އިންޖިނޭރުކަމުގެ ރޮނގުން ދަނޑުވެރިކަމަށް ޚާއްޞަވެފައިވާ ލުބްނާންގެ ޒުވާނާ، ނަދާ ޣާނިމްގެ ހިތުގައި ޤުދުރަތީ ވަސީލަތްތަކަށް ދެވިފައި ވަނީ ވަރުގަދަ މަގާމެކެވެ. ވަރުގަދަ ލޯތްބެކެވެ. އޭނާގެ އަމިއްލަ ވިޔަފާރިވެސް ޚާއްޞަކުރީ ސީދާ އެކަމަށެވެ. "ދޫދާ ސޮލޫޝަންސް"ގެ ނަމުގައި ނަދާ ހިންގާ އެ ވިޔަފާރިއަކީ، ކިލާފަނި އާލާކޮށްގެން ގަސްކާނާގެ ބާވަތްތައް އުފެއްދުމަށް ޚާއްޞަ ވިޔަފާރިއެކެވެ. އަރަބި ބަހުން 'ދޫދާ"އޭ ކިޔަނީ ފަންޏަށެވެ.

ނަދާ ގަބޫލުކުރާ ގޮތުގައި ކިލާ ފަނިތަކަކީ އޭނާގެ "އެކުވެރިން"ނެވެ. ކިލާ ފަނިތަކަކީ އޭގެ ސަބަބުން މީހަކަށް ގެއްލުމެއް ނުވާ، ކުޑަކުޑަ މަޚްލޫޤެއް ކަމަށް ނަދާ ސިފަކުރެއެވެ.

ނަދާގެ މޭސްތިރިކަމުގެ ދަށުން ލުބްނާނުގައި ބަލަހައްޓަމުންދާ ކިލާ ފަނި ދަނޑުގައި ދިރިއުޅޭ ކިލާ ފަނީގެ އަދަދު މިލިއަނުން ގުނާލެވެއެވެ. އެ ކިލާ ފަނިތައް ދިރިއުޅެނީ އަނގަމަތި ހާއަށް ހުންނަ ޖާޑިތަކުގައެވެ. ކައި އުޅެނީ، ކުނީގެ ގޮތުގައި އުކާލާ ކާބޯތަކެއްޗެވެ.

ނަދާ ބުނާ ގޮތުގައި ކިލާ ފަންޏާމެދު މީހުންނަށް ހީވެފައި އޮންނަނީ މުޅިން ރަނގަޅަކަށް ނޫނެވެ. ކިލާ ފަނީގެ ސަބަބުން ގަސްތަކުގެ މޫތަކަށް ގެއްލުން ލިބިދާނެތޯ ބައެއް މީހުން އޭނާ ގާތު ސުވާލުކުރާ ކަމަށް ނަދާ ބުންޏެވެ. ހުރިހާ ފަންޏަކީ ނުރައްކާ ފަންޏެއް ނޫން ކަމަށާއި، ނުރައްކާ ބާވަތްތައް ނައްތާލުމަށް މަސައްކަތް ކުރަންޖެހޭއިރު، ނަދާގެ ދަނޑުގައި އާލާ ކުރަމުން ދާ ކިލާ ފަންޏަކީ ވެލިގަނޑަށް ފައިދާކުރާ ކިލާ ފަނި ކަމަށް ނަދާ ބުންޏެވެ.

ވަރމިކޮމްޕޯސްޓް ނުވަތަ ކިލާ ފަނި ބޭނުން ކޮށްގެން ގަސްކާނާ އުފެއްދުމުގެ މަރުހަލާ ގުޅެނީ، ކުނީގެ ގޮތުގައި އުކާލާ ކާބޯތަކެތި ކިލާ ފަނީގެ ހަށިގަނޑުގެ ތެރޭގައި ހަޖަމް ކުރުމުގެ ނިޒާމާއެވެ. މި ގޮތަށް ގަސްކާނާ ތައްޔާރު ކުރުމުގެ ސަބަބުން، ކެމިކަލްތަކާއި މަސްނޫއީ މާއްދާތަކުން ސަލާމަތްވެފައިވާ، ވެއްޓާއި ހައްޓާ ރައްޓެހި އުފެއްދުންތަކެއް އުފެއްދެއެވެ.