ރިޔާސީ އިންތިޚާބު އޮބްޒާވް ކުރުމަށް ޔޫރަޕިއަން ޔޫނިއަން (އީޔޫ)އާއި އިލެކްޝަންސް ކޮމިޝަނާ (އީސީ) ދެމެދު އެޑްމިނިސްޓްރޭޝަން އެރޭންޖްމަންޓެއްގައި ސޮއިކޮށްފިއެެވެ.

މިކަމާއި ގުޅިގެން އީސީން ބުނީ ރިޔާސީ އިންތިޚާބު އޮބްޒާވް ކުރުމަށް، ބައިނަލްއަގުވާމީ ޖަމިއްޔާ ޖަމާއަތްތަކަށް އެރުވުނު ދަޢުވަތުގެ ތެރެއިން، ޔޫރަޕިއަން ޔޫނިއަން އަށް އެރުވި ދަޢުވަތު ގަބޫލުކުރުމާ ގުޅިގެން، އީ.ޔޫ އާއި އީސީއާ ދެމެދު އެޑްމިނިސްޓްރޭޝަން އެރޭންޖްމަންޓެއްގައި ސޮއިކުރައްވާފައިވަނީ އީސީގެ ރައީސް ފުއާދު ތައުފީޤާއި ލާރސް ބްރެޑަލް ކަމަށެވެ.

ރިޔާސީ އިންތިޚާބު 2023 އޮބްޒަރވްކުރުމަށް 15 ގައުމަކަށް ރަސްމީކޮށް ދައުވަތު ފޮނުވާފައިވާކަމަށް އީސީން ވަނީ މީގެކުރިން ބުނެފައެވެ.

މި 15 ގައުމުގެ ތެރޭގައި ހިމެނެނީ ޖޯޖިއާ، ފިލިޕީންސް، އިންޑޮނޭޝިއާ، ތައިލެންޑް، ސައުތު ކޮރެއާ، ސައުތު އެފްރިކާ، ކިރްގިސްތާން، ހޮންޑިއުރަސް, ސްރީލަންކާ، ބޮސްނިއާ، އޮސްޓްރޭލިއާ، ޖޯޑަން، ކެނެޑާ، ޖަޕާން އަދި ނޭޕާލެވެ.

ރިޔާސީ އިންތިޚާބު 2023 އޮބްޒަރވްކުރުމަށް 15 ގައުމަކަށް ރަސްމީކޮށް ދައުވަތު ފޮނުވާފައިވާއިރު، މިއަހަރުގެ ރިޔާސީ އިންތިޚާބުގައި 150 މީހުން ރަޖިސްޓަރީކޮށްފިނަމަ 8 ގައުމެއްގައި ވޯޓުލާ މަރުކަޒު ގާއިމްކުރުމަށް އީސީން ވަނީ ނިންމާފައެވެ.

އެގޮތުން އިންޑިޔާގެ ޓްރިވެންޑްރަމް، ނިއު ދިއްލީ، ސްރީލަންކާގެ ކޮލަމްބޯ، މެލޭޝިޔާގެ ކުއަލަ ލަމްޕޫރު، ސިންގަޕޫރު، އިނގިރޭސި ވިލާތުގެ ލަންޑަން، ބެންގކޮކް، އެކުވެރި އަރަބި އިމާރާތުގެ އަބޫދާބީ އަދި ޖަޕާނުގެ ޓޯކިޔޯގައި ވޯޓުލުމަށް 150 މީހުން ރަޖިސްޓަރީކޮށްފިނަމަ އެ 8 ގައުމުގެ 9 ސިޓީގައި، ވޯޓުލާ މަރުކަޒު ގާއިމްކުރުމަށް ކޮމިޝަނުން ނިންމާފައިވެއެވެ.

ކުރިއަށް އޮތް ރިޔާސީ އިންތިޚާބަށް ތައްޔާރުވުމުގެ މަސައްކަތް އީސީން ކުރަމުންދާއިރު، ވީހާވެސް ގިނަ ރައްޔިތުންނަށް ވޯޓު ލެވޭނެ އިންތިޒާމް ހަމަޖެއްސުމުގެ މަސައްކަތް ކޮމިޝަނުން ދަނީ ކުރަމުންނެވެ. އަދި ރިޔާސީ އިންތިޚާބަކީ އިންސާފުވެރި، ދެފުށް ފެންނަ އިންތިޚާބަކަށް ވާނެކަމުގެ ޔަގީންކަން ކޮމިޝަނުން ދެއެވެ.

މިއަހަރު ބާއްވާ ރިޔާސީ އިންތިޚާބުގައި 282،755 މީހުންނަށް ވޯޓުލުމުގެ ހައްގު ލިބިފައިވާ އެކަމަށް އީސީން ހާމަކޮށްފައިވާއިރު އެންމެފަހުން 2018 ވަނަ އަހަރު ބޭއްވި ރިޔާސީ އިންތިޚާބުގައި ވޯޓުލުމުގެ ހައްގު ލިބިފައިވަނީ 263،000 މީހުންނަށެވެ.