ޖުލައި މަހު ރާއްޖޭގައި ބާއްވާ އޭޝިއަން ސާފިން ޗެމްޕިއަންޝިޕުގައި ދިވެހި އެތުލީޓުންނަށް މެޑަލް ހޯދޭނެ ކަމުގެ އުންމީދު ބޮޑު ކަމަށް، ސާފިން ޤައުމީ ޓީމުގެ ކޯޗު ދެކުނު އެފްރިކާ އަށް ނިސްބަތްވާ ކްލައިޑް މާޓިން ބުނެފި އެވެ.
މާޓިން މިހެން ބުނީ ރާއްޖޭގައި ބާއްވާ މުބާރާތް ލޯންޗު ކުރުމަށް ބޭއްވި ރަސްމިއްޔާތުގައި ބައިވެރިވެ ވާހަކަ ދައްކަމުންނެވެ. މާޓިންއާއެކު ޤައުމީ ސާފިން ޓީމުގެ ފަރިތަކުރުންތައް ފެށީ މިއަހަރުގެ ފެބްރުވަރީ މަހު އެވެ. މާޓިން ބުނީ ރާއްޖޭގައި އޮތް ސީނިއާ ޓީމަކީ ވަރަށް ވަރުގަދަ ޓީމެއް ކަމަށެވެ. އެހެންކަމުން މި މުބާރާތުން މެޑަލް ކާމިޔާބު ކުރުމުގެ ވަރަށް ސީރިއަސް ފުރުސަތެއް ދިވެހި ސާފަރުންނަށް އޮތް ކަމަށް އޭނާ ބުންޏެވެ. ޚާއްސަކޮށް އޯޕަން މެންސް، އޯޕަން ޓީމް މެންސް މެޑަލް ހާސިލް ކުރުމުގެ އުންމީދު ވަރަށް ބޮޑު ކަަމަށް މާޓިން ވަނީ ބުނެފަ އެވެ. މާޓިން ބުނީ ދިވެހި ޓީމުގައި ޚާއްސަ ލަނޑު ދަނޑިތަކެއް އޮތް ކަމަށާއި، މަސައްކަތް ކުރާނީ ސަތޭކަ އިންސައްތަ އެކަން ހާސިލް ކުރުމަށް ކަމަށެވެ. އެހެންކަމުން އަމިއްލަ ޤައުމުގައި އޮންނަ މުބާރާތުން މެޑަލް ހޯދޭނެ ކަމުގެ ފުރުސަތު ވަރަށް ބޮޑު ކަމަށް އޭނާ ދެކެ އެވެ.
އަހަރެން ޤަބޫލު ކުރަނީ ވަރަށް ބޮޑު ފުރުސަތެއް އެބަ އޮތް ކަމަށް، އަމިއްލަ ޤައުމަށް މެޑަލް ތަކެއް ހޯދައިދެވޭނެ ކަމުގެ. އަހަރަމެންގެ އޮބްޖެކްޓިވްއެއް އެބަ އޮތް. ސަތޭކަ އިންސައްތަ ފޯކަސް ކުރާނީ އެކަން ހާސިލް ކުރުމަށް.ކްލައިޑް މާޓިން / ޤައުމީ ޓީމުގެ ކޯޗު
މާޓިންގެ އިތުރުން އެ ޕްރެސްގައި ޤައުމީ ޓީމުގެ ދެ އެތުލީޓުން ކަމަށްވާ ހުސެއިން އަރީފް (އިބޫ) އާއި އަހުމަދު އާގިލް (އަންމަޑޭ) ވަނީ ބައިވެރިވެފަ އެވެ. މުބާރާތް ކުރިއަށް ގެންދާ ރަށް، ތުލުސްދޫ އަށް ވެސް ނިސްބަތްވާ އަންމަޑޭ ބުނީ، މިހާރު ވެސް ސަޕޯޓަރުންގެ ފަރާތުން ލިބެމުން އަންނަ ސަޕޯޓު ދިނުމުގައި ދެމިތިބުމަށް އެދޭ ކަމަށެވެ. ޚާއްސަކޮށް ރާއްޖޭގައި، އަމިއްލަ ފަސްގަނޑުގައި އެ ފެންވަރުގެ ބޮޑު މުބާރާތެއް ބާއްވާއިރު ޑިސިޕްލިން އަކީ ވަރަށް މުހިންމު އެއްޗެއް ކަމަށް އަންމަޑޭ ވަނީ ފާހަގަކޮށްފަ އެވެ. އޭނާ ބުނީ، ދިވެހި ސާފަރުން ބޭރު ޤައުމުތަކަށް ދިޔުމުން، އެމީހުންގެ މަރުހަބާ ކިޔުމާއި، ތައްޔާރީތައް ވަރަށް ފުރިހަމަ ކަމަށެވެ. އެހެންކަމުން ރާއްޖެ އިން ވެސް އެކަހަލަ ކަމެއް ފެންނާނެ ކަމަށް އުންމީދު ކުރާ ކަމަށް ވެސް އަންމަޑޭ ބުންޏެވެ. މީގެ އިތުރުން އަންމަޑޭ ބުނީ އަމިއްލަ ޤައުމުގައި މުބާރާތް ބޭއްވުމަކީ ލިބޭނެ ވަރަށް ބޮޑު އެޑްވާންޓޭޖެއް ކަމަށެވެ.
އަންމަޑޭގެ އިތުރުން އިބޫ ވެސް ވަނީ މުބާރާތް ރާއްޖޭގައި ބޭއްވުމަކީ ދިވެހި ހުރިހާ އެތުލީޓުންނަށް ލިބޭނެ ވަރަށް ބޮޑު އެޑްވާންޓޭޖެއް ކަމަށެވެ. ޚާއްސަކޮށް މުބާރާތް ކުރިއަށް ދާ ސަރަހައްދަކީ ދިވެހި ސާފަރުން ފަރިތަ ސަރަހައްދެއް ކަމަށާއި، އެހެންކަމުން މުބާރާތުގައި ކުރިއަށް ދެވޭނެ ކަމުގެ ވަރަށް ބޮޑު އުންމީދެއް އޮތް ކަމަށް ވެސް އިބޫ ބުންޏެވެ. އަންމަޑޭ ވެސް އެދުނު ފަދައިން އިބޫ ވެސް ވަނީ ސަޕޯޓަރުންގެ ސަޕޯޓު ބޭނުންވާނެ ކަމަށް ބުނެފަ އެވެ. ޚާއްސަކޮށް ސަޕޯޓަރުން ސަޕޯޓުކުރުމުގައި ކުޅިވަރުގެ ޑިސިޕްލިން އާއި އެހެނިހެން ކަންކަން ހިފެހެއްޓުމަށް އިބޫ ވެސް އެދެނެވެ.
އެހެންވީމާ ވަރަށް ބޮޑު އުންމީދެއް އެބަ އޮތް މި މުބާރާތުގައި ރަނގަޅު ހިސާބަކަށް އަޅުގަނޑުމެންނަށް ދެވިދާނެ ކަމަށް. ދެން އަންމަޑޭ ފާހަގަ ކުރިހެން ހަމަ، ސަޕޯޓަރުންގެ ސަޕޯޓު ވަރަށް ބޭނުންވާނެ. ސަޕޯޓު ކުރާއިރު ވެސް ޑިސިޕްލިން އާއި އެހުރިހާ ކަމަކަށް ބަލަންވާނެ.ހުސެއިން އަރީފް (އިބޫ)
ތުލުސްދޫގައި މުބާރާތް ކުރިއަށް ދާނީ އަންނަ ޖުލައި މަހުގެ އަށް ވަނަ ދުވަހުން 17 ވަނަ ދުވަހާ ހަމައަށެވެ. އެންމެ ފަހުން އޭޝިއަން ސާފިން މުބާރާތް ބޭއްވީ 2018 ވަނަ އަހަރު އެވެ. އެ އަހަރު ވެސް ރާއްޖޭގެ އެތުލީޓުން ވަނީ މުބާރާތުގައި ވާދަކޮށްފަ އެވެ. ޖަޕާނުގައި ކުރިއަށް ދިޔަ އެ މުބާރާތުގެ ފައިނަލް ހީޓުގައި ރާއްޖޭގެ އިބޫގެ އިތުރުން އިސްމާއީލް ރަޝީދު (ސްމައިލީ) ވަނީ ވާދަކޮށްފަ އެވެ. އެފަހަރު އިބޫ އަށް ތިން ވަނަ ލިބުނެވެ. ސްމައިލީ އަށް ލިބުނީ ހަތަރު ވަނަ އެވެ.
