ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީންގެ ތާއީދު ޑރ.މުހައްމަދު މުއިއްޒަށް ނެތް ކަމަށާއި، އެއީ ކުލަ ބަދަލުކުރުމުގައި ނަމޫނާ ބޭފުޅެއް ކަމަށް އެމްޑީއޭގެ ނާއިބު ރައީސް ޢަލީ މައުރޫފު ވިދާޅުވެއްޖެއެވެ.
އެމްޑީއޭގެ ހުޅުމާލެ ޕޮލިޓިކަލް ސެންޓަރު ހުޅުވުމަށް ބުރާސްފަތި ދުވަހުގެ ރޭ ބޭއްވި ރަސްމިއްޔާތުގައި މައުރޫފު ވިދާޅުވީ އިދިކޮޅު ކެންޑިޑޭޓު ރިޔާސީ އިންތިޚާބުގައި ވާދަކުރެއްވުމަށް ނުކުންނެވީ 3000 މެންބަރުން ކިރިޔާ ހަމަވާ ޕާޓީއަކުން ކަމަށާއި ރައްޔިތުންގެ ގާތަށް ދިއުމަށް ލަދު ގަންނަން ޖެހޭ ކަމަށެވެ. އަދި ޕީޕީއެމްއިން ވަކިވެވަޑައިގެން ޕީއެންސީ ކެންޑިޑޭޓެއްގެ ގޮތުގައި ނުކުންނެވީ ގޮތް ހުސްވެގެން ކަމަށެވެ.
މައުރޫފު ވިދާޅުވީ ކަންކަން ހިނގާ ދިޔަ ގޮތުން ވެސް ޔާމީންގެ ތާއީދު މުއިއްޒަށް ނެތްކަން ހާމަވާ ކަމަށެވެ. އަދި ވިދާޅުވީ މުއިއްޒަކީ ކުލަ ބަދަލުކުރުމުގެ ނަމޫނާ ބޭފުޅެއް ކަމަށެވެ.
ތާއީދު އޮތިއްޔާ ކީއްކުރަންތޯ ޕީޕީއެމްގެ ނައިބު ރައީސްއަކަށް ހުއްޓައި ވަކިކުރަންވީ. ވަކިކުރީ އެމަނިކުފާނު އެއްކިބާ ކުރަންވެގެން. އަޅުގަނޑަށްވުރެ ބޮޑަށް މުއިއްޒު ދަންނަ ބޭފުޅެއް ނޫޅޭނެ މިގައުމުގައި. އަޅުގަނޑު ދަންނަވާނީ މުއިއްޒަކީ ކުލަ ބަދަލުކުރުމުގެ ނަމޫނާ ބޭފުޅެކޭ ފުރަތަމަ މުއިއްޒު މަސައްކަތް ކުރީ އަދާލަތު ޕާޓީ، ވަހީދުގެ ވެރިކަމުގައި ޖަންޕެއް ޖަހާފަ ގޮސްފައި މިނިސްޓަރުކަން ހޯދި. ދެން ވަހީދުގެ ވެރިކަން ނިމުމާއެކު ޓަސް ކިޔާފަ އައިސް އެމްޑީއޭގެ ކުލަ އޮރެންޖް ކުލައަށް ބަދަލުވެގެން އައިސް، އަނެއްކާ ވެސް ހައުސިން މިނިސްޓަރުކަން ހޯދީ. ދެން އަޅުގަނޑުމެންނަށް ދިނީ ދޯކާ. އަޅުގަނޑުމެންގެ ޕާޓީން ވަކިވެގެން ގޮސް ރައީސްގެ ޔާމީންގެ ފަހަތްޕުޅަށް އަރައި މިއަދު އެހުރީ ރައީސް ޔާމީންއާއެކު. ރައީސް ޔާމީންވެސް ބާކީކޮށް މިއަދު އެހުރީ ޕީއެންސީގެ ތެރެއަަށް ލާފައި. ބާލިޣުނުވާ ޕާޓީއަކާއެކު.އެމްޑީއޭގެ ނާއިބު ރައީސް ޢަލީ މައުރޫފު
މިސަރުކާރަށް އިޝާރާތް ކުރައްވައި މައުރޫފު ވިދާޅުވީ ރައީސް ސާލިހަކީ ރައްޔިތުންނަށް އޯގާތެރި އިހުލާސްތެރި ވެރިއެއް ކަމަށެވެ. އެމަނިކުފާނު ރައްޔިތުންގެ މަޖިލީހުގައި ފަސް ދައުރު މަސައްކަތް ކުރައްވާފައިވާއިރު، އެކަން ސާބިތުކޮށްދީފައިވާކަމަށް މައުރޫފު ވިދާޅުވިއެވެ. އަދި ވިދާޅުވީ މިގައުމަށް އެންމެ ފައިދާ ހުރި މަސައްކަތް ކޮށްދެއްވި ރައީސްއަކީ ރައީސް ސާލިހު ކަމަށެވެ.
އަޅުގަނޑު ގަބޫލުކުރާ ގޮތުގައި ރައްޔިތުންގެ މަޖިލީހުގައި މަސައްކަަތް ނުކޮށް ދިވެހިރާއްޖޭގެ ރައްޔިތުންނަށް ޚިދުމަތް ކުރެވޭނެ އެއްވެސް ރައީސްއަކު ނާންނާނެ. އެއީ ބުއްދިވެރި ގޮތެއް ނޫން ރައްޔިތުންގެ މަޖިލީހުގެ ތެރެއިން ރައީސުން އަންނަންވާނީ. ރައްޔިތުންގެ އިހުސާސްތައް އެނގޭނީ ރައްޔިތުންގެ ކަންބޮޑުވުމާއި ރައްޔިތުންގެ ކެކުޅުމާއި ރައްޔިތުންގެ ހުރިހާ ކަމެއް އެނގޭނީ ރައްޔިތުންގެ މަޖިލީހުގެ ތެރެއަށް ވަނީމަ. އެއީ ރައްޔިތުންގެ މަޖިލީހަކީ ރައްޔިތުންގެ ގެ.އެމްޑީއޭގެ ނާއިބު ރައީސް ޢަލީ މައުރޫފު
މައުރޫފު ވިދާޅުވީ ރާއްޖޭގެ އިގްތިސާދު އެންމެ ބޮޑަށް ހިއްސާކުރާ ސިނާއަތް ޓޫރިޒަމް ކުރިއެރުވުމަށް އަމާން ރާއްޖެއެއް ބޭނުންވާ ކަމަށެވެ. އަމާން ރާއްޖެއެއް އޮވެގެން ނޫނީ އިގްތިސާދު ދެގުނަކުރެވެން ނެތް ކަމަށާއި، އަމާން ރާއްޖެއާއެކު އިގުތިސާދު ދެގުނަ ކުރާނެ ކަމަށް މައުރޫފު ވިދާޅުވިއެވެ. އަދި ވިދާޅުވީ މިއަހަރުގެ އިންތީޚާބު ބޮޑުތަނުން ނަގާނީ އެއްބުރުން ކަމަށެވެ.
