އަމިއްލަ މަސައްކަތްކުރާ ފަރާތްތަކަށް އެހީތެރިކަން ފޯރުކޮށްދިނުމަށް ސަރުކާރުން ފަށާފައިވާ ޚާއްސަ ޕްރޮގްރާމުގެ ތެރެއިން މި އެހީއަށް އެދުމަށް ދީފައިވާ މުއްދަތު އިތުރުކޮށްފިއެވެ.

އިކޮނޮމިކް މިނިސްޓްރީގެ ދަށުން ފަށާފައިވާ މި ޕްރޮގްރާމަކީ އަމިއްލަ މަސައްކަތްކުރާ ފަރާތްތަކަށް ފަންނީ އަދި މާލީ އެހީތެރިކަން ފޯރުކޮށްދިނުމުގެ މަގުސަދުގައި ފަށާފައިވާ ޕްރޮގްރާމެކެވެ.

މި އެހީއަށް އެދުމަށް ހުޅުވާލިއިރު ސުންގަޑިއެއްގެ ގޮތުގައި ދީފައިވަނީ މެއި 31 ވަނަ ދުވަހެވެ. އެހެންނަމަވެސް އަންގާރަ ދުވަހު އިކޮނޮމިކް މިނިސްޓްރީން ބުނީ މި މުއްދަތު އިތުރުކޮށްފައިވާކަމަށެވެ. މިގޮތުން މިހާރު 30 ޖޫންގެ ނިޔަލަށް އެހީއަށް އެދި ހުށަހެޅޭނެ ކަމަށް މިނިސްޓްރީން ބުނެފައިވެއެވެ.

މި ޕްރޮގްރާމުގެ ދަށުން އަމިއްލަ ވިޔަފާރިކުރާ 500 ފަރާތަށް ފުރުސަތު ދިނުމަށް ވަނީ ނިންމާފައެވެ. މީގެ ތެރެއިން 40 އިންސައްތަ އަންހެނުންނަށް ޚާއްސަކޮށްފައިވާކަމަށް އިކޮނޮމިކް މިނިސްޓްރީން ބުނެފައިވެއެވެ.

މި ޕްރޮގްރާމުގެ ދަށުން 60،000 ރުފިޔާއާ ހަމައަށް ފައިސާގެ އެހީ ދިނުމަށް ވަނީ ނިންމާފައެވެ. މައިގަނޑު 2 ކަމަކަށް އެހީދިނުމަށް ނިންމާފައިވާއިރު އެއީ ހަރުމުދާ ގަތުމަށާއި، ވިޔަފާރިއަށް ބޭނުންވާ ސްޓޮކް ގަތުުމަށް ކަމަށް އިކޮނޮމިކް މިނިސްޓްރީން ވަނީ ބުނެފައެވެ.

އިކޮނޮމިކް މިނިސްޓްރީން ބުނީ މައިގަނޑު 7 ދާއިރާއަކަށް އެހީ ފޯރުކޮށްދޭން ނިންމާފައިވާކަމަށެވެ. އެއީ:

އިކޮނޮމިކް މިނިސްޓްރީން ވަނީ މި ޕްރޮގްރާމުގެ ދަށުން އެހީދިނުމަށް ކަނޑައަޅާފައިވާ ޝަރުތުތައް ހާމަކޮށްފައެވެ. މިގޮތުން އުމުން 18 އަހަރާއި 65 އަހަރާ ދެމެދުގެ ފަރާތަކަށް ވުމާއި، އަމިއްލަ ނަމުގައި ދިވެހި ރުފިޔާ އެކައުންޓެއް އޮތުމާއި، ފާއިތުވެދިޔަ 4 ހަފްތާގައި މުސާރަ ލިބޭ ވަޒީފާއެއް އަދާކުރާ ފަރާތަކަށް ނުވުން، ނުވަތަ ވަޒީފާއެއް އަދާކުރާނަމަ ހަފްތާއަކު 20 ގަޑިއިރަށްވުރެ ގިނައިރު ވަޒީފާ އަދާކުރަމުންދާ ފަރާތަކަށް ވެގެން ނުވާނެ ކަމަށް އިކޮނޮމިކް މިނިސްޓްރީން ބުނެއެވެ. އަދި ސެޕްޓެމްބަރު 2022 އާ ހަމައަށް ފާއިތުވި 1 އަހަރު ދުވަހުގެ މުއްދަތުގެ ތެރޭގައި އަމިއްލަ މަސައްކަތުން އާމްދަނީ ހޯދަމުންދާ ފަރާތެއް ކަމުގައި ވުންވެސް ޝަރުތުތަކުގެ ތެރޭގައި ހިމެނެއެވެ.