ސައުދީ ޕްރޯ ލީގުގެ އަލް ނަސްރަށް ކުޅެމުން އަންނަ ބްރެޒިލްގެ އެންޑަސަން ޓަލިސްކާ އެހެން ކުލަބަކަށް ބަދަލުވާން އުޅޭ ވާހަކަ އޭނާ ދޮގު ކޮށްފި އެވެ.

ބައެއް މީޑިއާ ތަކުގައި ބުނެފައިވާ ގޮތުން އުމުރުން 29 އަހަރުގެ ކުޅުންތެރިޔާ އަންނަނީ އެހެން ކުލަބަކަށް ބަދަލުވާން މަސައްކަތް ކުރަމުންނެވެ. އެގޮތުން އެހެން ކުލަބަކާއެކު އޭނާ މަޝްވަރާ ކުރަމުން ދާ ކަމަށް ވެސް ވަނީ ބުނެފަ އެވެ. އެ ވާހަކަތަކަށް ރައްދު ދެމުން ޓަލިސްކާ ބުނީ، އޭނާއާ ގުޅުވައިގެން ފަތުރަމުން ދަނީ ދޮގު ވާހަކަތަކެއް ކަމަށެވެ. ހަމައެއާއެކު، އަލް ނަސްރު ދޫކޮށް އެހެން އެއްވެސް ކުލަބަކަށް ބަދަލުވާން ނޫޅޭ ކަމަށް ވެސް އޭނާ ވަނީ ބުނެފަ އެވެ. އިތުރަށް ޓަލިސްކާ ބުނީ، އަލް ނަސްރުގައި އޭނާ ހުރީ ނުހަނު ހިތްހަމަ ޖެހިގެން ކަމަށާއި، ދާދި ފަހުން އިތުރު ތިން އަހަރަށް އެއްބަސްވުން އައު ކުރީ ވެސް އެ ސަބަބާ ހުރެ ކަމަށް އޭނާ ބުންޏެވެ.

ޓަލިސްކާ އަލް ނަސްރަށް ބަދަލުވީ 2021 ވަނަ އަހަރު އެވެ. އޭރު އޭނާ އަލް ނަސްރަށް ބަދަލުވީ 9.5 މިލިއަން ޑޮލަރަށެވެ. އޭގެ ފަހުން އެ ކުލަބުގައި އޭނާ ދައްކަމުން އަންނަ ކުޅުމާމެދު ކުލަބުން ވެސް ހިތްހަމަ ޖެހެ އެވެ. މިއަހަރުގެ އޭޕްރީލް މަހު އަލް ނަސްރުން ވަނީ ޓަލިސްކާގެ އެއްބަސްވުން އައު ކޮށްފަ އެވެ. މިހާރު އެ ކުލަބާއެކު އޭނާ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. ޓަލިސްކާ ވަނީ މިހާތަނަށް އަލް ނަސްރަށް 64 މެޗު ކުޅެދީ 44 ލަނޑު ޖަހައިފަ އެވެ.