ރިޔާސީ ކެންޑިޑޭޓެއްގެ ގޮތުގައި ޝަރުތު ހަމަވުމާއި، ހެޔޮ ވެރިކަމެއް ކުރަން އެނގުމަކީ މުޅިން ތަފާތު ކަމެއް ކަމަށް، ހޯމް މިނިސްޓަރު އިމްރާން އަބްދުﷲ ވިދާޅުވެެއްޖެއެވެ.

އަދާލަތު ޕާޓީގެ ރައީސްގެ މަގާމުގައި ހުންނެވި އިމްރާން ވިދާޅުވީ، ރިޔާސީ ކެންޑިޑޭޓެއްގެ ޝަރުތުތައް ހަމަވުމާއި ކުރިމަތިލައިގެން ކެމްޕޭންކުރުމަކީ ތަފާތު ދެ ކަމެއް ކަމަށެވެ. އަދި ރައްޔިތުންގެ ވޯޓުން ހޮވުމަކީވެސް މުޅީން އެހެން ކަމެއް ކަމަށް އިމްރާން ވިދާޅުވިއެވެ.

އިމްރާން ވިދާޅުވީ ކާމިޔާބު ވެރިކަމެއް ކުރެވޭނީ އެ ހުރިހާ ކަމެއް ފުރިހަމަ ކުރެވިގެން ކަމަށެވެ.

އިމްރާން މިހެން ވިދާޅުވެފައިވާއިރު، އަދާލަތު ޕާޓީން ވަނީ މިސަރުކާރަށް ތާއީދުކުރަން ނިންމާފައެވެ. ރައީސް އިބްރާހީމް މުހައްމަދު ސާލިހަކީ ރައްޔިތުންނާއި ގައުމަށް ހެޔޮ ވެރިކަމެއް ކޮށްދެއްވާ ރައީސެއް ކަމަށާއި، ދެވަނަ ދައުރެއް ދޭންޖެހޭ ކަމަށް އަދާލަތު ޕާޓީން ބުނެއެވެ. ނަމަވެސް ކޯލިޝަންގައި ހިމެނޭ ޖުމްހޫރީ ޕާޓީ (ޖޭޕީ)ގެ ލީޑަރު ގާސިމް އިބްރާހީމް ވަނީ ރިޔާސީ އިންތިޚާބުގައި ވާދަކުރައްވާނެކަން އިއުލާން ކުރައްވާފައެވެ.

މިއަހަރު ބާއްވާ ރިޔާސީ އިންތިޚާބުގައި ރައީސް އިބްރާހީމް މުހައްމަދު ސާލިހުގެ އިތުރުން އެހެން ސިޔާސީ ޕާޓީތަކުގެ ބޭފުޅުންވެސް ވާދަކުރައްވާނެއެވެ. އެގޮތުން މޯލްޑިވްސް ނެޝަނަލް ޕާޓީގެ ރައީސް މުހައްމަދު ނާޒިމް، އަދި އަމިއްލަގޮތުން ޑރ. މުހައްމަދު މުނައްވަރު ވާދަކުރައްވާނެކަން އިއުލާން ކުރައްވާފައިވެއެވެ. އަދި ޕީޕީއެމް/ޕީއެންސީގެ ރިޔާސީ ޓިކެޓް ލިބިވަޑައިގެންފައިވަނީ މިހާރު ޖަލުގައި ހުންނެވި، ކުރީގެ ރައީސް އަބްދުﷲ ޔާމީނަށެވެ. ނަމަވެސް ހުކުމެއް ތަންފީޒު ކުރައްވަމުން ގެންދަވާތީ، އެމަނިކުފާނަށް އިންތިޚާބުގައި ވާދައެއް ނުކުރެއްވޭނެއެވެ.

ރައީސުލްޖުމްހޫރިއްޔާއަކަށް އިންތިޚާބުކުރާ މީހެއްގެ ކިބާގައި ހުންނަންޖެހޭ ޝަރުތުތައް ގާނޫނުއަސާސީގެ 109 ވަނަ މާއްދާގައި ސާފުކޮށް ބަޔާންކޮށްފައިވެއެވެ. ގާނޫނު އަސާސީގެ 109 ވަނަ މާއްދާގައި ބުނެފައިވާ ގޮތުން؛ ޖިނާއީ ކުށެއް ކުރިކަން ސާބިތުވެ، އެއްއަހަރަށްވުރެ ދިގު ހުކުމެއް އައިސްފައިވާ މީހަކުނަމަ އެމީހަކަށް ރިޔާސީ އިންތިޚާބުގައި ވާދަކުރެވޭނީ އަދަބު ތަންފީޒުކޮށް ނިމޭތާ 3 އަހަރު ފަހުންނެވެ. އެހެންކަމުން ދަށު ކޯޓުގެ އެ ހުކުމް ބާތިލު ނުކުރާހާ ހިނދަކު ޔާމީނަށް އިންތިޚާބުގައި ވާދަކުރެއްވުމުގެ ފުރުސަތެއް ނޯންނާނެއެވެ.

ކުރިއަށް އޮތް ރިޔާސީ އިންތިޚާބަށް ތައްޔާރުވުމުގެ މަސައްކަތް އިލެކްޝަން ކޮމިޝަން (އީސީ)ން ކުރަމުންދާއިރު، ވީހާވެސް ގިނަ ރައްޔިތުންނަށް ވޯޓު ލެވޭނެ އިންތިޒާމް ހަމަޖެއްސުމުގެ މަސައްކަތް ކޮމިޝަނުން ދަނީ ކުރަމުންނެވެ. އަދި ރިޔާސީ އިންތިޚާބަކީ އިންސާފުވެރި، ދެފުށް ފެންނަ އިންތިޚާބަކަށް ވާނެކަމުގެ ޔަގީންކަން ކޮމިޝަނުން ދެއެވެ.

މިއަހަރު ބާއްވާ ރިޔާސީ އިންތިޚާބުގައި 282،755 މީހުންނަށް ވޯޓުލުމުގެ ހައްގު ލިބިފައިވާކަމަށް އީސީން ހާމަކޮށްފައިވާއިރު، އެންމެފަހުން 2018 ވަނަ އަހަރު ބޭއްވި ރިޔާސީ އިންތިޚާބުގައި ވޯޓުލުމުގެ ހައްގު ލިބިފައިވަނީ 263،000 މީހުންނަށެވެ.

މިއަހަރުގެ ރިޔާސީ އިންތިޚާބު އޮންނާނީ 9 ސެޕްޓެމްބަރުގައެވެ. އަދި ދެވަނަ ބުރެއް ބާއްވަން ޖެހިއްޖެނަމަ ބާއްވާނީ 30 ސެޕްޓެމްބަރުގައެވެ.