ހައްޖަށް މީހުން ގެންދިއުމަށް ހުއްދަ ދީފައިވާ ކުންފުނިތަކުން ބޮޑެތި އަދަދުތަކުން ފައިސާ ނަގާ މައްސަލަ ރަސްމީކޮށް ހުށަހަޅައިފިނަމަ އެމައްސަލަ ބަލާނެކަމަށް އިސްލާމިކް މިނިސްޓްރީން ބުނެފިއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި، އިސްލާމިކް މިނިސްޓްރީގެ ޕަރމަނަންޓް ސެކްރެޓަރީ އަހްމަދު އަދީލް ވިދާޅުވީ ހައްޖު ކޯޕަރޭޝަން ފިޔަވައި އަމިއްލަ ތިން ކުންފުންޏަށް ހައްޖު ކޯޓާ ދޫކުރުމަށް އިއުލާންކުރިކަމަށެވެ. އަދި އެ އިއުލާނުގައި ހުރިހާ ކަމެއް ބަޔާންކޮށްފައިވާކަން އޭނާ ފާހަގަކުރެއްވިއެވެ.
އަދީލް ވިދާޅުވީ ހައްޖަށް މީހުން ގެންދިއުމުގައި އަމަލުކުރަންވީ ގޮތާއި، އަގުތައްވެސް އާއްމުކޮށްފައިވާކަމަށެވެ.
މީގެ އިތުރުން އަދީލް ވިދާޅުވީ އަމިއްލަ ކުންފުނިތަކުން މީހުން ހައްޖަށް ގެންދިއުމަށް ބޮޑެތި އަގު ނަގާ މައްސަލަ ސޯޝަލް މީޑިއާގެ ޒަރީއާއިން ސަމާލުކަމަށް އައިސްފައިވާ ކަމަށެވެ. ނަމަވެސް އެ މައްސަލަ ރަސްމީ ސިފައެއްގައި ހުށަހަޅާފައި ނުވާޖަމަށާއި، އެ މައްސަލަ ހުށަހަޅާފައިނުވާތީ އޭގެ އެއްވެސް ހެއްކެތް ނެތްކަމަށެވެ.
އަދީލް ވިދާޅުވީ އެމައްސަލަ ހުށަހަޅައިފިނަމަ، އޮންނަ އުސޫލުގެ ތެރެއިން ބަލާނެ ކަމަށާއި، އަޅަންޖެހޭ ފިޔަވަޅުތައް އަޅާނެކަމަށެވެ.
އިއުލާން ކުރެވިގެން އެ ބިޑްތައް އިވެލުއޭޓްކޮށް ތިން ކުންފުންޏާ ހަވާލުކުރުމަށްފަހު އަޅުގަނޑުމެންގެ ވެބްސައިޓުގަވެސް، ސޯޝަލް މީޑިއާގައިވެސް އާއްމުކޮށްފަ ވާނެ އެކުންފުނިތަކާ އަޅުގަނޑުމެން ވެފަ ވާ އެއްބަސްވުންތައް. އަދި އަގުތައްވެސް. ހައްޖަށް ގެންދިއުމަށް އެއްބަސްވެފަ ވާ އަގުތައްވެސް ވާނީ އާއްމުކުރެވިފަ. ބޮޑު އަގުގަ ގެންދާކަން ރަސްމީ ސިފައެއްގަ މައްސަލައެއް ހުށަހެޅިފައެއްނުވޭ. ނަމަވެސް ސޯޝަލް މީޑިއާގެ ވަސީލަތްތަކުން އަޅުގަނޑުމެންނަށް އެކަހަލަ ޝަކުވާ ލިބޭ. ނަމަވެސް ރަސްމީކޮށް ޝަކުވާއެއް ގޮތުގަ އެ އިދާރާއަށް އުފުލާނެފަދަ ޝަކުވާއެއް ލިބިފައެއްނުވޭ.އިސްލާމިކް މިނިސްޓްރީގެ ޕަރމަނަންޓް ސެކްރެޓަރީ، އަހްމަދު އަދީލް
އިތުބާރު ހުރި ފަރާތަކުން ރާއްޖެއެމްވީއަށް މައުލޫމާތު ދިން ގޮތުގައި، އަމިއްލަ ކުންފުނިތަކުން މީހުން ހައްޖަށް ގެންދިއުމަށް 135،000 ރުފިޔާ ނަގައެވެ. މި ގޮތަށް ހައްޖަށް ގެންދަނީ ދެފަރާތުން އެއްބަސްވެގެން ކަމަށާއި، ފައިސާ ދައްކަނީވެސް ކޭޝްއިން ކަމަށެވެ. އަދި ގިނައިން މިގޮތަށް ފުރުސަތު ހޯދަމުންދަނީ ފައިސާވެރި، މުއްސަނދިން ކަަމަށް އެބޭފުޅާ ވިދާޅުވިއެވެ.
