އަޟްޙާ ޢީދާ ގުޅިގެން ބަންދު ގިނަ ދުވަސްތަކެއް އައިނަމަވެސް ޕޯޓްގެ އޮޕަރޭޝަނަށް ހުއްޓުމެއް ނާންނާނެ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ސީއީއޯ ޝާހިދު ޢަލީ ވިދާޅުވެއްޖެއެވެ.
ރާއްޖެއެމްވީއަށް ދެއްވި ޚާއްޞަ އިންޓަވިޔުގައި ޝާހިދު ވިދާޅުވީ ޕޯޓް އޮޕަރޭޝަން ބަންދުވާނީ ދެ ދުވަހަށް ކަމަށާއި، އެއީ ހައްޖު ދުވަހާއި އަޟްޙާ ޢީދު ދުވަސް ކަަމަށެވެ. ބަންދަށް ގިނަ ދުވަސްތަކެއް ލިބުނު ނަމަވެސް އެހެން ދުވަސްތަކުގައި މަސައްކަތްތައް ކުރިއަށްދާނެ ކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ ވިޔަފާރިވެރިންނަށް ދަތިނުވާނެހެން ހުރިހާ އިންތިޒާމެއް ހަމަޖައްސަމުންދާކަމަށެވެ.
މިދަންނަވާހެން، ބޯޓު ފަހަރު އަންނަ ރޭޓުގައި އެބަ އާދޭ. ބޯޓުތައް އައިމަ ބޯޓުތައް މަޑުކޮށްފަ ނުބަހެއްޓޭނެ، މުދާ ނުބާލައެއް. އަދި މުދާ ކްލިއަރ ކުރަން ގެންދަން ބޭނުންވާ ފަރާތްތައްވެސް މަސައްކަތް ކުރިއަށް ގެންދާނެ. އެހެންވީމަ ރަސްމީކޮށް މި އަންނަ ދެ ބަންދު ފިޔަވާ އެހެން ހުރިހާ ދުވަހެއްގަ ވެސް އެމްޕީއެލްގެ އޮފަރޭޝަން ބަރާބަރަށް ކުރިއަށްދާނެ. އެހެންވީމަ އީދުތެރޭގަ ވެސް ދަތިތަކެއް ނުވެ ޕޯޓްގެ އޮޕަރޭޝަން ކުރިއަށްދާނެ.އެމްޕީއެލްގެ ސީއީއޯ، ޝާހިދު ޢަލީ
އަޟްޙާ ޢީދު ބަންދާ ދިމާކޮށް ގިނަ އަދަދެއްގެ މުދާ ވަނީ ކްލިއަރ ކޮށްފައެވެ.
ބަންދު ގިނަ ދުވަސްތަކެއް އައިނަމަވެސް ޕޯޓްގެ އޮޕަރޭޝަނަށް ހުއްޓުމެއް ނާންނާނެ ކަމަށް އެމްޕީއެލްއިން ބުނެފައިވާއިރު، މިމަހުގެ 25ން 29ށް ވަނީ ސަރުކާރުގެ ބަންދު ދުވަސްތަކުގެ ގޮތުގައި ކަނޑައަޅާފައެވެ. އެހެންކަމުން ދެން ސަރުކާރު ހުޅުވޭނީ ޖުލައި 2 ވާ ހޯމަ ދުވަހެވެ.
