކްޓާސް އަށް ބައިލީ ބަދަލުވީ އެއް އަހަރު ދުވަހުގެ އެއްބަސްވުމެއްގެ ދަށުންނެވެ. އެހެން ނަމަވެސް، އެ މުއްދަތު ހަމަވުމުން ކުލަބުން ބޭނުންވާނަމަ، އެއްބަސްވުމުގެ މުއްދަތު އިތުރު ކުރުމުގެ ފުރުސަތު ވެސް އޮވެ އެވެ.

ވިލަރެއާލްގައި ހުރުމަށްފަހު ބައިލީ ޔުނައިޓެޑަށް ބަދަލުވީ 2016 ވަނަ އަހަރު އެވެ. އެ ކުލަބާއެކު އޭރު އޭނާ ސޮއި ކުރީ ހަތަރު އަހަރު ދުވަހުގެ އެއްބަސްވުމެއްގަ އެވެ. ނަމަވެސް އޭގެ ފަހުން، 2020 ވަނަ އަހަރު އޭނާ ވަނީ އެ އެއްބަސްވުން އިތުރު ދެ އަހަރަށް އައު ކޮށްފަ އެވެ. ދެ ވަނަ ފަހަރަށް ޔުނައިޓެޑުގެ އެއްބަސްވުން އޭނާ އައު ކުރީ 2021 ވަނަ އަހަރު އެވެ. އެ އެއްބަސްވުމުގެ މުއްދަތު ހަމަވާން އޮތީ 2024 ވަނަ އަހަރުގެ ޖޫން މަހުގެ ނިޔަލަށެވެ. ބައިލީ ވަނީ ޔުނައިޓެޑަށް ކުޅެދިން 113 މެޗުގައި އެއް ލަނޑު ޖަހައިފަ އެވެ. އެ ކުލަބާއެކު އޭނާ ވަނީ ތިން ތައްޓެއް ކާމިޔާބުކޮށްފަ އެވެ.

އެސްޕަންޔޯލް އިން ސީނިއާ ކެރިއަރު ފެށި ބައިލީ އަންނަނީ އައިވަރީ ކޯސްޓުގެ ޤައުމީ ޓީމަށް ވެސް ކުޅެމުންނެވެ. ޤައުމީ ޓީމަށް މިހާތަނަށް ކުޅެދިން 49 މެޗުގައި އޭނާ ވަނީ ދެ ލަނޑު ޖަހައިފަ އެވެ.