ތަމްރީނުތަކެއް ފުރިހަމަ ކުރުމަށް ރާއްޖޭގެ ޒުވާން ޤައުމީ ޓޭބަލް ޓެނިސް (ޓީޓީ) ޓީމު ޗައިނާ އަށް ފުރައިފި އެވެ.
ޗައިނާ އަށް ދަތުރު ކުރި ޒުވާން ޓީމުގައި ހިމެނެނީ އަށް ކުޅުންތެރިންނެވެ. އެއީ މަލާކް ބިންތި މުއިއްޒު، އައިޝަތު ޒާރާ ޝާހިލް، މިންހާ މަހްޖޫބް ޝުޖާއު، އޯން އިބްރާހީމް ލަތީފް، މުޙައްމަދު ޒާއިމް އަޙުމަދު، އުމީރް މުޙައްމަދު މުއިއްޒު، ޙުސެއިން އާދް އާސިމް އަދި މަރިޔަމް އުޒްމާ އަފީފް އެވެ. މި ކޭމްޕު ކުރިއަށް ދާނީ މި މަހުގެ 19 އިން އަންނަ އޯގަސްޓު މަހުގެ ހަތަރު ވަނަ ދުވަހަށް ޗައިނާގެ ކުންމިންގަ އެވެ. މި ދަތުރު ހަމަޖައްސައި ދެއްވި ކަމަަށްޓަކައި ޓީޓީ އެސޯސިއޭޝަނުން ވަނީ ރާއްޖޭގައި ހުންނަވާ ޗައިނާގެ ސަފީރަށް ޚާއްސަ ޝުކުރެއް އަދާކޮށްފަ އެވެ.
ރާއްޖޭގެ ޒުވާން ޓީޓީ ކުޅުންތެރިން ވަނީ މި ފަހުން އެކި އެކި މުބާރާތްތަކުގައި ވާދަކޮށް ރަނގަޅު ނަތީޖާތަކެއް ވެސް ނެރެފަ އެވެ.
