ކުރީގެ ރައީސް އަބްދުﷲ ޔާމީން ޖަލުގައި އިންނެވުމުން ކަންބޮޑުވެވަޑައިގަންނަވާ ކަމަށާއި، ނަމަވެސް ޝަރީއަތުގެ މެދުތެރެއިން ގޮތެއް ނިންމުމުގެ ބާރު ލިބިވަޑައިގެންފައިވާ ނުވާކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.

ރައީސް މިފަދައިން ވިދާޅުވީ މިހާރު އއ އަތޮޅަށް ކުރައްވަމުން ގެންދަވާ ދަތުރުފުޅުގައި އެ އަތޮޅުގެ ރަސްދޫއަށް ވަޑައިގެން ދެއްކެވި ވާހަކަފުޅުގައެވެ. އެގޮތުން އެމަނިކުފާނާ އިދިކޮޅު ފަރާތްތަކުން އަބަދުވެސް ދައްކަވަނީ ކޮންމެވެސް މީހަކު ޖަލަށްލާ ވާހަކަ ކަމަށާއި، އެގޮތަށް މި ސަރުކާރުން ކަންކަން ނުކުރައްވާނެ ކަމަށް ވިދާޅުވިއެވެ.

މި ސަރުކާރުން ޖުޑީޝަރީއަށް އަތް ނުބާނާނެކަން ފާހަގަކުރައްވައި ރައީސް ވިދާޅުވީ، ޔާމީން ޖަލުގައި އިންނަވަން ޖެހުމަކީ އެމަނިކުފާނު ވެސް ކަންބޮޑުވެވަޑައިގަންނަވާ ކަމެއް ކަމަށެވެ. ނަމަވެސް އެއީ މިހާރުވެސް ޝަރީއަތް ކުރިއަށްދާ މައްސަލައެއް ކަމަށާއި، ޝަރީއަތުގެ މެދުތެރެއިން ގޮތެއް ނިންމުމުގެ ބާރެއް އެމަނިކުފާނަށް ނެތްކަން ފާހަގަކުރެއްވިއެވެ. އަދި އެމަނިކުފާނަށް އޮންނާނީ ޝަރުއީ ހުރިހާ މަރުހަލާއެއް ނިމުމުން، ގާނޫނީ އިމުގެ ތެރެއިން ކުރެއްވެން އޮތް ކަމެއް ކުރެއްވުން ކަމަށް ވެސް ރައީސް ވިދާޅުވިއެވެ.

މިފަދައިން ވިދާޅުވެ ރައީސް ވަނީ އެމަނިކުފާނަށް ޝަރުއީ ނިޒާމުގެ ތެރެއަށް އަތްބާނުއްވައި، ނުފޫޒު ފޯރުއްވުމަށް މަޖުބޫރު ނުކުރުމަށް އިދިކޮޅު ފަރާތްތަކަށް ގޮވާލައްވާފައެވެ.

ރައީސް އިތުރަށް ވިދާޅުވީ އެމްޑީޕީން މިހާތަނަށް އައިސްފައިވަނީ ދަތި އުނދަގޫ މަރުހަލާތަކެއް ކަނޑައްތުކޮށްފައި ކަމަށާއި، ކުރިއަށް އޮތް ރިޔާސީ އިންތިޚާބު ޕީޕީއެމަށް ކާމިޔާބުވެއްޖެނަމަ ދެން ވާނެ ގޮތަކާމެދު ވިސްނަންޖެހޭ ކަމަށެވެ. އެހެންކަމުން ސިޔާސީގޮތުން ހުރި ޚިޔާލު ތަފާތުވުންތައް އެއްފަރާތްކޮށް, އިންތިޚާބުގައި އެކުގައި މަސައްކަތް ކުރުމަށް، އެމްޑީޕީއާ ވަކިވި ފަރާތްތަކަށް ރައީސް ދައުވަތު ދެއްވިއެވެ.

ރައީސް ވިދާޅުވީ މި ސަރުކާރުން މިހާތަނަށް ކަންކަން ކޮށްފައިވަނީ ރައްޔިތުންނަށް އެންމެ ފައިދާވާނެ ގޮތްތައް ބެލުމަށްފަހު ކަމަށާއި، ކުރިއަށް ކަންކަން ރާވާފައި ވަނީވެސް އެގޮތަށް ބަލައިގެން ކަމަށެވެ.