ފަނޑިޔާރު މަހާޒު އަލީ ޒާހިރަށް ކޮށްފައިވަނީ އަސާސެއްނެތް ތުހުމަތެއްކަމަށް, ޖުޑީޝަލް ސަރވިސް ކޮމިޝަން (ޖޭއެސްސީ)ން ބުނެފިއެވެ.
ޖޭއެސްސީން ބުނީ ސުޕްރީމް ކޯޓުން ބެއްލެވި އިސްތިއުނާފަކާމެދު އެ ކޯޓުން ހުކުމްކުރި ގޮތާ ގުޅިގެން އެކަން ފާހަގަކުރުމަށް، އެ އިސްތިއުނާފުގައި ހިމެނޭ ޚަސްމަކާ ގުޅުން އޮންނަ ފަރާތަކުން ފޮނުވި ފަރިއްކޮޅަކާ، އެ ޝަރީއަތް ހިންގެވުމުގައި ބައިވެރިވެވަޑައިގެންނެވި ސުޕްރީމް ކޯޓުގެ ފަނޑިޔާރު މަހާޒު ހަވާލުވެވަޑައިގެންފައި ވާކަމަށް ބުނާ މައްސަލައާ ގުޅިގެން އެ ކޮމިޝަނުން ހިންގި ތަހުގީގު ހޯދުނު މައުލޫމާތާއި ފަނޑިޔާރު މަހާޒު ސާފުކޮށްދެއްވާފައިވާ ހަގީގަތްތަކަށް ރިއާޔަތްކުރާއިރު، އެ މައްސަލާގައި ތުހުމަތުކޮށްފައިވާ ފަދަ ކަމެއް ހިނގާފައި ނުވާކަން ފާހަގަވާކަމަށެވެ.
އެ މައްސަލައިގެ ތަހުގީގު އިތުރަށް ކުރިއަށް ގެންދަން ނުފެންނަކަމަށް، އާދިއްތަ ދުވަހު ބޭއްވި އެ ކޮމިޝަނުގެ މި އަހަރުގެ 48 ވަނަ ޖަލްސާގައި ނިންމާފައިވާ ކަމަށް ޖޭއެސްސީން ބުނެއެވެ.
މައުލޫމާތު ލިބިފައިވާ ގޮތުގައި މިމައްސަލައަކީ ކުރީގެ ރައީސް އަބްދުﷲ ޔާމީންގެ ހުކުމާގުޅޭ މައްސަލައެކެވެ.
ޔާމީން ޖަލު އަދަބުން މިނިވަންވި މައްސަލައިގެ ރިޔާސަތު ބަލަހައްޓަވާފައިވަނީ ފަނޑިޔާރު މަހާޒެވެ. އެ ހުކުމް އިއްވުމަށްފަހު ސުޕްރީމް ކޯޓުގައި ބޭއްވި މެންދުރުގެ ފަރިއްކޮޅަކާ ގުޅިގެން މިމައްސަލަ ބަލަމުން އަންނައިރު، މިކަން ހިނގާފައިވަނީ 2021 ވަނަ އަހަރުގެ ނޮވެމްބަރު މަހުގެ 30 ވަނަ ދުވަހުއެވެ. އޭގެ އެއް އަހަރު ފަހުން މިކަމާ ގުޅޭ ސުލޫކީ މައްސަލައެއް ބެލުމަށް ޖޭއެސްސީން ނިންމާފައިވާއިރު، މިކަމާ ގުޅިގެން ޓްވިޓަރގައި މަހާޒް އާއްމުކުރެއްވި ބަޔާނުގައި ވިދާޅުވީ، އަޑުއެހުން ދިގުލައިގެންދާތީ އެ މައްސަލަ އޮންނަ ކޮންމެ ދުވަހަކު މައްސަލަ ބައްލަވާ ބެންޗުގެ ފަނޑިޔާރުން އަނެއް ދެ ފަނޑިޔާރުންނާއެކު، އަމިއްލަ ޚަރަދުގައި މެންދުރު ފަރިއްކޮޅަށް އެއްޗެހި ގެންނަވާކަމަށެވެ. އެގޮތަށް ދައުރުވަމުން ގޮސް 2021 ވަނަ އަހަރުގެ ނޮވެމްބަރު މަހުގެ 30 ވަނަ ދުވަހު ތަނަކަށް އޯޑަރުކުރައްވައިގެން ގެންނެވީ އޭނާ ކަމަށާއި، އެއީ ރިސެސްގެ ކުރިން ހުރިހާ ފަނޑިޔާރުން އެއްތަނަކުން ދިމާވާނެ ފަހު ދުވަހަށް ވާތީ ކަމަށް އޭނާ ވިދާޅުވިއެވެ. މަހާޒް ވަނީ ފަރިއްކޮޅުގެ މާ ކުރިން ޝަރީއަތުގެ ކަންކަން ހަމަޖެހިފައިވާނެ ކަމަށާއި، އެއީ ސިއްރުން ކުރި ކަމެއް ނޫންކަމަށް ވެސް ވިދާޅުވެފައެވެ.
އަދި ފައިސާ ދެއްކި ސްލިޕް އެބައޮތްކަމަށާއި، ހިލޭ ނޫނީ ނުއަގުގައި އެއްޗެއް ގެންނަވާފައިވެސް ނުވާނެ ކަމަށް އޭނާ ފާހަގަކުރެއްވިއެވެ.
