އަންހެނުންގެ ވޯލްޑްކަޕުގައި ފްރާންސްގެ ޓާގެޓް ހާސިލްވެއްޖެ ކަމަށާއި ސެމީ ފައިނަލަށް ދިއުމަށް މާދަމާ އޮސްޓްރޭލިޔާ ބަލިކުރަން ފަސޭހަ ނުވާނެ ކަމަށް ފްރާންސުން ބުނެފި އެވެ.
ކޯޗު ހާވް ރެނާޑް ބުނީ ފަސޭހަކަމާއެކު މޮރޮކޯ ބަލިކޮށް ކުއާޓާ ފައިނަލަށް ދެވުނު ނަމަވެސް އޮސްޓްރޭލިޔާ އަކީ ބަލިކުރަން އުނދަގޫ ޓީމެއް ކަމަށެވެ.
"އެމީހުންނަކީ މުބާރާތް ބާއްވާ ގައުމު. އެއްވެސް ޓީމަކަށް އެމީހުން ބަލިކުރަން ފަސޭހަނުވާނެ. އެއީ ވަރުގަދަ ސްކޮޑެއް އޮތް ޓީމެއް. އަހަރުމެންނަށް މެޗު ކާމިޔާބު ކުރެވޭނީ ވަރަށް ބޮޑަށް މަސައްކަތް ކޮށްގެން. އަހަރުމެންގެ ޓީމުގައި އެގާބިލްކަން ހުންނާނެ،"ރެނާޑް ބުންޏެވެ.
މިދިޔަ އަހަރު ބޭއްވި ފިރިހެނުންގެ ވޯލްޑްކަޕުގައި ސައޫދީ އަރަބިއްޔާ އަށް ކޯޗުކޮށްދިން ރެނާޑް ބުނީ ގިނަ ބަޔަކު ފްރާންސް މި މެޗުން މޮޅުވުން ގާތްކަމަށް ގަބޫލުކޮށްފާނެ ކަމަށެވެ. ނަމަވެސް އެއީ މުޅިން ރަނގަޅު ހިޔާލަކަށްނުވާނެ ކަމަށެވެ.
"އަހަރުމެން މި މުބާރާތަށް ކަނޑައެޅި ޓާގެޓް ހާސިލްވެއްޖެ. އަދި މީގެ ހަތަރު ދުވަސް ކުރިން އަހަރުމެން ތިބި ހިސާބަށްވެސް ދެވިއްޖެ. އެކަމަކު ކޮންމެ ބަޔަކު ވެސް އެއަށްވުރެ މައްޗަށް ދާން ބޭނުންވާނެ،"ރެނާޑް ބުންޏެވެ.
އަންހެނުންގެ ވޯލްޑްކަޕުގައި މެޗެއް ކާމިޔާބުކުރުމުން ރެނާޑް ވެފައިވަނީ ފިރިހެން އަދި އަންހެން ވޯލްޑްކަޕް މެޗެއް ކާމިޔާބުކުރި ފުރަތަމަ ކޯޗަށެވެ.
