މިއަހަރުގެ މިނިވަން ދުވަހާ ގުޅިގެން ފޮޓޯ ނެގުމުގެ މުބާރާތެއް މިނިސްޓްރީ އޮފް ހޯމް އެފެއާޒުން އިއުލާނުކޮށްފިއެވެ.

މިއީ ހޯމް މިނިސްޓްރީ އާއި ޔުނައިޓެޑް ފޮޓޯގްރާފަރސް އެސޯސިިއޭޝަނުން ގުޅިގެން ކުރިއަށްގެންދާ މުބާރާތެކެވެ، މިއީ ދިވެހިންގެ ހިތްތަކުގައި ޤައުމީ ރޫހު އާލާކޮށް، ޤައުމިއްޔަތަށް އޮންނަ ލޯތްބާއި ޝައުގު އިތުރުކުރަން ކުރިއަށްގެންދާ މުބާރާތެއް ކަމަށް އެ މިނިސްޓްރީން ބުންޏެވެ.

މި މުބާރާތުގައި 18 އަހަރުން މަތީގެ ކޮންމެ ދިވެއްސަކަށްވެސް ބައިވެރިވެވޭނެއެވެ. މި މުބާރާތުގައި ފޮޓޯ ހުށަހަޅަން ޖެހޭނީ "މިނިވަން އުފާ" ތީމާއި ގުޅުވައިގެންނެވެ. އެ ތީމާގުޅުވައިގެން މައިގަނޑު 4 ދާއިރާއަކުން ފޮޓޯ ހުށަހެޅުމުގެ ފުރުސަތު ވަނީ ހުޅުވާލާފައެވެ. އެއީ ދިވެހިރާއްޖޭގެ ގުދުރަތީ ރީތިކަން، ދިވެހިރާއްޖޭގެ ތާރީޚު، ދިވެހިންގެ އާދަކާދައާއި ސަގާފަތް، އަދި ދިވެހި މުޖުތަމައުގެ މިނިވަންކަމާއި އުފާފާގަތިކަމެވެ.

މި މުބާރާތަށް ފޮޓޯ ހުށަހެޅުމުގެ ފުރުސަތު ހޯމަ ދުވަހު ހުޅުވާލާފައިވާއިރު އަންނަ ޖުލައި މަހުގެ 15 ވަނަ ދުވަހުގެ ނިޔަލަށް އެ ފުރުސަތު އޮންނާނެ ކަމަށް ހޯމް މިނިސްޓްރީން ބުންޏެވެ. މި މުބާރާތުގައި ބައިވެރިވާ ކޮންމެ ފަރާތަކަށްވެސް ގިނަވެގެން 3 ފޮޓޯ ހުށަހެޅިދާނެއެވެ.

މި މުބާރާތުގައި 1 ވަނައަށް ދާ ފޮޓޯއެއް ހުށަހަޅާ ފަރާތަކަށް 15000 ރުފިޔާގެ ފައިސާގެ އިނާމެއް ވަނީ ހުށަހަޅާފައެވެ. އަދި 2 ވަަނައަށް ދާ ފަރާތަކަށް، 7000 ރުފިޔާ، 3 ވަނައަށް ދާ ފަރާތަކަށް 3000 ރުފިޔާގެ ފައިސާގެ އިނާމެއްވެސް ވަނީ ހުށަހަޅާފައެވެ.