އިލެކްޝަންސް ކޮމިޝަންގެ ރައީސް ފުއާދު ތައުފީގުގެ މައްޗަށް އިތުބާރު ނެތްކަމަށް ވިދާޅުވެ، އަލީ ނަޝާތުއާއި މުހައްމަދު އާސިފް ޖަލްސާގައި ބައިވެރިވެވަޑައިގަތުމަށް ދެކޮޅު ހައްދަވައިފިއެވެ.
އީސީން ބުދަ ދުވަހު ބާއްވަން އުޅުނީ ރައްޔިތުން މަޖިލީހުގެ ރައީސް މުހައްމަދު ނަޝީދު އިސްވެ ހުންނަވައި އަލަށް އުފައްދަވަން މަސައްކަތް ކުރައްވަމުން ގެންދަވާ "ދަ ޑިމޮކްރެޓްސް" އުފެއްދުމުގެ ހުއްދަ ދިނުމާ ގުޅޭގޮތުން ގޮތެއް ނިންމުމުގެ ޖަލްސާއެވެ.
ރާއްޖެއެމްވީއަށް ނަޝާތު ވިދާޅުވީ، ކޮމިޝަންގެ ރައީސް ގާނޫނުތަކާއި ގަވާއިދުތަކާއި ޚިލާފުވެވަޑައިގަތުމުން ރައީސްގެ މައްޗަށް މިހާރު އިތުބާރު ގެއްލިފައިވާކަމަށެވެ.
މި މަހުގެ 18 ވަނަ ދުވަހު ކޮމިޝަނުން ބޭއްވި ބައްދަލުވުމުގައި، ޑިމޮކްރެޓްސް ޕާޓީ އުފެއްދުމަށް ފާސްވެއްޖެކަމަށް ރިޔާސަތުން ނިންމެވިކަމަށާއި، ޖަލްސާ ނިންމަވައިލެއްވީވެސް އެގޮތަށް ކަމަށް ނަޝާތު ވިދާޅުވިއެވެ.
ޖަލްސާގައި ފާޅުކުރައްވާ ޚިޔާލަކީ ކޮންމެ މެމްބަރަކުވެސް މިނިވަންކަމާއެކު ފާޅުކުރައްވާ ޚިޔާލެއްކަމަށާއި، 18 ވަނަ ދުވަހުގެ ރޭ އީސީގައި ތިބި މީހުންނަށް ފުއާދު ދެއްވީ ދޮގު މައުލޫމާތު ކަމަށް ނަޝާތު ވަނީ ތުހުމަތު ކުރައްވާފައެވެ. އެ މައުލޫމާތު އެގޮތަށް ދެއްވުމުން މިހާރު މީހުން ފުރައްސާރަކޮށް އެކި ކަހަލަ އިންޒާރު ދެމުންދާކަމަށްވެސް އޭނާ ވިދާޅުވިއެވެ.
ކޮމިޝަންގެ ރައީސްގެ މަސްއޫލިއްޔަތުގެ ތެރޭގައި؛ ކޮމިޝަންގެ މަސްލަހަތު ހިފެއްޓުން އޮންނަކަމަށާއި، ވޯޓް ނުލިޔަސް އެ މެމްބަރެއްގެ ނަން ހާމަކުރެއްވުމަކީ ކޮމިޝަންގެ ރައީސަށް ކުރެއްވޭނެ ކަމަށް ނޫންކަމަށް ނަޝާތު ވިދާޅުވިއެވެ.
ނަޝާތު އިތުރަށް ވިދާޅުވީ ޕާޓީ އުފެއްދުން ފާސްނުކުރެއްވުމަށް މެމްބަރުން ދެއްކެވި ސަބަބުތަކަކީ ދޮގުރައީސް ވިދާޅުވުން ގޯސް ކަމަށެވެ. އަދި އެއްވެސް އިރެއްގައި ޕާޓީ އުފެއްދުމަށް ހުއްދަ ނުދެއްވަން ނޫޅުއްވާކަމަށް އޭނާ ވިދާޅުވިއެވެ.
ނަޝާތުގެ މި ތުހުމަތުތަކާ ގުޅިގެން ރާއްޖެއެމްވީން ސުވާލު ދެންނެވުމުން ފުއާދު ވިދާޅުވީ، ދެ މެމްބަރުން ޖަލްސާއަށް ހާޒިރުވެވަޑައިނުގަންނަވާ ކަމަށް ބިއުރޯގެ ގްރޫޕެއްގައި ލިޔުއްވިކަމަށެވެ. ފުއާދު ވިދާޅުވީ ނަޝާތު އެބޭފުޅާގެ މައްޗަށް ކުރައްވާ ތުހުމަތުތަކަކީ ދޮގު ތުހުމަތުތަކެއް ކަމަށެވެ.
އީސީ ބަދުނާމުވާން އަންނަ ތަނެއްގައި، ރައްޔިތުންނަށް ކަން ވާގޮތް ސާފުކޮށްދެއްވަން ޖެހޭނެކަމަށާއި، ޑިމޮކްރެޓްސްގެ ފޯމްތައް ވަރަށް ރަނގަޅަށް ކޮމިޝަނުން ޗެކްކުރިކަމަށް ފުއާދު ވިދާޅުވިއެވެ. ވަކި ޕާޓީއަކަށް ވުމުން ކޮށްދެއްވި ކަމެއް ނޯންނާނެ ކަމަށާއި، އެއްވެސް މީހަކު ކުރާނެ އެއްވެސް ތުހުމަތެއް ނޯންނާނެ ކަމަށްވެސް އޭނާ ވިދާޅުވިއެވެ.
ފުއާދު އިތުރަށް ވިދާޅުވީ އެ ދެ މެމްބަރުން ބޮޑާދެއްކެވުމަށްފަހު ޖަލްސާއަށް ވަޑައިނުގަތުމަކީ ރައްޔިތުންނަށް ވާ ޚިޔާނާތެއް ކަމަށާއި، މަސައްކަތަށް ވާ ޚިޔާނާތެއް ކަމަށެވެ. މިހާތަނަށްވެސް، އަދި ކުރިއަށް އޮތްތަނުގައިވެސް މަސައްކަތް ކުރައްވާނީ އިންސާފުވެރިކޮށް ކަމަށް ފުއާދު ވިދާޅުވިއެވެ.
ފުއާދު ވަނީ، ރައީސް ކަމުގެ ދަހިވެތިކަމުގައި ކޮމިޝަނުންގެ ބައެއް މެމްބަރުން އެބޭފުޅާ މަގާމުން ބޭރު ކުރެއްވުމަށް މަސައްކަތް ކުރައްވާ ކަމަށް ތުހުމަތު ކުރައްވާފައެވެ.
ޑިމޮކްރެޓްސްއަށް ހުއްދަދިނުމަށް ޖަލްސާއެއް ދެން ބާއްވާނެ ދުވަހެއް ފުއާދު ވިދާޅެއްނުވެއެވެ. އެ ޕާޓީއަށް ހުއްދަ ދިނުމަށް މި މަހުގެ 18ގައި ވެސް ވަނީ ބައްދަލުވުމެއް ބާއްވާފައެވެ. އެ ބައްދަލުވުމަށް ހާޒިރުވެވަޑައިގެންނެވީ ފުއާދުގެ އިތުރުން ނައިބު ރައީސް އިސްމާއީލް ހަބީބާއި މެމްބަރު އަލީ ނަޝާތާއި މުހައްމަދު އާސިފެވެ. އެ ކޮމިޝަނުގެ މެމްބަރު ޑރ. މުހައްމަދު ޒާހިރު ހުންނެވީ ހައްޖުގެ އަޅުކަން އަދާކުރެއްވުމަށް ސައޫދީގައެވެ.
