ޔުނައިޓެޑް ބީއެމްއެލް އިން 12 ލަނޑުގެ މޮޅަކުން ކްލަބް މޯލްޑިވްސް ކަޕް ފަށައިފިއެވެ.

ބީއެމްއެލް ފުރަތަމަ މެޗު ކާމިޔާބުކުރީ ޓްރީޓޮޕް ހޮސްޕިޓަލާ ވާދަކޮށް 12-0 ނެވެ. ގްރޫޕް އީގެ މިމެޗުގައި ބީއެމްއެލްގެ އިބްރާހީމް ހަމްދާން ފަސް ލަނޑު ޖެހިއެވެ. އަދި އިޝާން އިބްރާހީމް (ސައްޓު) ތިން ލަނޑު ޖެހިއެވެ. އިސްމާއީލް އަލީފް އަހުމަދު ވެސް ދެ ލަނޑު ޖެހިއެވެ. އަނެއް ދެ ލަނޑު ޖެހީ ހުސެއިން އަލިއާއި ހައިސަމް ރަޝީދެވެ. މޮޅު ކުޅުންތެރިއަކީ ފަސް ލަނޑު ޖެހި ހަމްދާނެވެ.

މުބާރާތުގައި ގްރޫޕް އެފްގެ ފުރަތަމަ ދެ މެޗު ކާމިޔާބުކުރީ ކްލަބް ފެންއާއި ޕްރިޒަން ކްލަބެވެ. ކްލަބް ފެން ފުރަތަމަ މެޗު ކާމިޔާބުކުރީ ދިވެހި ސިފައިންގެ ކްލަބާ ވާދަކޮށް 3-0 ނެވެ. ފެން ކްލަބްގެ ތިން ލަނޑު ޖެހީ އިބްރާހީމް ޝަނޫނާއި, އަހުމަދު މާޒިންއާއި, ރައްޒާން ޖައުފަރެވެ. މޮޅު ކުޅުންތެރިއަކީ ރައްޒާންއެވެ.

މިގްރޫޕްގައި ޕްރިޒަން ކްލަބް މެޗު ކާމިޔާބުކުރީ ކްލަބް އާސަންދައާ ވާދަކޮށް 4-3 ނެވެ. ޕްރިޒަން ކްލަބްގެ ފުރަތަމަ ދެ ލަނޑު ޖެހީ އަހުމަދު ހުޝާމްއެވެ. ފަހު ދެ ލަނޑު ޖެހީ މުހައްމަދު ޝާއިންއެވެ. އާސަންދައިގެ ތިން ލަނޑު ޖެހީ އަހުމަދު އަބްދުالله އާއި އާދަމް ޝިޔާން މުޙައްމަދެވެ. އަހުމަދު އަބްދުالله ދެ ލަނޑު ޖެހިއެވެ.