ހުޅުމާލެ ފޭސް 2ގައި ހުންނަ ހިޔާ ފްލެޓްގެ ދެ އެޕާޓްމަންޓެއްގެ އިންފާރު ތަޅާލައި އެއްކޮށްލާފައިވާއިރު، އެއްކޮށްލި ދެ އެޕާޓްމަންޓު އަތުނުލާން އާބަންކޯއިން ނިންމައިފިއެވެ.

އާބަންކޯއިން ބުނީ، ފްލެޓްގެ ވެރިފަރާތުން ދެ އެޕާޓްމެންޓް ވަކިކޮށްލުމަށް ފާރު ރޭނުމުގެ މަސައްކަތް ކުރަމުންދާ ކަމަށާއި، ވުމާއެކު އާބަންކޯއިން ނިންމާފައި ވަނީ ފްލެޓް އަތުނުލާން ކަމަށެވެ.

އެހެންނަމަވެސް، ޖޫރިމަނާއާމެދު އަދި ވަކި ގޮތެއް ނުނިންމާކަމަށް އާބަންކޯއިން މައުލޫމާތުދެއެވެ.

އެ ކޯޕަރޭޝަނުން ހަދާފައިވާ އުސޫލުތަކާ ހިލާފަށް ދެފަރާތުން ދެ އެޕާޓްމަންޓުގެ މެދު ފާރު ތަޅާލައި، 4 ކޮޓަރީގެ އެއް އެޕާޓްމަންޓަކަށް ބަދަލުކޮށްފައިވާއިރު، މި މައްސަލަ ބެލުމަށްފަހު ކޮންމެ އެޕާޓްމަންޓެއް، 100،000 ރުފިޔާއިން ޖޫރިމަނާކޮށް، ފަސް ދުވަހުގެ ތެރޭގައި ދެ ފަރާތުންވެސް އެ ފައިސާ ދެއްކުމަށް އޭރު އެންގިއެވެ.

އަދި 10 ދުވަހުގެ ތެރޭގައި, އެޕާޓްމަންޓް ހަވާލު ކުރާއިރު ތަން ކުރިން ހުރި ގޮތަށް އިއާދަކުރުމަށްވެސް އެންގިއެވެ. ނަމަވެސް މިކަން މި މުއްދަތުގައި ކޮށްފައިނުވާތީ، 14 ދުވަހުގެ ތެރޭގައި އެ ކޯޕަރޭޝަނަށް އެޕާޓްމަންޓް ހަވާލުކުރުމަށް އާބަންކޯއިން ވެރިފަރާތަށް އެންގިއެވެ.

ހުޅުމާލެ ފޭސް 2ގައި ހުންނަ ހިޔާ ފްލެޓްގެ ދެ އެޕާޓްމަންޓެއްގެ އިންފާރު ތަޅާލައި އެއްކޮށްލުމުން، ކޮންމެ އެޕާޓްމެންޓެއް 14 ދުވަހުގެ ތެރޭގައި އާބަންކޯއާ ހަވާލުކުރުމަށް އެންގި އެންގުމާއި ގުޅިގެން، އެކަން ހުއްޓުވުމުގެ ވަގުތީ އަމުރަކަށް އެދުނު ނަމަވެސް އެ ފަދަ އަމުރެއް ކޯޓުން ނެރެދީފައެއް ނުވެއެވެ.