ސިއްޙީ މަރުކަޒުގެ ޚިދުމަތް އިތުރުކޮށް 24 ގަޑިއިރަށް ބަދަލުކޮށް ބ. ކިހާދޫގެ ކަރަންޓުގެ ހާލަތު ރަނގަޅުކޮށްދެއްވާނެ ކަމަށް އެމްޑީޕީއާއި ގުޅިފައިވާ ސިޔާސީ ޕާޓީތަކުގެ ކެންޑިޑޭޓް، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙު ވިދާޅުވެއްޖެއެވެ.

އުފާވެރި އަމާންރާއްޖެ ކެމްޕޭން ޖަލްސާއަށް ވަޑައިގެން ކިހާދޫގައި ވާހަކަފުޅުދައްކަވަމުން ރައީސް ވިދާޅުވީ ކުރިއަށް އޮތް ދައުރަށް ކުރިމަތިލައްވާއިރު ކިހާދޫއަށް ކޮށްދޭންޖެހޭ ކަންތައްތަކެއް އެބަހުރި ކަމަށެވެ. އެކި ރަށްރަށަށް ކޮށްދޭންޖެހޭ ކަންތައްތައް ހޯއްދަވާ، އެކަންކުރެވޭނެ ގޮތްތައް މިހާރުވެސް ބައްލަވަމުން ގެންދަވާކަމަށާއި، އެގޮތުން ކިހާދޫގެ ހެލްތު ސެންޓަރުގެ 16 ގަޑިއިރުގެ ޚިދުމަތް މިހާރަށްވުރެ ރަނގަޅުކޮށް 24 ގަޑިއިރަށް ޚިދުމަތް ބަދަލުކޮށްދެއްވާނެ ކަމަށް ރައީސް ވިދާޅުވިއެވެ. އަދި ސްކޫލަށް ބޭނުންވާާ މަލްޓިޕަރޕަސް ހޯލާއި ސައިންސް ލެބް ސްކޫލަށް އިތުރުކުރެވިގެންދާނެ ކަމަށް ރައީސް ވިދާޅުވިއެވެ.

މީގ އިތުރުން ފަޅުފުންކޮށް އިތުރު މަސައްކަތް ކުރާ އިރު ސްވިމިންގ ޓްރެކެއް އަޅައިދެއްވާނެ ކަމަށާއި، އިންޖީނުގެ މިހާރު ހުރިތަނުން އައު ތަނަކަށް ބަދަލުކޮށް ކަރަންޓުގެ ޚިދުމަތް ރަނގަޅުކުރައްވާނެ ކަމަށް ރައީސް ވިދާޅުވިއެވެ. ރައީސް ވިދާޅުވީ އެޓީއެމް ފެސިލިޓީއެއް ގާއިމްކޮށް ފުޓްސަލް ދަނޑު ބޮޑުކޮށް ބޮޑު ދަނޑަކަށް ބަދަލުކުރައްވާނެ ކަމަށެވެ.

ރައީސް ވިދާޅުވީ މީގެ ކުރީ ސަރުކާރުން ތަރައްޤީއަށްޓަކައި ކިޔާފައި ކުދި އާބާދީތައް ޚިދުމަތްތަކުން މަހްރޫމްކޮށް، ހަމައެކަނި ވަކިވަކި ތަންތަނަށް އަމާޒުކޮށްގެން ޕްރޮޖެކްޓް ހިންގައިގެން ކުރިއަށް ގެންދިޔަ ކަމަށެވެ. އޭގެ ނަތީޖާއަކަށް ވެގެންދިޔައީ ރައްޖެއަށް ބޭނުންވި ތަރައްޤީ ނައިސް، އޭގެ ސަބަބުން އިގްތިސާދީގޮތުން ލިބެން އޮތް ފައިދާ ހެޔޮގޮތުގައި ބޭނުން ނުކުރެވި ގޮސްފައިވާ ކަމަށެވެ.

ރައީސް ވިދާޅުވީ މިހިސާބަށް އައި އިރުގައި ވޭތުވެދިޔަ ސަރުކާރުތަކުގައި ކިހާދޫއާ ދޭތެރޭގައި ވަރަށް ބޮޑަށް އިހުމާލުވެފައި އެބަ އޮތް ކަމަށެވެ. އަދި މިހާރު އޮތް ބަނދަރަކީ މިހާތަނަށް ސަރުކާރަކުން އެޅި ފުރަތަމަ ބަނދަރު ކަމަށާއި، މިއަދު ސިޔާސަތުތައް ބަދަލުކޮށް ލަފާފުރުން ދަތި ހުރިހާ ރަށެއްގެ ހައްލުކޮށްދީ ކަރަންޓް ރަނގަޅަށް ފޯރުކޮށްދީ ސިއްޙީ ޚިދުމަތް ރަނގަޅުކޮށްދީ ދަރިންނަށް ތައުލީމް ހޯދާ މިދެނީ މި ސަބަބުތަކަށްޓަކައި ކަމަށެވެ.