ރާއްޖޭގެ ފަތުރުވެރިކަން ކުރިއެރުވުމަށް ސަރުކާރުން ގެންގުޅޭ ސިޔާސަތުތަކަށް ޔޫއެންގެ ވޯރލްޑް ޓުއަރިޒަމް އޯގަނައިޒޭޝަން (ޔޫއެންޑަބްލިއުޓީއޯ)ގެ ސެކްރެޓަރީ ޖެނެރަލް، ޒޫރަބް ޕޮލޮލިކަޝްވިލި ތައުރީފްކުރައްވައިފިއެވެ.
އޭނާ މިފަދައިން ވިދާޅުވީ 35 ވަނަ ޔޫއެން ވޯރލްޑް ޓޫރިޒަމް އޯގަނައިޒޭޝަންގެ ކޮމިޝަން ފޯރ އޭޝިއާ އެންޑް ދަ ޕެސިފިކްގެ ހަވާސާގައި ރާއްޖޭގެ ޓުއަރިޒަމް މިނިސްޓަރު ޑރ. އަބްދުﷲ މައުސޫމާ ބައްދަލުކުރެއްވުމަށްފަހު ކުރެއްވި ޓްވީޓެއްގައެވެ.
އެ ޓްވީޓުގައި ރާއްޖޭގެ ފަތުރުވެރިކަން އަލުން އާރާސްތުކުރަނީ މުސްތަގުބަލަށް ވިސްނައިގެން ކަމަށް އޭނާ ވިދާޅުވިއެވެ. އޭނާ ވަނީ ރާއްޖޭގެ ފަތުރުވެރިކަން ދަނީ ރަނގަޅު މިސްރާބަކާ ދިމާއަށް ކަމަށްވެސް ވިދާޅުވެފައެވެ.
އަދި އިންޓަރނޭޝަނަލް ކޯޑް ފޯރ ދަ ޕްރޮޓެކްޝަން އޮފް ޓުއަރިސްޓްސްގައި ބައިވެރިވުމަކީ ރާއްޖޭގެ ފަތުރުވެރިކަމަށް ލިބޭނެ ކުރިއެރުމެއްކަން ޒޫރަބް ފާހަގަކުރެއްވިއެވެ.
ޓުއަރިޒަމް މިނިސްޓަރު އަބްދުﷲ މައުސޫމް ވިދާޅުވީ، އިންޓަރނޭޝަނަލް ކޯޑް ފޯރ ދަ ޕްރޮޓެކްޝަން އޮފް ޓުއަރިސްޓްސްއަކީ ފަތުރުވެރިންގެ އިތުބާރާއި ޔަގީންކަން ބޮޑުވެ، ކުރިއަށްވުރެ ރަނގަޅު ފަތުރުވެރިކަމުގެ ސިނާއަތެއް ބިނާކުރުމަށް އެޅޭ ފިޔަވަޅެއް ކަމަށެވެ.
ޔޫއެންޑަބްލިއުޓީއޯއިން މަސައްކަތް ކުރަމުން ދަނީ ފަތުރުވެރިކަމަށް ބޭނުންވާ ރަނގަޅު އިންވެސްޓްމެންޓްތައް ހޯދައިދީ، ރަނގަޅު ޕްލޭންތަކާއެކު ގައުމުތަކުގެ ފަތުރުވެރިކަން ކުރިއަރުވައި ދެމެހެއްޓުމުގައި މުހިންމު ބައިވެރިއެއްގެ ގޮތުގައެވެ.
