ރާއްޖެއާއި ޔޫރަޕިއަން ޔޫނިއަންއާ ދެމެދު ބާއްވާ ހަތަރުވަނަ ސީނިއަރ އޮފިޝަލްސް ބައްދަލުވުމުގައި ބައިވެރިވާ ރާއްޖޭގެ ވަފުދު ބެލްޖިއަމްގެ ބްރަސަލްސްއަށް ފުރައިފިއެވެ.

މި ވަފުދު ބްރަސަލްސްއަށް ފުރާފައިވަނީ އާދީއްތަ ދުވަހުއެވެ.

ސީނިއާ އޮފިޝަލުންގެ ބައްދަލުވުމަކީ ރާއްޖެއާއި ޔޫރަޕިއަން ޔޫނިއަންއާ ދެމެދު ދެފުށް ފެންނަ އަދި ހެޔޮ މުއާމަލާތްތައް ކުރިއަށް ގެންދިއުމަށް ޕްލެޓްފޯމެއްގެ ގޮތުގައި ކޮންމެ އަހަރަކު ބާއްވާ ބައްދަލުވުމެކެވެ. މި ބައްދަލުވުމަކީ ރާއްޖެއާއި ޔޫރަޕިއަން ޔޫނިއަންއާ ދެމެދު މިހާރު އޮތް އެކުވެރިކަމާއި އެއްބާރުލުމުގެ ގުޅުން އިތުރަށް ބަދަހިކުރުމަށް މަގުފަހިވެގެންދާ ބައްދަލުވުމެކެވެ.

މިއަހަރަކީ މި ބައްދަލުވުން ބާއްވާ ހަތަރުވަނަ އަހަރެވެ. މި ބައްދަލުވުން ބޭއްވުމަށް ހަމަޖެހިފައިވަނީ 2023 ވަނަ އަހަރުގެ ޖޫން މަހުގެ 13 ވަނަ ދުވަހުއެވެ.

މިއަހަރުގެ ބައްދަލުވުމުގެ އެޖެންޑާގައި އީޔޫ އާއި ރާއްޖޭގެ ތަރައްގީއާއި ޕޯސްޓް ކޮޓޯނޯ އެގްރީމެންޓް ފަދަ ތަފާތު މައުޟޫތަކާ ބެހޭ ގޮތުން މަޝްވަރާކުރުން ހިމެނެއެވެ. އަދި ވެރިކަން ހިންގުމާއި ޑިމޮކްރަސީ އާއި އިންސާނީ ހައްގުތަކާއި ގާނޫނުގެ ވެރިކަމާއި ހަރުކަށި ފިކުރު ހުއްޓުވުމާއި ޓެރަރިޒަމާ ދެކޮޅަށް މަސައްކަތް ކުރުން ހިމެނެއެވެ. މީގެ އިތުރުން އިޤްތިޞާދީ އަދި ވިޔަފާރީގެ ދާއިރާއިން އެއްބާރުލުން ދިނުމާއި ތިމާވެއްޓާއި މޫސުމަށް އަންނަ ބަދަލުތަކާއި ތަރައްޤީގެ ދާއިރާއިން އެއްބާރުލުން ދިނުމާއި މަސްވެރިކަމުގެ ދާއިރާއަކީވެސް މިއަހަރުގެ ޖަލްސާއަށް އެޖެންޑާކޮށްފައިވާ މައުޟޫޢުތަކެވެ.

މީގެ އިތުރުން ޝެންގެން ވިސާ ފެސިލިޓޭޝަން އާއި އދ.ގައި އެއްބާރުލުން ދިނުމާއި ސަރަހައްދީ ތަރައްގީއާއި މެރިޓައިމް ސެކިއުރިޓީއާ ބެހޭ ގޮތުން މަޝްވަރާ ކުރުމަށް ވަނީ ހަމަޖެހިފައެވެ.

ރާއްޖޭގެ ވަފުދުގައި އިސްކޮށް ހުންނަވާނީ މިނިސްޓަރ އޮފް ސްޓޭޓް ފޮރ ފޮރިން އެފެއާޒް އަޙްމަދު ޚަލީލެވެ. މީގެ އިތުރުން މިނިސްޓްރީ އޮފް ފޮރިން އެފެއާޒް، ރައީސް އޮފީސް، މިނިސްޓްރީ އޮފް އިކޮނޮމިކް ޑިވެލޮޕްމަންޓް، މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ، މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީ، މޯލްޑިވްސް ޕޮލިސް ސަރވިސް އަދި ނޭޝަނަލް ކައުންޓަރ ޓެރަރިޒަމް ސެންޓަރުގެ އިސްވެރިން މިވަފުދުގައި ބައިވެރިވެވަޑައިގަންނަވައެވެ.

ޔޫރަޕިއަން ޔޫނިއަންގެ ވަފުދުގައި އިސްކޮށް ހުންނަވާނީ ޔޫރަޕިއަން އެކްސްޓާނަލް އެކްޝަން ސާވިސްގެ ޑެޕިއުޓީ މެނޭޖިން ޑިރެކްޓަރު ޕައޯލާ ޕަމްޕަލޯނީއެވެ.

މި ދަތުރުފުޅުގައި ރާއްޖޭގެ ވަފުދުގެ ފަރާތުން އޯގަނައިޒޭޝަން އޮފް ދަ އެފްރިކަން، ކެރިބިއަން އެންޑް ޕެސިފިކް ސްޓޭޓްސް (އޯއޭސީޕީއެސް)ގެ ސެކްރެޓަރީ ޖެނެރަލް ޖޯޖަސް ރެބެލޯ ޗިކޯޓީއާ ވެސް ބައްދަލުކުރައްވާނެއެވެ.

އަދި ޔޫރަޕިއަން އެކްސްޓާނަލް އެކްޝަން ސާވިސް (އީއީއޭއެސް)ގެ އޭޝިއާ އެންޑް ޕެސިފިކްގެ މެނޭޖިން ޑިރެކްޓަރު ގުނަރު ވިގަންޑް, ޑައިރެކްޓްރޭޓް ޖެނެރަލް މެރިޓައިމް އެފެއާޒް އެންޑް ފިޝަރީޒް (މާރޭ)ގެ ޑިރެކްޓަރ ޖެނެރަލް ޗާލައިން ވިޗޭވާ, އީޔޫގެ ކައުންޓާ ޓެރަރިޒަމް ކޯޑިނޭޓަރު އިލްކާ ސަލްމީ, ޑައިރެކްޓްރޭޓް ޖެނެރަލް އިންޓަނޭޝަނަލް ޕާޓްނާޝިޕްސް (އައިއެންޓީޕީއޭ) ގެ ޑެޕިއުޓީ ޑިރެކްޓާ ޖެނެރަލް މައިރިއަމް ފެރާން, އަދި ޑައިރެކްޓްރޭޓް ޖެނެރަލް ޓްރޭޑް (ޓްރޭޑް)ގެ ޑިރެކްޓަރ ޖެނެރަލް ސަބީން ވެޔަންދުއާ ވެސް ބައްދަލުކުރައްވާނެއެވެ.