މޯލްޑިވްސް ޕޯޓްސް ލިމިޓެޑް (އެމްޕީއެލް)އަށް ސާފު ފައިދާ އިތުރުކުރުމަށްޓަކައި ކުންފުނީގެ ޚަރަދުތައް ކުޑަކުރައްވައި، މުވައްޒަފުންގެ ފެންވަރު ރަނގަޅު ކުރުމަށް ގިނަ މަސައްކަތްތައް ކުރެއްވިކަމަށާއި، ނަތީޖާ ވަރަށް ރަނގަޅު ކަމަށް އެކުންފުނީގެ ސީއީއޯ ޝާހިދު އަލީ ވިދާޅުވެއްޖެއެވެ.
ރާއްޖެއެމްވީއަށް ދެއްވި ޚާއްސަ އިންޓަވިޔުގައި ޝާހިދު ވިދާޅުވީ، 2021އާ އަޅައިބަލާއިރު 2022ގައި ލެވަލް އޮފް އޮޕަރޭޝަން ވަރަށް ބޮޑަށް ކުރިއަރައިގެން ދިޔަކަމަށާއި، ކޮވިޑް-19ގެ ހާލަތާ ގުޅިގެން، 2020 ވަނަ އަހަރު ރާއްޖެއަށް އެތެރެކުރެވުނު މުދަލުގެ ބާވަތްތައް އަދަދު ވަރަށް ބޮޑުތަން ދަށްވެގެންދިޔަ ކަމަށެވެ. އަދި 2021 ވަނަ އަހަރުން ފެށިގެން އިމްޕޯޓު އިތުރުވާން ފެށިކަމަށާއި، 2021 ވަނަ އަހަރާ އަޅައިބަލާއިރު 2022 ވަނަ އަހަރު ވަރަށް ބޮޑުތަން ރާއްޖޭގެ އިގްތިސާދު ކުރިއަރައިގެން ދިޔަކަމަށް ޝާހިދު ވިދާޅުވިއެވެ.
ކުންފުނީގެ ރެވެނިއު ބޮޑަށް ގުޅިފައިވަނީ ރާއްޖެއަށް އެތެރެކުރެވޭ މުދަލާކަން ފާހަގަކުރައްވައި ޝާހިދު ވިދާޅުވީ، ކޮންޓެއިނަރުގައި އެތެރެކުރެވޭ މުދަލުގެ އަދަދު އިތުރުވާ ވަރަކަށް ކުންފުނީގެ އާމްދަނީވެސް އިތުރުވާ ކަމަށެވެ. އެގޮތުން 2022 ވަނަ އަހަރު ވަރަށް ބޮޑަށް ފައިދާވިކަން ޝާހިދު ފާހަގަކުރެއްވިއެވެ.
ޝާހިދު ވިދާޅުވީ އާމްދަނީ އިތުރުވެގެން ދިޔައިރު ކުންފުނީގެ ޚަރަދުތައްވެސް ހިފެހެއްޓުމަށް ހަރުދަނާ ފިޔަވަޅުތައް އަޅައި އެގޮތަށް މަސައްކަތްކުރިކަމަށެވެ. އެގޮތުން ކުންފުނީގެ ޚަރަދު ކުޑަކުރިކަމަށް ޝާހިދު ވިދާޅުވިއެވެ.
މީގެ އިތުރުން ޝާހިދު ވިދާޅުވީ މުވައްޒަފުން ތަމްރީން ކުރުމުގެ ތަފާތު ޕްރޮގްރާމްތައް ކުރިއަށް ގެންދެވި ކަމަށެވެ. އެގޮތުން މުވައްޒަފުންގެ ޕްރޮޑަކްޓިވިޓީ ރޭޓް މަތިވުމަކީވެސް ކުންފުންޏަށް ލިބުނު ކުރިއެރުމެއް ކަމަށް ޝާހިދު ވިދާޅުވިއެވެ.
ހަމައެއާއެކު އާމްދަނީ އިތުރުވެގެން ދިޔައިރުވެސް އަޅުގަނޑުމެން މަސައްކަތް ކުރިން ކުންފުނީގެ ޚަރަދުތައް ވެސް ހިފެހެއްޓުމަށް. އެއީ އިތުރުވާ އާމްދަނީއާ އެއްވަރަށް ޚަރަދުތައް ބޮޑުވާ ވަރަކަށް، އަޅުގަނޑުމެންގެ ސާފު ފައިދާ ދަށްވެގެން ދާނެ. ނޫނީ ސާފު ފައިދާ އިތުރު ކުރުމަށް ލިބޭ ފުރުސަތު ކުޑަވެގެންދާނެ. އެހެންވީމަ ޚަރަދު ކުޑަކުރުމުގެ ގޮތުން. އަޅުގަނޑުމެން އެފިޝިއެންސީއަށް ވަރަށް ބެލިން. މިސާލަކަށް އަޅުގަނޑުމެންގެ އޮޕަރޭޝަންތަކުގަ (ވަކިން ޚާއްސަކޮށް ޚަރަދު ބޮޑު އެކްޓިވިޓީތައް، އެއީ ބާޖް އޮޕަރޭޝަން ކަހަލަ، ހެވީ އެކިއުޕްމެންޓް ކަހަލަ) ބޭނުންކުރުން. ތެލުގެ ޚަރަދު ކުޑަކުރުން މިކަހަލަ ކަންތައްތަކަށް ވަރަށް ވިސްނައިގެން އަޅުގަނޑުމެން މަސައްކަތްކުރީ. 2021 ވަނަ އަހަރު މިދަންނަވާހެން ރެވެނިއު އިތުރުވެގެން ދިޔަ ތަނަށް އަޅުގަނޑުމެން އެފިޝިއެންސީ އިތުރުކޮށްގެން، ޚަރަދުތައް މެއިންޓެއިންކޮށްގެން އަޅުގަނޑުމެންގެ ސާފު ފައިދާ ރަނގަޅު ނަތީޖާއެއް ނެރުމަށްޓަކައި މަސައްކަތްކުރީ.އެމްޕީއެލްގެ ސީއީއޯ، ޝާހިދު އަލީ
އެމްޕީއެލްއަށް 2022 ވަނަ އަހަރު އާމްދަނީގެ ގޮތުގައި ޖުމްލަ 809 މިލިއަން ރުފިޔާ ލިބިފައިވާއިރު، މިއީ 2021 ވަނަ އަހަރާ އަޅައިބަލާއިރު، 15 އިންސައްތައިގެ ކުރިއެރުމެކެވެ. ސާފު ފައިދާގެގޮތުގައި ޖުމްލަ 108.9 މިލިއަން ރުފިޔާ ލިބުނުއިރު، މިއީ 2021 އަޅައިބަލާއިރު 43 އިންސައްތަގެ ކުރިއެރުމެއް ކަމަށް އެމްޕީއެލުން ބުނެއެވެ.
މީގެ އިތުރުން ސަރުކާރަށް، ޑިވިޑަންޓުގެގޮތުގައި 67.5 މިލިއަން ރުފިޔާ ދެއްކުމަށް ޑިރެކްޓަރުންގެ ބޯޑުން ވަނީ ފާސްކޮށްފައެވެ. މިއީ 2021 ވަނަ އަހަރާ އަޅައިބަލާއިރު 78 އިންސައްތައިގެ ކުރިއެރުމެކެވެ.
