ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު، ހއ. ވަށަފަރު ސިއްހީ މަރުކަޒުގެ އެކްސްޓެންޝަން އިމާރާތް ހުޅުއްވައިދެއްވައިފިއެވެ.

ހއ އަށް ރައީސް ކުރައްވަމުން ގެންދަވާ ދަތުރުފުޅުގައި، ބުރާސްފަތި ދުވަހުގެ މެންދުރުފަހުގެ ވަގުތެއްގައި ވަނީ ވަށަފަރަށް ވަޑައިގެންފައެވެ. މި އިމާރާތް ހުޅުއްވައިދެއްވީ މިކަމަށްޓަކައި ބޭއްވި ޚާއްސަ ރަސްމިއްޔާތެއްގައެވެ. މި އިމާރާތް ހުޅުއްވައިދެއްވުމަށްފަހު އެމަނިކުފާނު ވަނީ ސިއްހީ މަރުކަޒު ބައްލަވާލައްވައި، މުވައްޒަފުންނާ ބައްދަލުކުރައްވާފައެވެ.

މި މަރުކަޒުގެ އެކްސްޓެންޝަން އިމާރާތުގައި ޑެލިވަރީ ރޫމް އަދި ޕްރައިވެޓް ރޫމްތައް ވަނީ ޒަމާނީ ފެންވަރަށް ތަރައްގީކޮށްފައެވެ.

ސިއްހީ މަރުކަޒަށް އިތުރުކުރި އިމާރާތުގެ މަސައްކަތް ކޮށްފައިވަނީ ޕާރފެކްޓް މަލަފެހި މޯލްޑިވްސް ޕްރައިވެޓް ލިމިޓެޑާ ހަވާލުކޮށްގެންނެވެ. މި އިމާރާތުގައި ޕަބްލިކް ހެލްތު ޔުނިޓަކާއި އިދާރީ އޮފީސް އަދި ސްޓޯރޭޖު ރޫމްތަކާއި ލޯންޑްރީ ހިމެނެއެވެ.

މި މަޝްރޫއަށް 1,988,107ރ (އެއް މިލިއަން ނުވަ ލައްކަ އަށްޑިހަ އަށްހާސް އެއްސަތޭކަ ހަތްރުފިޔާ) ހޭދަކޮށްފައިވެއެވެ. މި މަޝްރޫއުގެ ދަށުން ސިއްހީ މަރުކަޒުގެ ވަށާފާރު ރޭނުމުގެ މަސައްކަތްވެސް ކޮށްފައިވެއެވެ.

ސަރުކާރުން އަތޮޅުތެރޭގެ ސިއްހީ ޚިދުމަތްތައް ހަރުދަނާކުރުމަށް ކުރަމުން ދަނީ ގިނަ މަސައްކަތްތައް ކުރަމުންނެވެ. ސިއްހީ މަރުކަޒުތަކުން ދޭ ޚިދުމަތްތައް ހަރުދަނާ ކުރުމާއި، ރާއްޖޭގެ 5 ސަރަހައްދެއްގައި ޓާޝަރީ ހޮސްޕިޓާތަކުގެ މަސައްކަތްވެސް ދަނީ ކުރަމުންނެވެ. މާލެއަށް އަންނަން ނުޖެހި އަތޮޅުތެރޭގެ ރަށްތަކުން އެކަށީގެންވާ ސިއްހީ ޚިދުމަތެއް ލިބުމަކީ މިސަރުކާރުގެ އަމާޒެވެ.